ہوا چلی

اسماعیل میرٹھی

ہونے  کو   آئی   صبح  تو  ٹھنڈی  ہوا  چلی 

کیا  دھیمی دھیمی  چال سے یہ خوش ادا  چلی 

لہرا  دیا   ہے    کھیت کو  ہلتی  ہیں  بالیاں 

پودے بھی   جھومتے  ہیں لچکتی  ہیں  ڈالیاں 

پھلواریوں    میں   تازہ   شگوفے   کھلا  چلی 

سویا   ہوا   تھا   سبزہ   اسے   تو  جگا  چلی 

سر سبز ہوں  درخت  نہ باغوں  میں تجھ بغیر 

تیرے ہی دم قدم سے ہے بھاتی چمن کی سیر 

پڑجائے   اس  جہاں  میں  ہوا  کی  اگر  کمی 

چو  پایہ  کوئی  زندہ    بچے  اور   نہ   آدمی 

چڑیوں  کو  یہ اڑان کی   طاقت  کہاں  رہے 

پھر  کائیں  کائیں ہو  نہ   غٹرغوں  نہ  چہچہے 

بندوں  کو   چاہئے   کہ   کریں  بندگی   ادا 

اس کی کہ جس کے حکم سے چلتی ہے یہ سدا