۲ ۔ پہلی وحی

ذکر چند جاں نثاروں کا

ماں نے دنوں بھائیوں کو بہت تکالیف پہنچائیں۔ آخر عامر رضی اللہ عنہ تنگ آکر حبشہ کو ہجرت کر گئے۔ عامر رضی اللہ عنہ کے حبشہ ہجرت کر جانے سے پہلے ایک روز حضرت سعد بن ابی وقاص رضی اللہ عنہ گھر آئے تو دیکھا ماں اور عامر رضی اللہ عنہ کے چاروں طرف بہت سے لوگ جمع ہیں۔ میں نے پوچھا:
’’لوگ کیوں جمع ہیں؟‘‘
لوگوں نے بتایا:
’’یہ دیکھو تمہاری ماں نے تمہارے بھائی کو پکڑ رکھا ہے اور اللہ سے عہد کر رہی ہے کہ جب تک عامر بے دینی نہیں چھوڑے گا، اس وقت تک یہ نہ تو کھجور کے سائے میں بیٹھے گی اور نہ کھانا کھائے گی اور نہ پانی پئے گی۔‘‘
حضرت سعد بن ابی وقاص رضی اللہ عنہ نے یہ سن کر کہا:
’’اللہ کی قسم ماں!تم اس وقت تک کھجور کے سائے میں نہ بیٹھو اوراس وقت تک کچھ نہ کھاؤ پیو، جب تک کہ تم جہنم کا ایندھن نہ بن جاؤ۔‘‘
غرض انہوں نے ماں کی کوئی پروا نہ کی اور دین پر ڈٹے رہے۔ اسی طرح حضرت ابو بکر صدیق رضی اللہ عنہ کی کوششوں سے حضرت طلحہ تمیمی رضی اللہ عنہ بھی اسلام لے آئے۔ حضرت ابو بکر صدیق رضی اللہ عنہ انہیں حضور نبی کریم صلی اللہ علیہ وسلم کی خدمت میں لائے اور یہ آپ کے ہاتھ پرمسلمان ہوئے۔ اس کے بعد حضرت ابو بکر صدیق رضی اللہ عنہ اور حضرت طلحہ رضی اللہ عنہ نے اپنے اسلام لانے کا کھل کر اعلان کر دیا۔ ان کا اعلان سن کر نوفل ابن عدویہ نے انہیں پکڑ لیا۔ اس شخص کو قریش کا شیر کہا جاتا تھا۔ اس نے دونوں کو ایک ہی رسی سے باندھ دیا۔ اس کی اس حرکت پر ان کے قبیلے بنوتمیم نے بھی انہیں نہ بچایا۔ اب چونکہ نوفل نے دونوں کو ایک ہی رسی سے باندھا تھا اور دونوں کے جسم آپس میں بالکل ملے ہوئے تھے، اس لئے انہیں قرینین کہا جانے لگا، یعنی ملے ہوئے۔ نوفل بن عدویہ کے ظلم کی وجہ سے نبی کریم صلی اللہ علیہ وسلم فرمایا کرتے تھے:
’’اے اللہ! ابن عدویہ کے شر سے ہمیں بچا۔‘‘
حضرت طلحہ رضی اللہ عنہ اپنے اسلام قبول کر لینے کا سبب اس طرح بیان کرتے ہیں:
’’میں ایک مرتبہ بصریٰ کے بازار میں گیا، میں نے وہاں ایک راہب کو دیکھا، وہ اپنی خانقاہ میں کھڑا تھا اور لوگوں سے کہہ رہا تھا:
’’اس مرتبہ حج سے آنے والوں سے پوچھو، کیاان میں کوئی حرم کا باشندہ بھی ہے؟‘‘
میں نے آگے بڑھ کر کہا:
’’میں ہوں حرم کا رہنے والا۔‘‘
میرا جملہ سن کر اس نے کہا:
’’کیا احمد کا ظہور ہوگیا ہے؟‘‘
میں نے پوچھا:
’’احمد کون؟‘‘
تب اس راہب نے کہا:
’’احمد بن عبداللہ بن عبدالمطلب۔۔۔ یہ اس کا مہینہ ہے، وہ اس مہینے میں ظاہر ہو گا، وہ آخری نبی ہے۔ اس کے ظاہر ہونے کی جگہ حرم ہے اور اس کی ہجرت کی جگہ وہ علاقہ ہے،جہاں باغات ہیں، سبزہ زار ہیں، اس لیے تم پر ضروری ہے کہ تم اس نبی کی طرف بڑھنے میں پہل کرو۔‘‘
اس راہب کی کہی ہوئی بات میرے دل میں نقش ہوگئی ۔ میں تیزی کے ساتھ وہاں سے واپس روانہ ہوا اور مکہ پہنچا ۔ یہاں پہنچ کر میں نے لوگوں سے پوچھا:
’’کیا کوئی نیا واقعہ بھی پیش آیا ہے؟‘‘ 
لوگوں نے بتایا:
’’ہاں! محمد بن عبداللہ امین نے لوگوں کو اللہ کی طرف دعوت دینا شروع کی ہے، ابوبکر نے ان کی پیروی قبول کرلی ہے۔‘‘
میں یہ سنتے ہی گھر سے نکلا اور ابوبکر صدیق رضی اللہ عنہ کے پاس پہنچ گیا ۔ میں نے انہیں راہب کی ساری بات سنادی ۔ ساری بات سن کر حضرت ابوبکر صدیق رضی اللہ عنہ حضور نبی کریم صلی اللہ علیہ وسلم کی خدمت میں گئے اور آپ کو یہ پورا واقعہ سنایا ۔آپ سن کر بہت خوش ہوئے ۔اسی وقت میں بھی مسلمان ہوگیا ۔‘‘
یہ حضرت طلحہ رضی اللہ عنہ عشرہ مبشرہ میں سے ہیں ۔ یعنی جن صحابہ کرام رضی اللہ عنہم کو نبی کریم صلی اللہ علیہ وسلم نے دنیا ہی میں جنت کی بشارت دی، ان میں سے ایک ہیں ۔ 
اسی طرح حضرت ابوبکر صدیق رضی اللہ عنہ کی کوششوں سے جن صحابہ کرام رضی اللہ عنہم نے کلمہ پڑھا، ان میں سے پانچ عشرہ مبشرہ میں شامل ہیں ۔وہ یہ ہیں، حضرت زبیر، حضرت عثمان، حضرت طلحہ، حضرت عبدالرحمن رضی اللہ عنہم ۔ بعض نے ان میں چھٹے صحابی کا بھی اضافہ کیا ہے ۔ وہ ہیں حضرت ابوعبیدہ بن جراح رضی اللہ عنہ ۔ 
ان حضرات میں حضرت ابوبکر، حضرت عثمان، حضرت عبدالرحمن اور حضرت طلحہ رضی اللہ عنہم کپڑے کے تاجر تھے ۔ حضرت زبیر رضی اللہ عنہ جانور ذبح کرتے تھے اور حضرت سعد رضی اللہ عنہ تیر بنانے کا کام کرتے تھے ۔
ان کے بعد حضرت عبداللہ بن مسعود رضی اللہ عنہ ایمان لائے، وہ اپنے اسلام لانے کا واقعہ یوں بیان کرتے ہیں:
’’میں ایک دن عقبہ بن ابی معیط کے خاندان کی بکریاں چرا رہا تھا، اسی وقت رسول اللہ صلی اللہ علیہ وسلم وہاں آگئے ۔ ابوبکر صدیق رضی اللہ عنہ بھی آپ کے ساتھ تھے۔ آپ نے پوچھا:
’’ کیا تمہارے پاس دودھ ہے؟‘‘
میں نے کہا:
’’جی ہاں! لیکن میں تو امین ہوں۔‘‘ (یعنی یہ دودھ تو امانت ہے)۔ 
آپ نے فرمایا:
’’کیا تمہارے پاس کوئی ایسی بکری ہے جس نے ابھی کوئی بچہ نہ دیا ہو؟‘‘ 
میں نے کہا:
’’جی ہاں، ایک ایسی بکری ہے۔‘‘ 
میں اس بکری کو آپ کے قریب لے آیا ۔ اس کے ابھی تھن پوری طرح نہیں نکلے تھے ۔ آپ نے اس کی تھنوں کی جگہ پر ہاتھ پھیرا ۔اسی وقت اس بکری کے تھن دودھ سے بھر گئے ۔‘‘
یہ واقعہ دوسری روایت میں یوں بیان ہوا ہے کہ اس بکری کے تھن سوکھ چکے تھے ۔آپ نے ان پر ہاتھ پھیرا تو وہ دودھ سے بھر گئے ۔
حضرت عبداللہ بن مسعودرضی اللہ عنہ یہ دیکھ کر حیران رہ گئے ۔وہ آپ کو ایک صاف پتھر تک لے آئے ۔وہاں بیٹھ کر آپ ﷺنے بکری کا دودھ دوہا ۔آپ نے وہ دودھ ابوبکر صدیق رضی اللہ عنہ کو پلایا ۔پھر مجھے پلایا اور آخر میں آپ نے خود پیا ۔پھر آپ نے بکری کے تھن سے فرمایا:
’’سمٹ جا ۔‘‘
چنانچہ تھن فوراً ہی پھر ویسے ہوگئے جیسے پہلے تھے ۔ حضرت عبداللہ بن مسعود رضی اللہ عنہ فرماتے ہیں، جب میں نے رسول اللہ صلی اللہ علیہ و سلم کا یہ معجزہ دیکھا تو آپ سے عرض کیا:
’’اے اللہ کے رسول! مجھے اس کی حقیقت بتائیے ۔‘‘
آپ نے یہ سن کر میرے سر پر ہاتھ پھیرا اور فرمایا:
’’اللہ تم پر رحم فرمائے، تم تو جان کار ہو۔‘‘ 
یہ عبداللہ بن مسعود باپ کی بجائے، ماں کی طرف سے زیادہ مشہور تھے ۔ان کی ماں کا نام ام عبد تھا ۔ان کا قد بہت چھوٹا تھا ۔نہایت دبلے پتلے تھے ۔ایک مرتبہ صحابہ ان پر ہنسنے لگے تو آپ نے ارشاد فرمایا:
’’عبداللہ اپنے مرتبے کے لحاظ سے ترازو میں سب سے بھاری ہیں ۔‘‘
انہی کے بارے میں نبی کریم صلی اللہ علیہ وسلم نے ارشاد فرمایا تھا:
’’اپنی امت کے لیے میں بھی اسی چیز پر راضی ہوگیا جس پر ابن ام عبد یعنی عبداللہ ابن مسعود راضی ہوگئے ،اور جس چیز کو عبداللہ بن مسعود نے امت کے لیے ناگوار سمجھا، میں نے بھی اس کو ناگوار سمجھا ۔‘‘
آپ ان کی بہت عزت کرتے تھے ۔انہیں اپنے قریب بٹھایا کرتے تھے، ان سے کسی کو چھپایا نہیں کرتے تھے، اسی لیے یہ آپ کے گھر میں آتے جاتے تھے ۔یہ نبی کریم کے آگے آگے یا ساتھ ساتھ چلا کرتے تھے ۔آپ جب غسل فرماتے تو یہی پردے کے لیے چادر تان کر کھڑے ہوتے تھے ۔آپ جب سو جاتے تو یہی آپ کو وقت پر جگایا کرتے تھے ۔اسی طرح جب آپ کہیں جانے کے لیے کھڑے ہوتے تھے تو حضرت عبداللہ بن مسعود رضی اللہ عنہ آپ کو جوتے پہناتے تھے ۔پھر جب آپ کہیں پہنچ کر بیٹھ جاتے تو یہ آپ کے جوتے اٹھاکر اپنے ہاتھ میں لے لیا کرتے تھے ۔ان کی انہی باتوں کی وجہ سے بعض صحابہ کرام رضی اللہ عنہم میں مشہور تھا کہ یہ رسول اللہ صلی اللہ علیہ وسلم کے گھرانے والوں میں سے ہیں ۔انہیں آپ صلی اللہ علیہ وسلم نے جنت کی بشارت دی تھی۔حضرت عبداللہ بن مسعود رضی اللہ عنہ فرمایا کرتے تھے:
’’دنیا تمام کی تمام غموں کی پونجی ہے، اس میں اگر کوئی خوشی ہے تو وہ صرف وقتی فائدے کے طور پر ہے۔‘‘
حضرت عبداللہ بن مسعود رضی اللہ عنہ کے بعد حضرت ابوذرغفاری رضی اللہ عنہ ایمان لائے۔

پانچواں آدمی

حضرت ابوذر غفاریؓ اپنے اسلام لانے کا واقعہ بیان کرتے ہوئے فرماتے ہیں: 
’’آنحضرت ﷺ پر وحی آنے سے بھی تین سال پہلے سے میں اللہ تعالیٰ کے لئے نماز پڑھا کرتا تھا اور جس طرف اللہ تعالیٰ میرا رخ کردیتے،میں اسی طرف چل پڑتا تھا ۔ اسی زمانہ میں ہمیں معلوم ہوا کہ مکہ معظمہ میں ایک شخص ظاہر ہوا ہے،اس کا دعویٰ ہے کہ وہ نبی ہے ، یہ سن کر میں نے اپنے بھائی انیس سے کہا:
’’ تم اس شخص کے پاس جاؤ،اس سے بات چیت کرو اور آکر مجھے اس بات چیت کے بارے میں بتاؤ ۔‘‘
چنانچہ انیس نے نبی کریم ﷺ سے ملاقات کی،جب وہ واپس آئے تو میں نے ان سے آپ ﷺ کے بارے میں پوچھا۔انہوں نے بتایا:
’’ اللہ کی قسم! میں ایک ایسے شخص کے پاس سے آ رہا ہوں جو اچھائیوں کا حکم دیتا ہے اور برائیوں سے روکتا ہے اور ایک روایت میں ہے کہ میں نے تمھیں اسی شخص کے دین پر پایا ہے ۔ اس کا دعویٰ ہے کہ اسے اللہ نے رسول بنا کر بھیجا ہے ۔ میں نے اس شخص کو دیکھا کہ وہ نیکی اور بلند اخلاق کی تعلیم دیتا ہے۔‘‘
میں نے پوچھا:
’’لوگ اس کے بارے میں کیا کہتے ہیں؟‘‘
انیس نے بتایا: 
’’لوگ اس کے بارے میں کہتے ہیں کہ یہ کاہن اور جادوگر ہے مگر اللہ کی قسم وہ شخص سچا ہے اور وہ لوگ جھوٹے ہیں۔‘‘
یہ تمام باتیں سن کر میں نے کہا:
’’بس کافی ہے، میں خود جاکر ان سے ملتا ہوں۔‘‘ 
انیس نے فوراًکہا:
’’ضرور جاکر ملو، مگر مکہ والوں سے بچ کر رہنا۔‘‘
چنانچہ میں نے اپنے موزے پہنے، لاٹھی ہاتھ میں لی اور روانہ ہوگیا، جب میں مکہ پہنچا تو میں نے لوگوں کے سامنے ایسا ظاہر کیا، جیسے میں اس شخص کو جانتا ہی نہیں اور اس کے بارے میں پوچھنا بھی پسند نہیں کرتا۔ میں ایک ماہ تک مسجد حرام میں ٹھہرا رہا، میرے پاس سوائے زمزم کے کھانے کو کچھ نہیں تھا۔ اس کے باوجود میں زمزم کی برکت سے موٹا ہوگیا ۔ میرے پیٹ کی سلوٹیں ختم ہوگئیں ۔ مجھے بھوک کا بالکل احساس نہیں ہوتا تھا ۔ ایک رات جب حرم میں کوئی طواف کرنے والا نہیں تھا، اللہ کے رسول ایک ساتھی(ابوبکر رضی اللہ عنہ) کے ساتھ وہاں آئے اور بیت اللہ کا طواف کرنے لگے ۔ اس کے بعد آپ نے اور آپ کے ساتھی نے نماز پڑھی ۔ جب آپ نماز سے فارغ ہوگئے تو میں آپ کے نزدیک چلا گیا اور بولا:
’’السلام علیک یا رسول اللہ، میں گواہی دیتا ہوں کہ اللہ تعالیٰ کے سوا کوئی عبادت کے لائق نہیں اور یہ کہ محمد صلی اللہ علیہ وسلم اللہ کے رسول ہیں ۔‘‘
میں نے محسوس کیا، حضورنبی کریم صلی اللہ علیہ وسلم کے چہرے پر خوشی کے آثار نمودار ہوگئے ۔ پھر آپ نے مجھ سے پوچھا:
’’تم کون ہو۔‘‘یں نے جواب میں کہا:
’’جی میں غفار قبیلے کا ہوں۔‘‘
آپ نے پوچھا:
’’یہاں کب سے آئے ہوئے ہو؟‘‘
میں نے عرض کیا:
’’تیس دن اور تیس راتوں سے یہاں ہوں۔‘‘
آپ نے پوچھا:
’’تمہیں کھانا کون کھلاتا ہے؟‘‘
میں نے عرض کی:
’’میرے پاس سوائے زمزم کے کوئی کھانا نہیں،اس کو پی پی کر میں موٹا ہو گیا ہوں، یہاں تک کہ میرے پیٹ کی سلوٹیں تک ختم ہو گئی ہیں اور مجھے بھوک کا بالکل احساس نہیں ہوتا۔‘‘
آپ نے فرمایا:
’’مبارک ہو،یہ زمزم بہترین کھانا اور ہر بیماری کی دوا ہے۔‘‘
زمزم کے بارے میں احادیث میں آتا ہے، اگر تم آب زمزم کو اس نیت سے پیو کہ اللہ تعالی تمہیں اس کے ذریعے بیماریوں سے شفا عطا فرمائے تواللہ تعالی شفا عطا فرماتا ہے اوراگر اس نیت سے پیا جائے کہ اس کے ذریعے پیٹ بھر جائے اور بھوک نہ رہے تو آدمی شکم سیر ہو جاتا ہے اور اگر اس نیت سے پیا جائے کہ پیاس کا اثر باقی نہ رہے تو پیاس ختم ہو جاتی ہے۔اس کے ذریعے اللہ تعالی نے اسماعیل علیہ السلام کو سیراب کیا تھا۔ ایک حدیث میں آتا ہے کہ جی بھر کر زمزم کا پانی پینا اپنے آپ کو نفاق سے دور کرنا ہے۔ اور ایک حدیث میں ہے کہ ہم میں اور منافقوں میں یہ فرق ہے کہ وہ لوگ زمزم سے سیرابی حاصل نہیں کرتے۔
ہاں تو بات ہو رہی تھی حضرت ابو ذر غفاریؓ کی۔۔۔کہا جاتا ہے،ابوذر غفاری اسلام میں پہلے آدمی ہیں جنہوں نے آپﷺ کو اسلامی سلام کے الفاظ کے مطابق سلام کیا۔ ان سے پہلے کسی نے آپﷺ کو ان الفاظ میں سلام نہیں کیا تھا۔
اب ابو ذرؓ نے آپﷺ سے اس بات پر بیعت کی کہ اللہ تعالی کے معاملے میں وہ کسی ملامت کرنے والے کی ملامت سے نہیں گھبرائیں گے اور یہ کہ ہمیشہ حق اور سچی بات کہیں گے چاہے حق سننے والے کے لئے کتنا ہی کڑوا کیوں نہ ہو۔
یہ حضرت ابو ذرؓ حضرت ابو بکر صدیقؓ کی وفات کے بعد ملک شام کے علاقے میں ہجرت کر گئے تھے۔پھر حضرت عثمانؓ کی خلافت میں انہیں شام سے واپس بلا لیا گیا اور پھر یہ ربذہ کے مقام پر آ کر رہنے لگے تھے۔ ربذہ کے مقام پر ہی ان کی وفات ہوئی تھی۔
ان کے ایمان لانے کے بارے میں ایک روایت یہ ہے کہ جب یہ مکہ معظمہ آئے تو ان کی ملاقات حضرت علیؓ سے ہوئی تھی اور حضرت علیؓ نے ہی ان کو آپ ﷺ سے ملوایا تھا۔
ابو ذرؓ کہتے ہیں:
’’بیعت کرنے کے بعد نبی کریمﷺ انہیں ساتھ لے گئے۔ ایک جگہ حضرت ابو بکرصدیقؓ نے ایک دروازہ کھولا،ہم اندر داخل ہوئے،ابو بکر صدیقؓ نے ہمیں انگور پیش کیے۔ اس طرح یہ پہلا کھانا تھا جو میں نے مکہ میں آنے کے بعد کھایا۔‘‘
اس کے بعد نبیﷺ نے ان سے فرمایا:
’’اے ابو ذرؓ اس معاملے کو ابھی چھپائے رکھنا، اب تو تم اپنی قوم میں واپس جاؤ اور انہیں بتاؤ تاکہ وہ لوگ میرے پاس آ سکیں، پھر جب تمہیں معلوم ہو کہ ہم نے خود اپنے معاملہ کا کھلم کھلا اعلان کر دیا ہے تو اس وقت تم ہمارے پاس آ جانا۔‘‘
آپﷺ کی بات سن کر حضرت ابو ذر غفاریؓ بولے:
’’قسم ہے اس ذات کی جس نے آپ کو سچائی دے کر بھیجا، میں ان لوگوں کے درمیان کھڑے ہو کر پکار پکار کر اعلان کروں گا۔‘‘
حضرت ابو ذرؓ کہتے ہیں:
’’میں ایمان لانے والے دیہاتی لوگوں میں سے پانچواں آدمی تھا‘‘۔
غرض جس وقت قریش کے لوگ حرم میں جمع ہوئے، انہوں نے بلند آواز میں چلا کر کہا:
’’میں گواہی دیتا ہوں سوائے اللہ کے کوئی معبود نہیں اور میں گواہی دیتا ہوں کہ محمد اللہ تعالیٰ کے رسول ہیں۔‘‘
بلند آواز میں یہ اعلان سن کر قریشیوں نے کہا:
’’اس بددین کو پکڑ لو‘‘۔
انہوں نے حضرت ابو ذرؓ کے پکڑ لیا اور بے انتہا مارا۔ایک روایت میں الفاظ یہ ہیں،وہ لوگ ان پر چڑھ دوڑے۔ پوری قوت سے انہیں مارنے لگے۔ یہاں تک کہ وہ بے ہوش ہو کر گر پڑے۔ اس وقت حضرت عباسؓ درمیان میں آگئے۔ وہ ان پر جھک گئے اور قریشیوں سے کہا:
’’تمہارا برا ہو! کیا تمہیں معلوم نہیں کہ یہ شخص قبیلہ غفار سے ہے۔ ان کا علاقہ تمہاری تجارت کا راستہ ہے۔‘‘
ان کے کہنے کا مطلب یہ تھا کہ قبیلہ غفار کے لوگ تمہارا راستہ بند کر دیں گے اس پر ان لوگوں نے انہیں چھوڑ دیا۔
ابو ذرؓ فرماتے ہیں، اس کے بعد میں زم زم کے کنویں کے پاس آیا۔ اپنے بدن سے خون دھویا اگلے دن میں نے پھر اعلان کیا:
’’میں گواہی دیتا ہوں کہ اللہ کے سوا کوئی عبادت کے لائق نہیں اور محمد ﷺ اللہ کے رسول ہیں۔‘‘
انہوں نے پھر مجھے مارا۔ اس روز بھی حضرت عباسؓ ہی نے مجھے ان سے چھڑایا۔ پھر میں وہاں سے واپس ہوا اور اپنے بھائی انیس کے پاس آیا۔

حقیقت روشن ہوگئی

حضرت عبداللہ بن مسعود رضی اللہ عنہ کی بات سن کر صحابہ نے کہا:
’’ہمیں قریش کی طرف سے آپ کے بارے میں خطرہ ہے، ہم تو ایسا آدمی چاہتے ہیں جس کا خاندان قریش سے اس کی حفاظت کرتا رہے۔‘‘
اس کے جواب میں حضرت عبداللہ بن مسعود رضی اللہ عنہ نے فرمایا:
’’تم میری پروا نہ کرو، اللہ تعالی خود میری حفاظت فرمائیں گے۔‘‘
دوپہر کے بعد حضرت عبداللہ بن مسعود رضی اللہ عنہ بیت اللہ میں پہنچ گئے۔آپ مقام ابراہیم کے پاس کھڑے ہوگئے۔اس وقت قریش اپنے اپنے گھروں میں تھے۔اب انہوں نے بلند آواز سے قرآن پڑھنا شروع کیا۔
قریش نے یہ آواز سنی تو کہنے لگے، 
’’اس غلام زادے کو کیا ہوا؟ ‘‘
کوئی اور بولا:
’’محمد جو کلام لے کر آئے ہیں، یہ وہی پڑھ رہا ہے۔‘‘
یہ سنتے ہی مشرکین ان کی طرف دوڑ پڑے اور لگے انہیں مارنے پیٹنے۔عبداللہ بن مسعود رضی اللہ عنہ چوٹیں کھاتے جاتے تھے اور قرآن پڑھتے جاتے تھے۔یہاں تک کہ انہوں نے سورۃ کا زیادہ تر حصہ تلاوت کرڈالا۔اس کے بعد وہاں سے اپنے ساتھیوں کے پاس آگئے۔ان کا چہرہ اس وقت تک لہولہان ہوچکا تھا۔ان کی یہ حالت دیکھ کر مسلمان بول اٹھے:
’’ہمیں تمہاری طرف سے اسی بات کا خطرہ تھا۔‘‘
حضرت عبداللہ بن مسعود رضی اللہ عنہ نے فرمایا:
’’اللہ کی قسم! اللہ کے دشمنوں کو میں نے اپنے لیے آج سے زیادہ ہلکا اور کمزور کبھی نہیں پایا۔اگر تم لوگ کہو تو کل پھر ان کے سامنے جا کر قرآن پڑھ سکتا ہوں۔‘‘
اس پر مسلمان بولے:
’’نہیں، وہ لوگ جس چیز کو نا پسند کرتے ہیں، آپ انہیں وہ کافی سنا آئے ہیں۔‘‘
کفار کا یہ ظلم و ستم جاری رہا۔ایسے میں ایک دن حضور صلی اللہ علیہ وسلم صفا کی پہاڑی کے پاس موجود تھے۔ابوجہل آپ کے پاس سے گزرا۔اس نے آپ کو دیکھ لیا اورلگا گالیاں دینے، اس نے آپ کے سر پر مٹی بھی پھینکی۔عبداللہ بن جدعان کی باندی نے یہ منظر دیکھا۔پھر ابو جہل آپ کے پاس سے چل کر حرم میں داخل ہوا۔وہاں مشرکین جمع تھے۔وہ ان کے سامنے اپنا کارنامہ بیان کرنے لگا۔اسی وقت آپ کے چچا حضرت حمزہ رضی اللہ عنہ حرم میں داخل ہوئے۔یہ اس وقت تک مسلمان نہیں ہوئے تھے۔تلوار ان کی کمر سے لٹک رہی تھی۔وہ اس وقت شکار سے واپس آئے تھے۔ان کی عادت تھی کہ جب شکار سے لوٹتے تو پہلے حرم جا کر طواف کرتے تھے پھر گھر جاتے تھے۔حضرت حمزہ رضی اللہ عنہ حرم میں داخل ہونے سے پہلے عبداللہ بن جدعان کی باندی کے پاس سے گزرے، اس نے سارا منظر خاموشی سے دیکھا اور سنا تھا۔اس نے حضرت حمزہ رضی اللہ عنہ سے کہا:
’’اے حمزہ! کچھ خبر بھی ہے، ابھی ابھی یہاں ابو حکم بن ہشام(ابو جہل)نے تمہارے بھتیجے کے ساتھ کیا سلوک کیا ہے۔وہ یہاں بیٹھے تھے، ابو جہل نے انہیں دیکھ لیا، انہیں تکالیف پہنچائیں، گالیاں دیں اور بہت بری طرح پیش آیا، آپ کے بھتیجے نے جواب میں اسے کچھ بھی نہ کہا ۔‘‘
ساری بات سن کر حضرت حمزہ رضی اللہ عنہ نے کہا:
’’تم جو کچھ بیان کررہی ہو، کیا یہ تم نے اپنی آنکھوں سے دیکھا ہے ۔‘‘
اس نے فوراً کہا:
’’ہاں! میں نے خود دیکھا ہے ۔‘‘
یہ سنتے ہی حضرت حمزہ رضی اللہ عنہ جوش میں آگئے ۔ چہرہ غصے سے تمتما اٹھا ۔ فوراً حرم میں داخل ہوئے، وہاں ابوجہل موجود تھا ۔ وہ قریشیوں کے درمیان میں بیٹھا تھا، یہ سیدھے اس تک جاپہنچے ۔ ہاتھ میں کمان تھی، بس وہی کھینچ کر اس کے سر پر دے ماری ۔ ابوجہل کا سر پھٹ گیا ۔ حضرت حمزہ رضی اللہ عنہ نے اس سے کہا:
’’تو محمد کو گالیاں دیتا ہے، سن لے! میں بھی اس کا دین اختیار کرتا ہوں ، جو کچھ وہ کہتا ہے، وہی میں بھی کہتا ہوں، اب اگر تجھ میں ہمت ہے تو مجھے جواب دے۔‘‘ 
ابوجہل ان کی منت سماجت کرتے ہوئے بولا:
’’وہ ہمیں بے عقل بتاتا ہے، ہمارے معبودوں کو برا کہتا ہے، ہمارے باپ دادا کے راستے کے خلاف چلتا ہے۔‘‘
یہ سن کر حضرت حمزہ رضی اللہ عنہ بولے:
’’اور خود تم سے زیادہ بے عقل اور بیوقوف کون ہوگا جو اللہ کو چھوڑ کر پتھر کے ٹکڑوں کو پوجتے ہو، میں گواہی دیتا ہوں کہ اللہ کے سوا کوئی معبود نہیں اور میں گواہی دیتا ہوں کہ محمد اللہ کے رسول ہیں ۔‘‘
ان کے یہ الفاظ سن کر ابوجہل کے خاندان کے کچھ لوگ یک دم حضرت حمزہ رضی اللہ عنہ کی طرف بڑھے اور انہوں نے کہا:
’’اب تمہارے بارے میں بھی ہمیں یقین ہوگیا ہے کہ تم بھی بے دین ہوگئے ہو۔‘‘ 
جواب میں حضرت حمزہ رضی اللہ عنہ نے فرمایا:
’’آؤ…کون ہے مجھے اس سے روکنے والا ۔ مجھ پر حقیقت روشن ہوگئی ہے، میں گواہی دیتا ہوں کہ وہ اللہ کے رسول ہیں، جو کچھ وہ کہتے ہیں، وہ حق اور سچائی ہے، اللہ کی قسم! میں انہیں نہیں چھوڑوں گا ۔اگر تم سچے ہو تو مجھے روک کر دکھاؤ ۔‘‘
یہ سن کر ابوجہل نے اپنے لوگوں سے کہا:
’’ابو عمارہ (یعنی حضرت حمزہ رضی اللہ عنہ) کو چھوڑدو، میں نے واقعی ان کے بھتیجے کے ساتھ ابھی کچھ برا سلوک کیا تھا ۔‘‘
وہ لوگ ہٹ گئے ۔ حضرت حمزہ رضی اللہ عنہ گھر پہنچے ۔ گھر آکر انہوں نے الجھن محسوس کی کہ یہ میں قریش کے سامنے کیا کہہ آیا ہوں…میں تو قریش کا سردار ہوں۔
لیکن پھر ان کا ضمیر انہیں ملامت کرنے لگا، آخر شدید الجھن کے عالم میں انہوں نے دعا کی:
’’اے اللہ! اگر یہ سچا راستہ ہے تو میرے دل میں یہ بات ڈال دے اور اگر ایسا نہیں ہے تو پھر مجھے اس مشکل سے نکال دے، جس میں میں گھر گیا ہوں ۔‘‘
وہ رات انہوں نے اسی الجھن میں گزاری ۔ آخر صبح ہوئی تو حضور نبی کریم صلی اللہ علیہ وسلم کے پاس پہنچے ۔ آپ سے عرض کیا:
’’بھتیجے! میں ایسے معاملے میں الجھ گیا ہوں کہ مجھے اس سے نکلنے کا کوئی راستہ سجھائی نہیں دیتا اور ایک ایسی صورت حال میں رہنا، جس کے بارے میں میں نہیں جانتا، یہ سچائی ہے یا نہیں، بہت سخت معاملہ ہے ۔‘‘
اس پر آنحضرت صلی اللہ علیہ وسلم حضرت حمزہ رضی اللہ عنہ کی طرف متوجہ ہوئے ۔ آپ نے انہیں اللہ کے عذاب سے ڈرایا ۔ ثواب کی خوش خبری سنائی، آپ کے وعظ و نصیحت کا یہ اثر ہوا کہ اللہ تعالیٰ نے انہیں ایمان کا نور عطا فرمادیا، وہ بول اٹھے:
’’اے بھتیجے! میں گواہی دیتا ہوں کہ تم اللہ کے رسول ہو ۔بس اب تم اپنے دین کو کھل کر پیش کرو ۔‘‘
حضرت ابن عباس رضی اللہ عنہ فرماتے ہیں، اسی واقعے پر قرآن پاک کی یہ آیت نازل ہوئی:
ترجمہ:’’ ایسا شخص جو کہ پہلے مردہ تھا، پھر ہم نے اسے زندہ کردیا اور ہم نے اسے ایک ایسا نور دے دیا کہ وہ اسے لیے ہوئے چلتا پھرتا ہے۔‘‘ (سورۃ الانعام)
حضرت حمزہ رضی اللہ عنہ کے ایمان لانے پر حضور نبی کریم صلی اللہ علیہ وسلم کو بہت زیادہ خوشی ہوئی، اس کی ایک وجہ تو یہ تھی کہ حضرت حمزہ رضی اللہ عنہ آپ کے سگے چچا تھے، دوسری وجہ یہ تھی کہ وہ قریش میں سب سے زیادہ معزز فرد تھے۔ اس کے ساتھ ہی وہ قریش کے سب سے زیادہ بہادر، طاقت ور اور خوددار انسان تھے اور اسی بنیاد پر جب قریش نے دیکھا کہ اب رسول اللہ صلی اللہ علیہ وسلم کو مزید قوت حاصل ہوگئی ہے تو انہوں نے آپ کو تکالیف پہنچانے کا سلسلہ بند کردیا، لیکن اپنے تمام ظلم و ستم اب وہ کمزور مسلمانوں پر ڈھانے لگے۔ کسی قبیلے کا بھی کوئی شخص مسلمان ہوجاتا وہ اس کے پیچھے ہاتھ دھوکر پڑجاتے، ایسے لوگوں کو قید کردیتے، بھوکا پیاسا رکھتے ،تپتی ریت پر لٹاتے، یہاں تک کہ اس کا یہ حال ہوجاتا کہ سیدھے بیٹھنے کے قابل بھی نہ رہتا۔ اس ظلم اور زیادتی پر سب سے زیادہ ابوجہل لوگوں کو اکساتا تھا۔
ایسے ہی لوگوں میں سے ایک حضرت بلال حبشی رضی اللہ عنہ بھی تھے۔ آپ کا پورا نام بلال بن رباح تھا۔ یہ امیہ بن خلف کے غلام تھے۔
حضرت بلال رضی اللہ عنہ مکہ میں پیدا ہوئے تھے۔ پہلے عبداللہ بن جدعان تمیمی کے غلام تھے۔ عبداللہ بن جدعان کے سو غلام تھے، یہ ان میں سے ایک تھے۔ جب اسلام کا آغاز ہوا اور اس کا نور پھیلا تو عبداللہ بن جدعان نے اپنے ۹۹ غلاموں کو اس خوف سے مکہ سے باہر بھجوا دیا کہ کہیں وہ مسلمان نہ ہوجائیں۔ بس اس نے حضرت بلال بن رباح رضی اللہ عنہ کو اپنے پاس رکھ لیا۔ یہ اس کی بکریاں چرایا کرتے تھے۔ اسلام کی روشنی حضرت بلال رضی اللہ عنہ تک بھی پہنچی۔ یہ ایمان لے آئے مگر انہوں نے اپنے اسلام کو چھپائے رکھا۔ ایک روز انہوں نے کعبہ کے چاروں طرف رکھے بتوں پر گندگی ڈال دی۔ ساتھ ہی وہ ان پر تھوکتے جاتے تھے اور کہتے جاتے تھے: 
’’جس نے تمہاری عبادت کی وہ تباہ ہوگیا۔‘‘
یہ بات قریش کو معلوم ہوگئی۔ وہ فوراً عبداللہ بن جدعان کے پاس آئے…اور اس سے بولے: 
’’بے دین ہوگئے ہو۔‘‘
اس نے حیران ہوکر کہا: 
’’کیا میرے بارے میں بھی یہ بات کہی جاسکتی ہے؟ ‘‘
اس پر وہ بولے: 
’’تمہارے غلام بلال نے آج ایسا ایسا کیا ہے۔‘‘
’’کیا!!! ‘‘
وہ حیرت زدہ رہ گیا۔

آزمائشوں پر آزمائشیں 

عبداللہ بن جدان نے فوراً قریش کو ایک سو درہم دیے تاکہ بتوں کی جو توہین ہوئی ہے، اس کے بدلے ان کے نام پر کچھ جانور ذبح کردیے جائیں۔ پھر وہ حضرت بلال رضی اللہ عنہ کی طرف بڑھا۔ اس نے انہیں رسی سے باندھ دیا۔ تمام دن بھوکا اور پیاسا رکھا۔ پھر تو یہ اس کا روز کا معمول بن گیا۔ جب دوپہر کے وقت سورج آگ برسانے لگتا تو انہیں گھر سے نکال کر تپتی ہوئی ریت پر چت لٹادیتا۔ اس وقت ریت اس قدر گرم ہوتی تھی کہ اگر اس پر گوشت کا ٹکڑا رکھ دیا جاتا تو وہ بھی بھن جاتا تھا۔ وہ اسی پر بس نہیں کرتا تھا، ایک وزنی پتھر منگاتا اور ان کے سینے پر رکھ دیتا تاکہ وہ اپنی جگہ پر سے ہل بھی نہ سکیں۔ پھر وہ بدبخت ان سے کہتا: 
’’ اب یا تو محمد کی رسالت اور پیغمبری سے انکار کر اور لات و عزیٰ کی عبادت کر ورنہ میں تجھے یہاں اسی طرح لٹائے رکھوں گا، یہاں تک کہ تیرا دم نکل جائے گا۔ ‘‘
حضرت بلال رضی اللہ عنہ اس کی بات کے جواب میں فرماتے: 
’’ احد….احد۔‘‘
یعنی اللہ تعالیٰ ایک ہے، اس کا کوئی شریک نہیں۔
جب حضرت بلال رضی اللہ عنہ کسی طرح اسلام سے نہ ہٹے تو تنگ آکر عبداللہ بن جدعان نے انہیں امیہ بن خلف کے حوالے کردیا۔ اب یہ شخص ان پر اس سے بھی زیادہ ظلم و ستم ڈھانے لگا۔ 
ایک روز انہیں اسی قسم کی خوفناک سزائیں دی جارہی تھیں کہ حضور نبی کریم صلی اللہ علیہ وسلم اس طرف سے گزرے۔حضرت بلال رضی اللہ عنہ شدت تکلیف کی حالت میں احد احد پکار رہے تھے۔آپ نے انہیں اس حالت میں دیکھ کر فرمایا: 
’’ بلال! تمہیں یہ احد احد ہی نجات دلائے گا۔‘‘
پھر ایک روز حضرت ابوبکر رضی اللہ عنہ اس طرف سے گزرے۔ امیہ بن خلف نے انہیں گرم ریت پر لٹا رکھا تھا۔ سینے پر ایک بھاری پتھر رکھا ہوا تھا۔انہوں نے یہ دردناک منظر دیکھ کر امیہ بن خلف سے کہا: 
’’ کیا اس مسکین کے بارے میں تمہیں اللہ کا خوف نہیں آتا، آخر کب تک تم اسے عذاب دیے جاؤگے۔‘‘
امیہ بن خلف نے جل کر کہا: 
’’ تم ہی نے اسے خراب کیا ہے، اس لیے تم ہی اسے نجات کیوں نہیں دلادیتے۔‘‘
اس کی بات سن کر حضرت ابوبکر رضی اللہ عنہ بولے: 
’’ میرے پاس بھی ایک حبشی غلام ہے، وہ اس سے زیادہ طاقتور ہے اور تمہارے ہی دین پر ہے، میں ان کے بدلے میں تمہیں وہ دے سکتا ہوں۔‘‘
یہ سن کر امیہ بولا: 
’’ مجھے یہ سودا منظور ہے۔ ‘‘
یہ سنتے ہی ابوبکر صدیق رضی اللہ عنہ نے اپنا حبشی غلام اس کے حوالے کردیا۔ اس کے بدلے میں حضرت بلال رضی اللہ عنہ کو لے لیا اور آزاد کردیا۔ سبحان اللہ! کیا خوب سودہ ہوا، یہاں یہ بات جان لینی چاہئے کہ حضرت ابوبکر رضی اللہ عنہ کا حبشی غلام دنیا کے لحاظ سے بہت قیمتی تھا، یہ بھی کہا جاتا ہے کہ امیہ بن خلف نے غلام کے ساتھ دس اوقیہ سونا بھی طلب کیا تھا اور حضرت ابوبکر صدیق رضی اللہ عنہٗ نے اس کا یہ مطالبہ بھی مان لیا تھا چنانچہ آپ نے اسے ایک یمنی چادر اور کچھ سونا دیا تھا ۔ ساتھ ہی آپ نے امیہ بن خلف سے فرمایا تھا:
’’اگر تم مجھ سے سو اوقیہ سونا بھی طلب کرتے تو بھی میں تمہیں دے دیتا ۔‘‘ 
حضرت بلال رضی اللہ عنہ کے علاوہ حضرت ابوبکر صدیق رضی اللہ عنہ نے اور بھی بہت سے غلام مسلمانوں کو خرید کر آزاد فرمایا تھا، یہ وہ مسلمان غلام تھے جنہیں اللہ کا نام لینے کی وجہ سے ظلم کا نشانہ بنایا جارہا تھا ۔ ان میں ایک حضرت بلال رضی اللہ عنہ کی والدہ حمامہ رضی اللہ عنہا تھیں ۔ ایک عامر بن فہیرہ رضی اللہ عنہ تھے ۔ انہیں اللہ کا نام لینے پر بڑے بڑے سخت عذاب دیے جاتے ۔یہ قبیلہ بنی تمیم کے ایک شخص کے غلام تھے ۔ وہ حضرت ابوبکر صدیق رضی اللہ عنہ کا رشتے دار تھا ۔ آپ نے اپنے رشتے دار سے خرید کر انہیں بھی آزاد فرمایا ۔ ایک صاحب ابو فکیہ رضی اللہ عنہ تھے ۔یہ صفوان بن امیہ رضی اللہ عنہ کے غلام تھے ۔ یہ حضرت بلال رضی اللہ عنہ کے ساتھ ہی مسلمان ہوئے تھے ۔
صفوان بن امیہ رضی اللہ عنہ بھی ابتدا میں مسلمانوں کے سخت مخالف تھے ۔ وہ فتح مکہ کے بعد اسلام لائے تھے ۔ ایک روز انہوں نے حضرت ابو فکیہ رضی اللہ عنہ کو گرم ریت پر لٹا رکھا تھا ۔ ایسے میں حضرت ابوبکر صدیق رضی اللہ عنہ اس طرف سے گزرے ۔اس وقت صفوان بن امیہ رضی اللہ عنہ یہ الفاظ کہہ رہے تھے:
’’اسے ابھی اور عذاب دو، یہاں تک کہ محمد یہاں آکر اپنے جادو سے اسے نجات دلائیں ۔‘‘ 
حضرت ابوبکر صدیق رضی اللہ عنہ نے اسی وقت صفوان بن امیہ رضی اللہ عنہ سے انہیں خرید کر آزاد کردیا ۔ 
اسی طرح زنیرہ رضی اللہ عنہا نامی ایک عورت کو مسلمان ہونے کی بنیاد پر اس قدر خوفناک سزائیں دی گئیں کہ وہ بے چاری اندھی ہوگئیں، ایک روز ابوجہل نے ان سے کہا:
’’جو کچھ تم پر بیت رہی ہے، یہ سب لات و عزیٰ کر رہے ہیں۔‘‘
یہ سنتے ہی زنیرہ رضی اللہ عنہا نے کہا:
’’ہر گز نہیں، اللہ کی قسم، لات و عزیٰ نہ کوئی نفع پہنچا سکتے ہیں، نہ کوئی نقصان…یہ جو کچھ ہو رہا ہے، آسمان والے کی مرضی سے ہو رہا ہے۔میرے پروردگار کو یہ بھی قدرت ہے کہ وہ مجھے میری آنکھوں کی روشنی لوٹا دے۔‘‘
دوسرے دن وہ صبح اٹھیں تو ان کی آنکھوں کی روشنی اللہ تعالیٰ نے لوٹا دی تھی۔
اس بات کا جب کافروں کو پتا چلا تو تو وہ بول اٹھے:
’’یہ محمد کی جادوگری ہے۔‘‘
حضرت ابو بکر صدیق رضی اللہ عنہ نے انھیں بھی خرید کر آزاد کر دیا۔
آپ نے زنیرہ رضی اللہ عنہا کی بیٹی کو بھی خرید کر آزاد کیا۔ اسی طرح نہدیہ نام کی ایک باندی تھیں ۔ان کی ایک بیٹی بھی تھیں۔دونوں ولید بن مغیرہ کی باندیاں تھیں۔انھیں بھی حضرت ابو بکر رضی اللہ عنہ نے آزاد کر دیا۔
عامر بن فہیرہ کی بہن اور ان کی والدہ بھی ایمان لے آئی تھیں۔یہ حضرت عمر کے مسلمان ہونے سے پہلے ان کی باندیاں تھیں۔ حضرت ابو بکر صدیق رضی اللہ عنہ نے انھیں بھی خرید کر آزاد کر دیا۔
ایمان لانے والے جن لوگوں پر ظلم ڈھائے گئے۔ ان میں سے ایک حضرت خباب بن ارت رضی اللہ عنہ بھی ہیں۔کافروں نے انھیں اسلام سے پھیرنے کی کوششیں کیں مگر یہ ثابت قدم رہے۔انہیں جاہلیت کے زمانے میں گرفتار کیا گیا تھا، پھر انہیں ایک عورت ام انمار نے خرید لیا، یہ ایک لوہار تھے، نبی اکرم صلی اللہ علیہ و سلم ان کی دل جوئی فرماتے تھے۔ان کے پاس تشریف لے جایا کرتے تھے۔جب یہ مسلمان ہو گئے اور ام انمار کو یہ بات معلوم ہوئی تو اس نے انہیں بہت خوفناک سزائیں دیں۔ وہ لوہے کا کڑا لے کر آگ میں گرم کرتی۔ خوب سرخ کرتی۔پھر اس کو حضرت خباب رضی اللہ عنہ کے سر پر رکھ دیتی،آخر حضرت خباب رضی اللہ عنہ نے آپ صلی اللہ علیہ و سلم سے اپنی مصیبت کا ذکر کیا تو آپ نے ان کے لیے دعا فرمائی۔
نبی اکرم صلی اللہ علیہ و سلم کی دعا کے فوراً بعد اس عورت کے سر میں شدید درد شروع ہو گیا۔اس سے وہ کتوں کی طرح بھونکتی تھی، آخر کسی نے اسے علاج بتایا کہ وہ لوہا تپا کر سر پر رکھوائے، اس نے یہ کام حضرت خباب رضی اللہ عنہ کے ذمے لگایا۔اب آپ وہ حلقہ خوب گرم کر کے اس کے سر پر رکھتے۔

چاند دو ٹکڑے ہو گیا

حضرت خباب رضی اللہ عنہ فرماتے ہیں کہ ایک روز میں حضور نبی کریم صلی اللہ علیہ و سلم کی خدمت میں گیا اور یہ وہ زمانہ تھا جب ہم پر خوب ظلم کیا جاتا تھا، میں نے آپ صلی اللہ علیہ و سلم سے عرض کیا:
’’اے اللہ کے رسول، کیا آپ ہمارے لیے دعا نہیں فرماتے۔‘‘
میرے الفاظ سنتے ہی آپ سیدھے ہو کر بیٹھ گئے۔آپ کا چہرہ مبارک سرخ ہو گیا۔پھر آپ نے فرمایا:
’’تم سے پہلی امت کے لوگوں کو اپنے دین کے لیے کہیں زیادہ عذاب برداشت کرنے پڑے۔ ان کے جسموں پر لوہے کی کنگھیاں کی جاتی تھیں، جس سے ان کی کھال اور ہڈیاں الگ ہو جاتی تھیں، مگر یہ تکالیف بھی انہیں ان کے دین سے نہ ہٹا سکیں۔ ان کے سروں پر آرے چلا چلا کر ان کے جسم دو کر دیے گئے مگر وہ اپنا دین چھوڑنے پر تیار پھر بھی نہ ہوئے۔ اس دین اسلام کو اللہ تعالیٰ اس طرح پھیلا دے گا کہ صنعاء کے مقام سے حضر موت جانے والے سوار کو سوائے اللہ تعالیٰ کے کسی کا خوف نہیں ہو گا۔ یہاں تک کہ چرواہے کو اپنی بکریوں کے متعلق بھیڑیوں کا ڈر نہیں ہو گا۔‘‘
حضرت خباب بن ارت رضی اللہ عنہ فرماتے ہیں ایک دن میرے لیے آگ دہکائی گئی، پھر وہ آگ میری کمر پر رکھ دی گئی اور پھر اس کو اس وقت تک نہیں ہٹایا گیا جب تک کہ وہ آگ میری کمر کی چربی سے بجھ نہ گئی۔
ایسے ہی لوگوں میں حضرت عمار بن یاسر رضی اللہ عنہ بھی تھے، حضرت عمار بن یاسر رضی اللہ عنہ کو ان کے دین سے پھیرنے کے لیے مشرکوں نے طرح طرح کے ظلم کیے، آگ سے جلا جلا کر عذاب دیے، مگر وہ دین پر قائم رہے۔
علامہ ابن جوزی رحمہ اللہ لکھتے ہیں:
’’ایک مرتبہ آنحضرت صلی اللہ علیہ و سلم اس طرف تشریف لے جا رہے تھے۔ اس وقت حضرت عمار رضی اللہ عنہ کو آگ سے جلا جلا کر تکالیف پہنچائی جا رہی تھیں۔ ان کی کمر پر جلنے کی وجہ سے کوڑھ جیسے سفید داغ پڑ گئے تھے۔آنحضرت صلی اللہ علیہ و سلم نے ان کے سر پر ہاتھ پھیرا اور فرمایا:
’’اے آگ ٹھنڈی اور سلامتی والی بن جا، جیسا کہ تو ابراہیم علیہ السلام کے لیے ہو گئی تھی۔‘‘
اس دعا کے بعد انہیں آگ کی تکلیف محسوس نہیں ہوتی تھی۔
حضرت ام ہانی رضی اللہ عنہا کہتی ہیں کہ حضرت عمار بن یاسر، ان کے والد یاسر، ان کے بھائی عبداللہ اور ان کی والدہ سمیہ رضی اللہ عنہم، ان سبھی کو اللہ کا نام لینے کی وجہ سے سخت ترین عذاب دیے گئے۔ ایک روز جب انہیں تکالیف پہنچائی جا رہی تھیں تو نبی کریم صلی اللہ علیہ و سلم اس طرف سے گزرے، آپ نے ان کی تکالیف کو دیکھ کر فرمایا:
’’اے اللہ، آل یاسر کی مغفرت فرما۔‘‘
ان کی والدہ سمیہ رضی اللہ عنہا کو ابو جہل کے چچا حذیفہ بن ابن مغیرہ نے ابو جہل کے حوالے کر دیا۔یہ اس کی باندی تھیں۔ابو جہل نے انہیں نیزہ مارا۔اس سے وہ شہید ہو گئیں۔ اس طرح اسلام میں انہیں سب سے پہلی شہید ہونے کا اعزاز حاصل ہوا۔آخر انہی مظالم کی وجہ سے حضرت عمار رضی اللہ عنہ کے والد یاسر رضی اللہ عنہ بھی شہید ہو گئے۔ اپنے ان مظالم اور بدترین حرکات کے ساتھ ساتھ یہ لوگ حضور اکرم صلی اللہ علیہ وسلم سے معجزات کا مطالبہ بھی کرتے رہتے تھے۔
ایک روز ابو جہل دوسرے سرداروں کے ساتھ حضور نبی کریم صلی اللہ علیہ وسلم کے پاس آیا اور بولا:
’’اے محمد! اگر تم سچے ہو تو ہمیں چاند کے دو ٹکڑے کرکے دکھاؤ، وہ بھی اس طرح کہ ایک ٹکڑا ابو قبیس پہاڑ پر نظر آئے اور دوسرا قعیقعان پہاڑ پر نظر آئے۔‘‘
مطلب یہ تھا کہ دونوں ٹکڑے کافی فاصلے پر ہوں تاکہ اس کے دو ٹکڑے ہونے میں کوئی شک نہ رہ جائے۔
اس روز مہینے کی چودھویں تاریخ تھی۔ چاند پورا تھا۔ آپ صلی اللہ علیہ وسلم نے ان کی یہ عجیب فرمائش سن کر فرمایا:
’’اگر میں ایسا کر دکھاؤں تو کیا تم ایمان لے آؤ گے۔‘‘
انہوں نے ایک زبان ہو کر کہا:
’’ہاں!بالکل! ہم ایمان لے آئیں گے۔‘‘
آپ صلی اللہ علیہ وسلم نے اللہ تعالیٰ سے دعا فرمائی کہ آپ کے ہاتھ سے ایسا ہوجائے،چنانچہ چاند فوراً دو ٹکڑے ہوگیا۔ اس کا ایک حصہ ابوقبیس کے پہاڑ کے اوپر نظر آیا، دوسرا قعیقعان پہاڑ پر، اس وقت نبی کریم صلی اللہ علیہ وسلم نے ارشاد فرمایا:
’’لو اب گواہی دو۔‘‘
ان کے دلوں پر تو قفل پڑے تھے، کہنے لگے:
’’محمد نے ہم لوگوں کی آنکھوں پر جادو کردیا ہے۔‘‘
کچھ نے کہا:
’’محمد نے چاند پر جادو کردیا ہے مگر ان کے جادو کا اثر ساری دنیا کے لوگوں پر نہیں ہو سکتا۔‘‘
مطلب یہ تھا کہ ہر جگہ کے لوگ چاند کو دو ٹکڑے نہیں دیکھ رہے ہوں گے۔ اب انہوں نے کہا:
’’ہم دوسرے شہروں سے آنے والوں سے یہ بات پوچھیں گے۔‘‘
چنانچہ جب مکہ میں دوسرے شہروں کے لوگ داخل ہوئے تو انہوں نے چاند کے بارے میں ان سے پوچھا، آنے والے سب لوگوں نے یہی کہا:
’’ ہاں! ہم نے بھی چاند کو دو ٹکڑے ہوتے دیکھا ہے۔‘‘
یہ سنتے ہی مشرک بول اٹھے:
’’بس! پھر تو یہ عام جادو ہے، اس کا اثر سب پر ہوا ہے۔‘‘
کچھ نے کہا:
’’یہ ایک ایسا جادو ہے جس سے جادوگر بھی متاثر ہوئے ہیں۔‘‘
یعنی جادوگروں کو بھی چاند دو ٹکڑے نظر آیا ہے۔ 
اس پر اللہ تعالیٰ نے سورہ قمر کی آیات نازل فرمائی:
ترجمہ:’’ قیامت نزدیک آ پہنچی اور چاند شق ہوگیا اور یہ لوگ کوئی معجزہ دیکھتے ہیں تو ٹال دیتے ہیں اور کہتے ہیں، یہ جادو ہے جو ابھی ختم ہو جائے گا۔‘‘
مختلف قوموں کی تاریخ سے یہ بات ثابت ہوتی ہے کہ چاند کا دو ٹکڑے ہونا صرف مکہ میں نظر نہیں آیا تھا بلکہ دوسرے ملکوں میں بھی اس کا مشاہدہ کیا گیا تھا۔ 
اسی طرح ایک دن مشرکین نے کہا:
’’اگر آپ واقعی نبی ہیں تو ان پہاڑوں کو ہٹادیجئے جن کی وجہ سے ہمارا شہر تنگ ہورہا ہے۔ تاکہ ہماری آبادیاں پھیل کر بس جائیں۔ اور اپنے رب سے کہہ کر ایسی نہریں جاری کرادیں جیسی شام اور عراق میں ہیں اور ہمارے باپ دادوں کو دوبارہ زندہ کراکے دکھائیں۔ ان دوبارہ زندہ ہونے والوں میں قصی بن کلاب ضرور ہو، اس لئے کہ وہ نہایت دانا اور عقل مند بزرگ تھا۔ ہم اس سے پوچھیں گے، آپ جو کچھ کہتے ہیں، سچ ہے یا جھوٹ، اگر ہمارے ان بزرگوں نے آپ کی تصدیق کردی اور آپ نے ہمارے یہ مطالبے پورے کردیئے تو ہم آپ کی نبوت کا اقرار کرلیں گے اور جان لیں گے کہ آپ واقعی اللہ کی طرف سے بھیجے ہوئے ہیں، اللہ تعالیٰ نے آپ کو ہماری طرف رسول بنا کر بھیجا ہے…جیسا کہ آپ دعویٰ کرتے ہیں۔‘‘
ان کی یہ باتیں سن کر نبی کریم صلی اللہ علیہ وسلم نے ارشاد فرمایا:
’’مجھے ان باتوں کے لئے تمہاری طرف رسول بنا کر نہیں بھیجا گیا بلکہ میں تو اس مقصد کے لیے بھیجا گیا ہوں کہ ایک اللہ کی عبادت کرو۔‘‘

مشرکین کے مطالبات

ایک مشرک کہنے لگا:
’’آپ اسی طرح کھانا کھاتے ہیں جس طرح ہم کھاتے ہیں، اسی طرح بازاروں میں چلتے ہیں جس طرح ہم چلتے ہیں، ہماری طرح ہی زندگی کی ضروریات پوری کرتے ہیں، لہٰذا آپ کو کیا حق ہے کہ نبی کہہ کر خود کو نمایاں کریں اور یہ کہ آپ کے ساتھ کوئی فرشتہ کیوں نہیں اترا جو آپ کی تصدیق کرتا۔‘‘
اس پر اللہ تعالیٰ نے سورہ فرقان کی آیت 7 نازل فرمائی:
ترجمہ:’’ اور یہ کافر لوگ رسول اللہ صلی اللہ علیہ وسلم کی نسبت یوں کہتے ہیں کہ اس رسول کو کیا ہوگیا ہے کہ وہ ہماری طرح کھانا کھاتا ہے اور بازاروں میں چلتا پھرتا ہے۔ اس کے ساتھ کوئی فرشتہ کیوں نہیں بھیجا گیا کہ وہ اس کے ساتھ رہ کر ڈرایا کرتا۔ اس کے پاس غیب سے کوئی خزانہ آ پڑتا یا اس کے پاس کوئی (غیبی) باغ ہوتا جس سے یہ کھایا کرتا اور ایمان لانے والوں سے یہ ظالم لوگ یہ بھی کہتے ہیں کہ تم تو ایک بے عقل آدمی کی راہ پر چل رہے ہو۔‘‘
پھر جب انہوں نے یہ کہا کہ اللہ تعالیٰ کی ذات اس سے بہت بلند ہے کہ وہ ہم ہی میں سے ایک بندے کو رسول بنا کر بھیجے تو اس پر اللہ تعالیٰ نے سورہ یونس کی آیت نازل فرمائی:
’’ترجمہ: کیا ان مکہ کے لوگوں کو اس بات سے تعجب ہوا کہ ہم نے ان میں سے ایک شخص کے پاس وحی بھیج دی کہ سب آدمیوں کو اللہ کے احکامات کے خلاف چلنے پر ڈرائیں اور جو ایمان لے آئے، انہیں خوش خبری سنادیں کہ انہیں اپنے رب کے پاس پہنچ کر پورا رتبہ ملے گا۔‘‘
اس کے بعد ان لوگوں نے آپ صلی اللہ علیہ وسلم سے کہا: 
’’ہم پر آسمان کے ٹکڑے ٹکڑے کر کے گرادو، جیسا کہ تمہارا دعویٰ ہے کہ تمہارا رب جو چاہے کر سکتا ہے۔ہمیں معلوم ہوا ہے کہ تم جس رحمن کا ذکر کرتے ہو وہ رحمن یمامہ کا ایک شخص ہے، وہ تمہیں یہ باتیں سکھاتا ہے، ہم لوگ اللہ کی قسم! کبھی رحمن پر ایمان نہیں لائیں گے۔‘‘
یہاں رحمن سے ان لوگوں کی مراد یمامہ کے ایک یہودی کاہن سے تھی۔ اس بات کے جواب میں اللہ تعالیٰ نے سورۃ الرعد کی آیت 30 نازل فرمائی:
ترجمہ:’’ آپ فرمادیجئے کہ وہی میرا مربی اور نگہبان ہے۔ اس کے سوا کوئی عبادت کے قابل نہیں، میں نے اسی پر بھروسہ کر لیا اور اسی کے پاس مجھے جانا ہے۔‘‘
اس وقت آپ پر رنج اور غم کی کیفیت طاری تھی۔ آپ کی عین خواہش تھی کہ وہ لوگ ایمان قبول کرلیں، لیکن ایسا نہ ہوسکا، اس لئے غمگین تھے، اسی حالت میں آپ وہاں سے اٹھ گئے۔
مشرکین نے اس قسم کی اور بھی فرمائشیں کیں۔ کبھی وہ کہتے صفا پہاڑ کو سونے کا بناکر دکھائیں، کبھی کہتے سیڑھی کے ذریعے آسمان پر چڑھ کر دکھائیں اور فرشتوں کے ساتھ واپس آئیں۔ ان کی تمام باتوں کے جواب میں اللہ تعالیٰ نے حضرت جبرئیل علیہ السلام کو آپ کی خدمت میں بھیجا۔ انہوں نے آکر کہا:
’’اے محمد صلی اللہ علیہ وسلم! اللہ تعالیٰ آپ کو سلام فرماتے ہیں اور فرماتے ہیں کہ اگر آپ چاہیں تو صفا پہاڑ کو سونے کا بنادیا جائے۔ اسی طرح ان کے جو مطالبات ہیں، ان کو بھی پورا کر دیا جائے، لیکن اس کے بعد بھی اگر یہ لوگ ایمان نہ لائے تو پھر سابقہ قوموں کی طرح ان پر ہولناک عذاب نازل ہوگا، ایسا عذاب کہ آج تک کسی قوم پر نازل نہیں ہوا ہوگا اور اگر آپ ایسا نہیں چاہتے تو میں ان پر رحمت اور توبہ کا دروازہ کھلا رکھوں گا۔‘‘
یہ سن کر آپ نے عرض کیا:
’’باری تعالیٰ! آپ اپنی رحمت اور توبہ کا دروازہ کھلا رکھیں۔‘‘
دراصل آپ جانتے تھے کہ قریش کے یہ مطالبات جہالت کی بنیاد پر ہیں، کیونکہ یہ لوگ رسولوں کو بھیجنے کی حکمت کو نہیں جانتے تھے…رسولوں کا بھیجا جانا تو در اصل مخلوق کا امتحان ہوتا ہے تاکہ وہ رسولوں کی تصدیق کریں اور رب تعالیٰ کی عبادت کریں۔ اگر اللہ تعالیٰ درمیان سے سارے پردے ہٹادے اور سب لوگ آنکھوں سے سب کچھ دیکھ لیں تو پھر تو انبیاء اور رسولوں کو بھیجنے کی ضرورت ہی باقی نہیں رہتی اور غیب پر ایمان لانے کا کوئی معنی ہی نہیں رہتا۔
مکہ کے مشرکین نے دو یہودی عالموں کے پاس اپنے آدمی بھیجے۔ یہ یہودی عالم مدینہ میں رہتے تھے۔ دونوں قاصدوں نے یہودی عالموں سے ملاقات کی اور ان سے کہا: 
’’ہم آپ کے پاس اپنا ایک معاملہ لے کر آئے ہیں، ہم لوگوں میں ایک یتیم لڑکا ہے، اس کا دعویٰ ہے کہ وہ اللہ کا رسول ہے۔‘‘
یہ سن کر یہودی عالم بولے:
’’ہمیں اس کا حلیہ بتاؤ۔‘‘
قاصدوں نے نبی اکرم صلی اللہ علیہ وسلم کا حلیہ بتادیا۔ تب انہوں نے پوچھا:
’’تم لوگوں میں سے کن لوگوں نے ان کی پیروی کی ہے؟‘‘
انہوں نے جواب دیا:
’’کم درجے کے لوگوں نے۔‘‘
اب انہوں نے کہا:
’’تم جاکر ان سے تین سوال کرو، اگر انہوں نے ان تین سوالات کے جوابات دے دیے تو وہ اللہ کے نبی ہیں اور اگر جواب نہ دے سکے تو پھر سمجھ لینا، وہ کوئی جھوٹا شخص ہے۔

تین سوال

پہلے ان سے ان نوجوانوں کے بارے میں سوال کرو جو پچھلے زمانے میں کہیں نکل گئے تھے۔ یعنی اصحاب کہف کے بارے میں پوچھو کہ ان کا کیا واقعہ تھا۔ اس لئے کہ ان کا واقعہ نہایت عجیب و غریب ہے، ہماری پرانی کتابوں کے علاوہ اس واقعے کا ذکر کہیں نہیں ملے گا…اگر وہ نبی ہیں تو اللہ تعالیٰ کی طرف سے خبر پاکر ان کے بارے میں بتادیں گے…ورنہ نہیں بتا سکیں گے۔
پھر ان سے یہ پوچھنا کہ سکندر ذو القرنین کون تھا، اس کا کیا قصہ ہے۔ پھر ان سے روح کے بارے میں پوچھنا کہ وہ کیا چیز ہے۔ اگر انہوں نے پہلے دونوں سوالوں کا جواب دے دیا اور ان کا واقعہ بتادیا اور تیسرے سوال یعنی روح کے بارے میں بتادیا تو تم لوگ سمجھ لینا کہ وہ سچے نبی ہیں، اس صورت میں تم ان کی پیروی کرنا۔‘‘
یہ لوگ یہ تین سوالات لے کر واپس مکہ آئے اور قریش سے کہا:
’’ہم ایسی چیز لے کر آئے ہیں کہ اس سے ہمارے اور محمد کے درمیان فیصلہ ہو جائے گا۔‘‘
اس کے بعد انہوں نے ان سب کو تفصیل سنائی۔ اب یہ مشرکین حضور نبی کریم صلی اللہ علیہ وسلم کے پاس آئے۔ انہوں نے آپ سے کہا:
’’اے محمد! اگر آپ اللہ کے سچے رسول ہیں تو ہمارے تین سوالات کے جوابات بتادیں، ہمارا پہلا سوال یہ ہے کہ اصحاب کہف کون تھے؟ دوسرا سوال ہے کہ ذوالقرنین کون تھے؟ اور تیسرا سوال ہے کہ روح کیا چیز ہے؟‘‘
آپ نے ان کے سوالات سن کر فرمایا:
’’میں ان سوالات کے جوابات تمہیں کل دوں گا۔‘‘
نبی اکرم صلی اللہ علیہ وسلم نے اس جملے میں ان شاء اللہ نہ فرمایا، یعنی یہ نہ فرمایا، ان شاء اللہ میں تمہیں کل جواب دوں گا۔ قریش آپ کا جواب سن کر واپس چلے گئے۔ آنحضرت صلی اللہ علیہ وسلم وحی کا انتظار کرنے لگے، لیکن وحی نہ آئی۔ دوسرے دن وہ لوگ آگئے، آپ انہیں کوئی جواب نہ دے سکے، وہ لوگ لگے باتیں کرنے۔ انہوں نے یہ تک کہہ دیا:
’’محمد کے رب نے انہیں چھوڑدیا۔‘‘
ان لوگوں میں ابو لہب کی بیوی ام جمیل بھی تھی۔ اس نے بھی یہ الفاظ کہے:
’’میں دیکھتی ہوں کہ تمہارے مالک نے تمہیں چھوڑ دیا ہے اور تم سے ناراض ہو گیا ہے۔‘‘
نبی اکرم صلی اللہ علیہ وسلم کو قریش کی یہ باتیں بہت شاق گزریں۔ آپ بہت پریشان اور غمگین ہو گئے۔ آخر جبرئیل علیہ السلام سورہ کہف لے کر نازل ہوئے۔ اللہ تعالیٰ کی طرف سے آپ کو ہدایت کی گئی:
’’اور آپ کسی کام کی نسبت یوں نہ کہا کیجئے کہ اس کو کل کردوں گا مگر اللہ کے چاہنے کو ملا لیا کیجئے (یعنی ان شاء اللہ کہا کیجئے) آپ بھول جائیں تو اپنے رب کا ذکر کیا کیجئے اور کہہ دیجئے کہ مجھے امید ہے میرا رب مجھے (نبوت کی دلیل بننے کے اعتبار سے) اس سے بھی نزدیک تر بات بتادے گا۔‘‘ (سورہ کہف)
مطلب یہ تھا کہ جب آپ یہ کہیں کہ آئندہ فلاں وقت پر میں یہ کام کروں گا تو اس کے ساتھ ان شاء اللہ ضرور کہا کریں۔ اگر آپ اس وقت اپنی بات کے ساتھ ان شاء اللہ ملانا بھول جائیں اور بعد میں یاد آجائے تو اس وقت ان شاء اللہ کہہ دیا کریں۔ اس لئے کہ بھول جانے کے بعد یاد آنے پر وہ ان شاء اللہ کہہ دینا بھی ایسا ہے جیسے گفتگو کے ساتھ کہہ دینا ہوتا ہے۔
اس موقعے پر وحی میں دیر اسی بنا پر ہوئی تھی کہ آپ نے ان شاء اللہ نہیں کہا تھا۔ جب جبرئیل علیہ السلام سورہ کہف لے کر آئے تو آپ نے ان سے پوچھا تھا:
’’جبرئیل! تم اتنی مدت میرے پاس آنے سے رکے رہے، اس سے تشویش پیدا ہونے لگی تھی۔‘‘
جواب میں حضرت جبرئیل علیہ السلام نے عرض کیا:
’’ہم آپ کے رب کے حکم کے بغیر نہ ایک زمانے سے دوسرے زمانے میں داخل ہو سکتے ہیں،نہ ایک جگہ سے دوسری جگہ جا سکتے ہیں، ہم تو صرف اس کے حکم پر عمل کرتے ہیں، اور یہ جو کفار کہہ رہے ہیں کہ آپ کے رب نے آپ کو چھوڑ دیا ہے تو آپ کے رب نے آپ کو ہرگز نہیں چھوڑا بلکہ یہ سب اس کی حکمت کے مطابق ہوا ہے۔‘‘
پھر حضرت جبرئیل علیہ السلام نے آپ کو اصحاب کہف کے بارے میں بتایا۔ ذوالقرنین کے بارے میں بتایا اور پھر روح کے بارے وضاحت کی۔ 
اصحاب کہف کی تفصیل تفسیر ابن کثیر کے مطابق یوں ہے:
’’وہ چند نو جوان تھے، دین حق کی طرف مائل ہوگئے تھے اور راہ ہدایت پر آگئے تھے۔ یہ نوجوان پرہیزگار تھے۔ اپنے رب کو معبود مانتے تھے یعنی توحید کے قائل تھے۔ ایمان میں روز بروز بڑھ رہے تھے اور یہ لوگ حضرت عیسیٰ علیہ السلام کے دین پر تھے۔ لیکن بعض روایات سے یہ بھی معلوم ہوتا ہے کہ یہ واقعہ حضرت عیسیٰ علیہ السلام سے پہلے کا ہے، اس لئے کہ یہ سوال یہودیوں نے پوچھے تھے اور اس کا مطلب ہے کہ یہودیوں کی کتابوں میں یہ واقعہ موجود تھا۔ اس سے یہی ثابت ہوتا ہے کہ یہ واقعہ حضرت عیسیٰ علیہ السلام سے پہلے کا ہے۔
قوم نے ان کی مخالفت کی۔ ان لوگوں نے صبر کیا۔ اس زمانے کے بادشاہ کا نام دقیانوس تھا۔ وہ مشرک تھا،اس نے سب کو شرک پر لگا رکھا تھا۔ تھا بھی بہت ظالم۔ بت پرستی کراتا تھا۔ وہاں سالانہ میلہ لگتا تھا۔ یہ نوجوان اپنے ماں باپ کے ساتھ اس میلے میں گئے۔ وہاں انہوں نے بت پرستی ہوتے دیکھی۔ یہ وہاں سے بیزار ہو کر نکل آئے اور سب ایک درخت کے نیچے جمع ہوگئے۔ اس سے پہلے یہ لوگ الگ الگ تھے۔ ایک دوسرے کو جانتے نہیں تھے۔ آپس میں بات چیت شروع ہوئی تو معلوم ہوا، یہ سب بت پرستی سے بیزار ہو کر میلے سے چلے آئے ہیں۔ اب یہ آپس میں گھل مل گئے۔ انہوں نے اللہ کی عبادت کے لئے ایک جگہ مقرر کرلی۔ رفتہ رفتہ مشرک قوم کو ان کے بارے میں پتا چل گیا، وہ انہیں پکڑ کر بادشاہ کے پاس لے گئے۔ بادشاہ نے ان سے سوالات کئے تو انہوں نے نہایت دلیری سے شرک سے بری ہونے کا اعلان کیا۔ بادشاہ اور درباریوں کو بھی توحید کی دعوت دی۔ انہوں نے صاف کہہ دیا، ہمارا رب وہی ہے جو آسمان اور زمین کا خالق ہے اور یہ ناممکن ہے کہ ہم اس کے سوا کسی اور کی عبادت کریں۔
ان کی اس صاف گوئی پر بادشاہ بگڑا۔ اس نے انہیں ڈرایا دھمکایا اور کہا کہ اگر یہ باز نہ آئے تو میں انہیں سخت سزا دوں گا۔
بادشاہ کا حکم سن کر ان میں کوئی کمزوری پیدا نہ ہوئی، ان کے دل اور مضبوط ہوگئے لیکن ساتھ ہی انہوں نے محسوس کرلیا کہ یہاں رہ کر وہ اپنی دین داری پر قائم نہیں رہ سکیں گے۔ اس لئے انہوں نے سب کو چھوڑ کر وہاں سے نکلنے کا ارادہ کر لیا۔ جب یہ لوگ اپنے دین کو بچانے کے لئے قربانی دینے پر تیار ہوگئے تو ان پر اللہ تعالیٰ کی رحمت نازل ہوئی۔ ان سے فرما دیاگیا:
’’جاؤ تم کسی غار میں پناہ حاصل کرو ۔تم پر تمہارے رب کی رحمت ہوگی اور وہ تمہارے کام میں آسانی اور راحت مہیا فرماوے گا۔‘‘
پس یہ لوگ موقع پاکر وہاں سے بھاگ نکلے اور ایک پہاڑ کے غار میں چھپ گئے۔ قوم نے انہیں ہر طرف تلاش کیا، لیکن وہ نہ ملے…اللہ تعالیٰ نے انہیں ان کے دیکھنے سے عاجز کردیا…بالکل اسی قسم کا واقعہ حضور نبی کریم صلی اللہ علیہ وسلم کے ساتھ پیش آیا تھا جب آپ نے حضرت ابو بکر صدیق رضی اللہ عنہ کے ساتھ غار ثور میں پناہ لی تھی، لیکن مشرکین غار کے منہ تک آنے کے باوجود آپ کو نہیں دیکھ سکے تھے۔
اس واقعے میں بھی چند روایات میں تفصیل اس طرح ہے کہ بادشاہ کے آدمیوں نے ان کا تعاقب کیا تھا اور غار تک پہنچ گئے تھے، لیکن غار میں وہ ان لوگوں کو نظر نہیں آئے تھے۔ قرآن کریم کا اعلان ہے کہ اس غار میں صبح و شام دھوپ آتی جاتی ہے۔ 
یہ غار کس شہر کے کس پہاڑ میں ہے، یہ یقینی طور پر کسی کو معلوم نہیں…پھر اللہ تعالیٰ نے ان پر نیند طاری کردی۔ اللہ تعالیٰ انہیں کروٹیں بدلواتے رہے۔ ان کا کتا بھی غار میں ان کے ساتھ تھا۔
اللہ تعالیٰ نے جس طرح اپنی قدرت کاملہ سے انہیں سلادیا تھا، اسی طرح انہیں جگادیا۔ وہ تین سو نو سال تک سوتے رہے تھے۔ اب تین سو نو سال بعد جاگے تو بالکل ایسے تھے جیسے ابھی کل ہی سوئے تھے۔

لوہے کی دیوار

ان کے بدن، کھال، بال، غرض ہر چیز بالکل صحیح سلامت تھی۔یعنی جیسے سوتے وقت تھے، بالکل ویسے ہی تھے۔کسی قسم کی کوئی تبدیلی واقع نہیں ہوئی تھی۔وہ آپس میں کہنے لگے: 
’’ کیوں بھئی! بھلا ہم کتنی دیر تک سوتے رہے ہیں؟ ‘‘
ایک نے جواب دیا: 
’’ایک دن یا اس سے بھی کم ۔‘‘ 
یہ بات اس نے اس لیے کہی تھی کہ وہ صبح کے وقت سوئے تھے اور جب جاگے تو شام کا وقت تھا۔اس لیے انہوں نے یہی خیال کیا کہ وہ ایک دن یا اس سے کم سوئے ہیں۔پھر ایک نے یہ کہہ کر بات ختم کردی: 
’’اس کا درست علم تو اللہ کو ہے۔‘‘ 
اب انہیں شدید بھوک پیاس کا احساس ہوا۔انہوں نے سوچا، بازار سے کھانا منگوانا چاہیے۔پیسے ان کے پاس تھے۔ان میں سے کچھ وہ اللہ کے راستے میں خرچ کرچکے تھے، کچھ ان کے پاس باقی تھے۔ایک نے کہا: 
’’ہم میں سے کوئی پیسے لے کر بازار چلاجائے اور کھانے کی کوئی پاکیزہ اور عمدہ چیز لے آئے اور جاتے ہوئے اور آتے ہوئے اس بات کا خیال رکھے کہ کہیں لوگوں کی نظر اس پر نہ پڑ جائے۔سودا خریدتے وقت بھی ہوشیاری سے کام لے۔کسی کی نظروں میں نہ آئے۔اگر انہیں ہمارے بارے میں معلوم ہوگیا تو ہماری خیر نہیں۔دقیانوس کے آدمی ابھی تک ہمیں تلاش کرتے پھررہے ہوں گے۔‘‘
چنانچہ ان میں سے ایک غار سے باہر نکلا، اسے سارا نقشہ ہی بدلا نظر آیا۔اب اسے کیا معلوم تھا کہ وہ تین سو نو سال تک سوتے رہے ہیں۔اس نے دیکھا کوئی چیز اپنے پہلے حال پر نہیں تھی۔شہر میں کوئی بھی اسے جانا پہچانا نظر نہ آیا۔یہ حیران تھا، پریشان تھا اور ڈرے ڈرے انداز میں آگے بڑھ رہا تھا۔اس کا دماغ چکرارہا تھا، سوچ رہاتھا، کل شام تو ہم اس شہر کو چھوڑ کر گئے ہیں پھر یہ اچانک کیا ہوگیاہے۔جب زیادہ پریشان ہوا تو اس نے اپنے دل میں فیصلہ کیا، مجھے جلد از جلد سودا لیکر اپنے ساتھیوں کے پاس پہنچ جانا چاہیے۔آخر وہ ایک دکان پر پہنچا، دکان دار کو پیسے دیے اور کھانے پینے کا سامان طلب کیا۔دکان دار اس سکے کو دیکھ کر حیرت زدہ رہ گیا۔اس نے وہ سکہ ساتھ والے دکان دار کو دکھایا اور بولا: 
’’بھائی ذرا دیکھنا! یہ سکہ کس زمانے کا ہے؟‘‘ 
اس نے دوسرے کو دیا۔اس طرح سکہ کئی ہاتھوں میں گھوم گیا۔کئی آدمی وہاں جمع ہوگئے۔آخر انہوں نے اس سے پوچھا: 
’’تم یہ سکہ کہاں سے لائے ہو؟ تم کس ملک کے رہنے والے ہو؟‘‘ 
جواب میں اس نے کہا: 
’’میں تو اسی شہر کا رہنے والا ہوں، کل شام ہی کو تو یہاں سے گیا ہوں، یہاں کا بادشاہ دقیانوس ہے۔‘‘
وہ سب اس کی بات سن کر ہنس پڑے اور بولے: 
’’یہ تو کوئی پاگل ہے، اسے پکڑ کر بادشاہ کے پاس لے چلو۔‘‘
آخر اسے بادشاہ کے سامنے پیش کیا گیا۔وہاں اس سے سوالات ہوئے۔اس نے تمام حال کہہ سنایا۔
بادشاہ اور سب لوگ اس کی کہانی سن کر حیرت زدہ رہ گئے۔آخر انہوں نے کہا:
’’ اچھا ٹھیک ہے۔تم ہمیں اپنے ساتھیوں کے پاس لے چلو…وہ غار ہمیں بھی دکھاؤ۔‘‘
چنانچہ سب لوگ اس کے ساتھ غار کی طرف روانہ ہوئے۔ان نوجوانوں سے ملے اور انہیں بتایا کہ دقیانوس کی بادشاہت ختم ہوئے تین صدیاں بیت چکی ہیں اور اب یہاں اللہ کے نیک بندوں کی حکومت ہے۔بہرحال ان نوجوانوں نے اپنی بقیہ زندگی اسی غار میں گزاری اور وہیں وفات پائی۔بعد میں لوگوں نے ان کے اعزاز کے طورپر پہاڑ کی بلندی پر ایک مسجد تعمیر کی تھی۔ایک روایت یہ بھي ہے کہ جب شہر جانے والا پہلا نوجوان لوگوں کو لیکر غار کے قریب پہنچا تو اس نے کہا: 
’’تم لوگ یہیں ٹھہرو، میں جاکر انہیں خبر کردوں۔‘‘
اب یہ ان سے الگ ہوکر غار میں داخل ہوگیا۔ساتھ ہی اللہ تعالیٰ نے ان پر پھر نیند طاری کردی؛؛؛بادشاہ اور اس کے ساتھی اسے تلاش کرتے رہ گئے…نہ وہ ملا اور نہ ہی وہ غار انہیں نظر آیا، اللہ تعالیٰ نے ان کی نظروں سے غار کو اور ان سب کو چھپادیا۔
ان کے بارے میں لوگ خیال ظاہر کرتے رہے کہ وہ سات تھے، آٹھواں ان کا کتا تھا، یا وہ نو تھے، دسواں ان کا کتا تھا۔بہرحال ان کی گنتی کا صحیح علم اللہ ہی کو ہے۔
اللہ تعالیٰ نے اپنے نبیﷺ سے ارشاد فرمایا: 
’’ان کے بارے میں زیادہ بحث نہ کریں اور نہ ان کے بارے کسی سے دریافت کریں (کیونکہ ان کے بارے میں لوگ اپنی طرف سے باتیں کرتے ہیں۔کوئی صحیح دلیل ان کے پاس نہیں) مشرکین کا دوسرا سوال تھا، ذوالقرنین کون تھا۔ذوالقرنین کے بارے تفصیلات یوں ملتی ہیں:
ذوالقرنین ایک نیک، خدا رسیدہ اور زبردست بادشاہ تھا۔ انہوں نے تین بڑی مہمات سر کیں، پہلی مہم میں وہ اس مقام تک پہنچے، جہاں سورج غروب ہوتا ہے، یہاں انہیں ایک ایسی قوم ملی جس کے بارے میں اللہ نے انہیں اختیار دیا کہ چاہیں تو اس قوم کو سزا دیں، چاہیں تو ان کے ساتھ نیک سلوک کریں۔
ذولقرنین نے کہا :
’’ جو شخص ظالم ہے، ہم اسے سزا دیں گے اور مرنے کے بعد اللہ تعالیٰ بھی اسے سزا دیں گے، البتہ مومن بندوں کونیک بدلہ ملے گا۔‘‘
دوسری مہم میں وہ اس مقام تک پہنچے جہاں سے سورج طلوع ہوتا ہے، وہاں انہیں ایسے لوگ ملے، جن کے مکانات کی کوئی چھت وغیرہ نہیں تھی۔ تیسری مہم میں وہ دو گھاٹیوں کے درمیان پہنچے، یہاں کے لوگ ان کی بات نہیں سمجھتے تھے۔انہوں نے اشاروں میں یا ترجمان کے ذریعے یاجوج ماجوج کی تباہ کاریوں کا شکوہ کرتے ہوئے ان سے درخواست کی کہ وہ ان کے اور یاجوج ماجوج کے درمیان بند بنادیں۔ ذوالقرنین نے لوہے کی چادریں منگوائیں۔ پھر ان سے ایک دیوار بنادی۔ اس میں تانبا پگھلا کر ڈالا گیا۔ اس کام کے ہونے پر ذوالقرنین نے کہا: 
’’ یہ اللہ کا فضل ہے کہ مجھ سے اتنا بڑا کام ہوگیا۔‘‘
قیامت کے قریب یاجوج ماجوج اس دیوار کو توڑنے میں کامیاب ہوجائیں گے۔
ذوالقرنین کے بارے میں مختلف وضاحتیں کتابوں میں ملتی ہیں۔ قرنین کے معنی دو سمتوں کے ہیں۔ ذوالقرنین دنیا کے دو کناروں تک پہنچے تھے اس لئے انہیں ذوالقرنین کہا گیا۔ 
بعض نے قرن کے معنی سینگ کے لیے ہیں، یعنی دو سینگوں والے۔ ان کا نام سکندر تھا۔لیکن یہ یونان کے سکندر نہیں ہیں جسے سکندراعظم کہا جاتا ہے۔ یونانی سکندر کافر تھا جبکہ یہ مسلم اور ولی اللہ تھے۔ یہ سام بن نوح علیہ السلام کی اولاد میں سے تھے۔ خضر علیہ السلام ان کی فوج کا جھنڈا اٹھانے والے تھے۔تیسرے سوال یعنی روح کے بارے میں اللہ تعالیٰ نے ارشاد فرمایا: 
’’ یہ لوگ آپ سے روح کے بارے میں پوچھتے ہے، آپ فرمادیجیے کہ روح میرے رب کے حکم سے قائم ہے۔‘‘ یعنی روح کی حقیقت اسی کے علم میں ہے، اس کے سوا اس کے بارے میں کوئی نہیں جانتا۔
روح کے بارے میں یہودیوں کی کتابوں میں بھی بالکل یہی بات درج تھی کہ روح اللہ کے حکم سے قائم ہے۔ اس کا علم اللہ ہی کے پاس ہے اور اس نے اپنے سوا کسی کو نہیں دیا۔ یہودیوں نے مشرکوں سے پہلے ہی کہہ دیا تھا کہ اگر انہوں نے روح کے متعلق کچھ بتایا تو سمجھ لینا، وہ نبی نہیں ہیں۔ اگر صرف یہ کہا کہ روح اللہ کے حکم سے قائم ہے تو سمجھ لینا کہ وہ سچے نبی ہیں۔ آپ نے بالکل یہی جواب ارشاد فرمایا۔
لگے ہاتھوں یہاں ایک واقعہ بھی سن لیں، جب مسلمانوں نے ہندوستان فتح کیا تو ہندو مذہب کا ایک عالم مسلمان عالموں سے مناظرہ کرنے کے لیے آیا۔ اس نے مطالبہ کیا: 
’’میرے مقابلے میں کسی عالم کو بھیجو، اس پر لوگوں نے امام رکن الدین کی طرف اشارہ کیا۔

حق دلوادیا

اب اس ہندوستانی نے ان سے پوچھا: 
’’ تم کس کی عبادت کرتے ہوں۔‘‘
انہوں نے جواب دیا: 
’’ ہم اس اللہ کی عبادت کرتے ہیں جو سامنے نہیں ہے۔‘‘
اس پر اس ہندی عالم نے پوچھا: 
’’ تمہیں اس کی خبر کس نے دی۔ ‘‘
امام رکن الدین بولے: 
’’ حضرت محمد صلی اللہ علیہ وسلم نے۔‘‘
اس پر اس ہندی نے کہا: 
’’ تمہارے پیغمبر نے روح کے بارے میں کیا کہا ہے۔‘‘
امام بولے:
’’یہ روح میرے رب کے حکم سے قائم ہے۔‘‘
اس پر اس ہندی عالم نے کہا:
’’ تم سچ کہتے ہو۔‘‘
پھر وہ مسلمان ہوگیا۔
۔۔۔
ایک روز حضور نبی کریم صلی اللہ علیہ وسلم اپنے چند صحابہ رضی اللہ عنہم کے ساتھ مسجد حرام میں تشریف فرما تھے۔ایسے میں قبیلہ زبید کا ایک شخص وہاں آیا۔اس وقت نزدیک ہی قریش مکہ بھی مجمع لگائے وہاں بیٹھے تھے۔ قبیلہ زبید کا وہ شخص ان کے نزدیک گیا اور اردگرد گھومنے لگا۔پھر اس نے کہا: 
’’اے قریش! کوئی شخص کیسے تمہارے علاقے میں داخل ہوسکتا ہے اور کوئی تاجر کیسے تمہاری سرزمین پر آسکتا ہے جبکہ تم ہر آنے والے پر ظلم کرتے ہو؟‘‘
یہ کہتے ہوئے جب وہ اس جگہ پہنچا جہاں آپ صلی اللہ علیہ وسلم تشریف فرما تھے تو آپ نے اس سے فرمایا: 
’’ تم پر کس نے ظلم کیا۔‘‘
اس نے بتایا: 
’’ میں اپنے اونٹوں میں سے تین بہترین اونٹ بیچنے کے لیے لے کر آیا تھا مگر ابوجہل نے یہاں ان تینوں اونٹوں کی اصل قیمت سے صرف ایک تہائی قیمت لگائی۔اور ایسا اس نے جان بوجھ کر کیا، کیونکہ وہ جانتا ہے وہ اپنی قوم کا سردار ہے۔ اس کی لگائی ہوئی قیمت سے زیادہ رقم کوئی نہیں لگائے گا، مطلب یہ کہ اب مجھے وہ اونٹ اس قدر کم قیمت پر فروخت کرنے پڑیں گے، یہ ظلم نہیں تو اور کیا ہے۔ میرا تجارت کا یہ سفر بے کار جائے گا۔‘‘
نبی کریم صلی اللہ علیہ وسلم نے اس کی پوری بات سن کر فرمایا: 
’’ تمہارے اونٹ کہاں ہیں۔‘‘
اس نے بتایا: 
’’ یہیں خزورہ کے مقام پر ہیں۔‘‘
آپ اسی وقت اٹھے،اپنے صحابہ کو ساتھ لیا، اونٹوں کے پاس پہنچے۔ آپ نے دیکھا،اونٹ واقعی بہت عمدہ تھے۔ آپ نے اس سے ان کا بھاؤ کیا اور آخر خوش دلی سے سودا طے ہوگیا۔ آپ نے وہ اونٹ اس سے خریدلیے۔ پھر آپ نے ان میں سے دو زیادہ عمدہ فروخت کردیے اور ان کی قیمت بیوہ عورتوں میں تقسیم فرمادی۔ وہیں بازار میں ابوجہل بیٹھا تھا۔اس نے یہ سودا ہوتے دیکھا، لیکن ایک لفظ بول نہ سکا۔ آپ اس کے پاس آئے اور فرمایا: 
’’ خبردار عمرو! (ابوجہل کا نام)اگر تم نے آئندہ ایسی حرکت کی تو بہت سختی سے پیش آؤں گا۔‘‘
یہ سنتے ہی وہ خوف زدہ انداز میں بولا: 
’’ محمد! میں آئندہ ایسا نہیں کروں گا…میں آئندہ ایسا نہیں کروں گا۔‘‘
اس کے بعد حضور نبی کریم صلی اللہ علیہ وسلم وہاں سے لوٹ آئے۔ادھر راستے میں امیہ بن خلف ابوجہل سے ملا۔ اس کے ساتھ دوسرے ساتھی بھی تھے۔ان لوگوں نے ابوجہل سے پوچھا: 
’’تم تو محمد کے ہاتھوں بہت رسوا ہوکر آرہے ہو، ایسا معلوم ہوتا ہے کہ یا تو تم ان کی پیروی کرنا چاہتے ہو یا تم ان سے خوف زدہ ہوگئے ہو۔‘‘
اس پر ابوجہل نے کہا: 
’’ میں ہرگز محمد کی پیروی نہیں کرسکتا، میری جو کمزوری تم نے دیکھی ہے، اس کی وجہ یہ ہے کہ جب میں نے محمد(صلی اللہ علیہ وسلم)کو دیکھا تو ان کے دائیں بائیں بہت سارے آدمی نظر آئے۔ ان کے ہاتھوں میں نیزے اور بھالے تھے اور وہ ان کو میری طرف لہرا رہے تھے۔اگر میں اس وقت ان کی بات نہ مانتا تو وہ سب لوگ مجھ پر ٹوٹ پڑتے۔‘‘
ابوجہل ایک یتیم کا سرپرست بنا، پھر اس کا سارا مال غصب کرکے اسے نکال باہر کیا۔ وہ یتیم حضور نبی کریم صلی اللہ علیہ وسلم کے پاس ابوجہل کے خلاف فریاد لے کر آیا۔ حضور صلی اللہ علیہ وسلم اس یتیم کو لیے ابوجہل کے پاس پہنچے۔ آپ نے اس سے فرمایا:
’’اس یتیم کا مال واپس کردو۔‘‘
ابوجہل نے فوراً مال اس لڑکے کے حوالے کردیا۔مشرکین کو یہ بات معلوم ہوئی تو بہت حیران ہوئے،انہوں نے ابوجہل سے کہا:
’’کیا بات ہے؟ تم اس قدر بزدل کب سے ہوگئے کہ فوراً ہی مال اس لڑکے کے حوالے کردیا۔‘‘
اس پر اس نے کہا:
’’تمہیں نہیں معلوم محمد کے دائیں بائیں مجھے بہت خوف ناک ہتھیار نظر آئے۔میں ان سے ڈر گیا۔اگر میں اس یتیم کا مال نہ لوٹاتا تو وہ ان ہتھیاروں سے مجھے مار ڈالتے۔‘‘
قبیلہ خثعم کی یاک شاخ اراشہ تھی۔اس کے ایک شخص سے ابوجہل نے کچھ اونٹ خریدے ،لیکن قیمت ادا نہ کی۔اس نے قریش کے لوگوں سے فریاد کی۔ان لوگوں نے حضور نبی کریم ﷺ کا مذاق اڑانے کا پروگرام بنا لیا۔انہوں نے اس اراشی سے کہا:
’’تم محمد کے پاس جا کر فریاد کرو۔‘‘
ایسا انہوں نے اس لیے کہا تھا کہ ان کا خیال تھا کہ حضور نبی کریم ﷺ ابوجہل کا کچھ نہیں بگار سکتے۔
اراشی حضور ﷺ کے پاس گیا۔آپ نے فوراًاسے ساتھ لیا اور ابوجہل کے مکان پر پہنچ گئے۔اس کے دروازے پر دستک دی۔ابوجہل نے اندر سے پوچھا:
’’کون ہے؟‘‘
آپ نے فرمایا:
’’محمد!‘‘
ابوجہل فوراً باہر نکل آیا۔آپ کا نام سنتے ہی اس کا چہرہ زرد پڑگیا۔آپ نے اس سے فرمایا:
’’ اس شخص کا حق فوراً ادا کردو۔‘‘
اس نے کہا: 
’’ بہت اچھا! ابھی لایا۔‘‘
اس نے اسی وقت اس کا حق ادا کردیا۔اب وہ شخص واپس اسی قریشی مجلس میں آیا اور ان سے بولا: 
’’ اللہ تعالیٰ ان(یعنی آنحضرت صلی اللہ علیہ وسلم)کو جزائے خیر دے۔ اللہ کی قسم! انہوں نے میرا حق مجھے دلوادیا۔‘‘
مشرک لوگوں نے بھی اپنا ایک آدمی ان کے پیچھے بھیجا تھا اور اس سے کہا تھا کہ وہ دیکھتا رہے، حضور اکرم صلی اللہ علیہ وسلم کیا کرتے ہیں، چنانچہ جب وہ واپس آیا تو انہوں نے اس سے پوچھا: 
’’ ہاں! تم نے کیا دیکھا؟ ‘‘
جواب میں اس نے کہا: 
’’ میں نے ایک بہت ہی عجیب اور حیرت ناک بات دیکھی ہے۔‘‘

مشرکین کی گستاخیاں

’’اللہ کی قسم! محمد نے جیسے ہی اس کے دروازے پر دستک دی تو وہ فوراً اس حالت میں باہر نکل آیا گویا اس کا چہرہ بالکل بے جان اور زرد ہورہا تھا۔ محمد نے اس سے کہا کہ اس کا حق ادا کردو، وہ بولا، بہت اچھا۔ یہ کہہ کر وہ اندر گیا اور اسی وقت اس کا حق لاکردے دیا۔‘‘
قریشی سردار یہ سارا واقعہ سن کر بہت حیران ہوئے۔ اب انہوں نے ابوجہل سے کہا: 
’’تمہیں شرم نہیں آتی، جو حرکت تم نے کی، ایسی تو ہم نے کبھی نہیں دیکھی۔‘‘
جواب میں اس نے کہا:
’’تمہیں کیا پتا، جونہی محمد نے میرے دروازے پر دستک دی اور میں نے ان کی آواز سنی تو میرا دل خوف اور دہشت سے بھر گیا۔ پھر میں باہر آیا تو میں نے دیکھا کہ ایک بہت قدآور اونٹ میرے سر پر کھڑا ہے، میں نے آج تک اتنا بڑا اونٹ کبھی نہیں دیکھا تھا۔ اگر میں ان کی بات ماننے سے انکار کردیتا تو وہ اونٹ مجھے کھالیتا۔‘‘
کچھ مشرک ایسے بھی تھے جو مستقل طور پر آپ کا مذاق اڑایا کرتے تھے۔ اللہ تعالیٰ نے ان کے بارے میں ارشاد فرمایا:
ترجمہ:’’ یہ لوگ جو آپ پر ہنستے ہیں اور اللہ تعالیٰ کے سوا دوسروں کو معبود قرار دیتے ہیں، ان سے آپ کے لئے ہم کافی ہیں۔‘‘ (سورۃ الحجر، آیت:95)۔
ان مذاق اڑانے والوں میں ابوجہل، ابولہب، عقبہ بن ابی معیط، حکم بن عاص بن امیہ (جو حضرت عثمان رضی اللہ عنہ کا چچا تھا) اور عاص بن وائل شامل تھے۔
ابولہب کی حرکات میں سے ایک حرکت یہ تھی کہ وہ آنحضرت صلی اللہ علیہ وسلم کے دروازے پر گندگی پھینک جایا کرتا تھا۔ ایک روز وہ یہی حرکت کرکے جارہا تھا کہ اسے اس کے بھائی حضرت حمزہ رضی اللہ عنہ نے دیکھ لیا، حضرت حمزہ رضی اللہ عنہ نے وہ گندگی اٹھاکر فوراً ابولہب کے سر پر ڈال دی۔
اسی طرح عقبہ بن ابی معیط نبی کریم صلی اللہ علیہ وسلم کے دروازے پر گندگی ڈال جایا کرتا تھا۔ عقبہ نے ایک روز آپ کے چہرہ مبارک کی طرف تھوکا، وہ تھوک لوٹ کر اسی کے چہرے پر آپڑا۔ جس حصے پر وہ تھوک گرا، وہاں کوڑھ جیسا نشان بن گیا۔
ایک مرتبہ عقبہ بن ابی معیط سفر سے واپس آیا تو اس نے ایک بڑی دعوت دی۔ تمام قریشی سرداروں کو کھانے پر بلایا۔ اس موقعے پر اس نے آنحضرت صلی اللہ علیہ وسلم کو بھی بلایا مگر جب کھانا مہمانوں کے سامنے چنا گیا تو آپ صلی اللہ علیہ وسلم نے کھانے سے انکار کردیا اور فرمایا:
’’میں اس وقت تک تمہارا کھانا نہیں کھاؤں گا جب تک کہ تم یہ نہ کہو، اللہ تعالیٰ کے سوا کوئی عبادت کے لائق نہیں۔‘‘
چوں کہ مہمان نوازی عرب کے لوگوں کی خاص علامت تھی اور وہ مہمان کو کسی قیمت پر ناراض نہیں ہونے دیتے تھے اس لئے عقبہ نے کہہ دیا: 
’’میں گواہی دیتا ہوں کہ اللہ کے سوا کوئی معبود نہیں۔‘‘
یہ سن کر آپ صلی اللہ علیہ وسلم نے کھانا کھالیا۔ کھانے کے بعد سب لوگ اپنے گھر چلے گئے۔ عقبہ بن ابی معیط، ابی بن خلف کا دوست تھا۔ لوگوں نے اسے بتایا کہ عقبہ نے کلمہ پڑھ لیا ہے۔ ابی بن خلف اس کے پاس آیا اور بولا: 
’’عقبہ! کیا تم بے دین ہوگئے ہو؟‘‘
جواب میں اس نے کہا:
’’خدا کی قسم! میں بے دین نہیں ہوا (یعنی مسلمان نہیں ہوا ہوں)۔ بات صرف اتنی سی ہے کہ ایک معزز آدمی میرے گھر آیا اور اس نے یہ کہہ دیا کہ میں جب تک اس کے کہنے کے مطابق توحید کی گواہی نہیں دوں گا، وہ میرے ہاں کھانا نہیں کھائے گا، مجھے اس بات سے شرم آئی کہ ایک شخص میرے گھر آئے اور کھانا کھائے بغیر چلا جائے۔ اس لئے میں نے وہ الفاظ کہہ دیے اور اس نے کھانا کھالیا، لیکن سچ یہی ہے کہ میں نے وہ کلمہ دل سے نہیں کہا تھا۔‘‘
یہ بات سن کر ابی بن خلف کا اطمینان نہ ہوا، اس نے کہا:
’’میں اس وقت تک نہ اپنی شکل تمہیں دکھاؤں گا، نہ تمہاری شکل دیکھوں گا جب تک کہ تم محمد کا منہ نہ چڑاؤ، ان کے منہ پر نہ تھوکو اور ان کے منہ پر نہ مارو۔‘‘
یہ سن کر عقبہ نے کہا: 
’’یہ میرا تم سے وعدہ ہے۔‘‘
اس کے بعد جب حضور نبی کریم صلی اللہ علیہ وسلم اس بدبخت کے سامنے آئے، اس نے آپ کا منہ چڑایا، آپ کے چہرہ مبارک پر تھوکا، لیکن اس کا تھوک آپ کے چہرہ مبارک تک نہ پہنچا بلکہ خود اس کے منہ پر آکر گرا۔ اس نے محسوس کیا، گویا آگ کا کوئی انگارہ اس کے چہرے پر آگیا ہے۔ اس کے چہرے پر جلنے کا نشان باقی رہ گیا اور مرتے دم تک رہا۔ 
اسی عقبہ بن معیط کے بارے میں سورہ فرقان کی آیت 37 نازل ہوئی: 
ترجمہ:’’ جس روز ظالم اپنے ہاتھ کاٹ کاٹ کر کھائے گا اور کہے گا، کیا ہی اچھا ہوتا، میں رسول کے ساتھ دین کی راہ پر لگ جاتا۔‘‘ 
اس آیت کی تفسیر میں لکھا ہے: 
’’جس روز ظالم آدمی جہنم میں کہنی تک اپنا ایک ہاتھ دانتوں سے کاٹے گا، پھر دوسرے ہاتھ کو کاٹ کر کھائے گا، جب دوسرا کھاچکے گا تو پہلا پھر اُگ آئے گا اور وہ اس کو کاٹنے لگے گا۔ غرض اسی طرح کرتا رہے گا۔‘‘
اسی طرح حکم بن عاص بھی آنحضرت صلی اللہ علیہ وسلم کے ساتھ مسخرہ پن کرتا تھا۔ ایک روز آپ ﷺچلے جارہے تھے۔ یہ آپ کے پیچھے چل پڑا۔ آپ کا مذاق اڑانے کے لئے منہ اور ناک سے طرح طرح کی آوازیں نکالنے لگا۔ آپ چلتے چلتے اس کی طرف مڑے اور فرمایا:
’’تو ایسا ہی ہوجا۔‘‘
چنانچہ اس کے بعد یہ ایسا ہوگیا تھا کہ اس کے منہ اور ناک سے ایسی ہی آوازیں نکلتی رہتی تھیں۔ ایک ماہ تک یہ بے ہوشی کی حالت میں رہا۔ اس کے بعد مرنے تک اس کے منہ اور ناک سے ایسی ہی آوازیں نکلتی رہیں۔ 
اسی طرح عاص بن وائل بھی آپ صلی اللہ علیہ وسلم کا مذاق اڑایا کرتا تھا۔ وہ کہا کرتا تھا:
’’محمد! اپنے آپ کو اور اپنے ساتھیوں کو (نعوذ باللہ) یہ کہہ کر دھوکا دے رہے ہیں کہ وہ مرنے کے بعد دوبارہ زندہ کئے جائیں گے، خدا کی قسم ہماری موت صرف زمانے کی گردش اور وقت کے گزرنے کی وجہ سے آتی ہے۔‘‘
اسی عاص بن وائل کا ایک واقعہ اور ہے۔ حضرت خباب بن ارت رضی اللہ عنہ مکہ میں لوہار کا کام کرتے تھے، تلواریں بناتے تھے۔ انہوں نے عاص بن وائل کو کچھ تلواریں فروخت کی تھیں، ان کی اس نے ابھی قیمت ادا نہیں کی تھی۔ خباب بن ارت رضی اللہ عنہ اس سے قیمت کا تقاضا کرنے کے لئے گئے تو اس نے کہا:
’’خباب! تم محمد کے دین پر چلتے ہو، کیا وہ یہ دعویٰ نہیں کرتے کہ جنت والوں کو سونا، چاندی، قیمتی کپڑے، خدمت گار اور اولاد مرضی کے مطابق ملے گی؟‘‘
حضرت خباب بن ارت رضی اللہ عنہ بولے: 
’’ہاں! یہی بات ہے۔‘‘
اب عاص نے ان سے کہا:
’’میں اس وقت تک تمہارا قرض نہیں دوں گا جب تک کہ تم محمد کے دین کا انکار نہیں کروگے۔‘‘

مذاق اڑانے والے

جواب میں حضرت خباب بن ارتؓ نے فرمایا:
’’اللہ کی قسم میں محمدﷺ کا دین نہیں چھوڑ سکتا۔‘‘
اسی طرح ان مذاق اڑانے والوں میں سے ایک اسود بن یغوث بھی تھا۔ یہ حضورﷺ کا ماموں زاد تھا۔ جب بھی مسلمانوں کو دیکھتا تو اپنے ساتھیوں سے کہتا:
’’دیکھو!تمہارے سامنے روئے زمین کے وہ بادشاہ آرہے ہیں جو کسریٰ اور قیصر کے وارث بننے والے ہیں۔‘‘
یہ بات وہ اس لئے کہتا تھا کیونکہ صحابہؓ میں سے اکثر کے لباس پھٹے پرانے ہوتے تھے،وہ مفلس اور نادار تھے اور آپﷺ یہ پیش گوئی فرما چکے تھے کہ مجھے ایران اور روم کی سلطنتوں کی کنجیاں دی گئی ہیں۔
اسود آپﷺ سے یہ بھی کہا کرتا تھا:
’’محمد! آج تم نے آسمانوں کی باتیں نہیں سنائیں،آج آسمان کی کیا خبریں ہیں۔‘‘
یہ اور اس کے ساتھی جب آپﷺ اور آپﷺ کے صحابہؓ کو دیکھتے تو سیٹیاں بجاتے تھے،آنکھیں مٹکاتے تھے۔
اسی قسم کا ایک آدمی نضر بن حارث تھا۔ یہ بھی آپﷺ کا مذاق اڑانے والوں میں شامل تھا۔
ان میں سے اکثر لوگ ہجرت سے پہلے ہی مختلف آفتوں اور بلاؤں میں گرفتار ہو کر ہلاک ہوئے۔
ان مذاق اڑانے والوں میں سے ایک حضرت خالد بن ولیدؓ کا باپ ولید بن مغیرہ بھی تھا۔ یہ ابو جہل کا چچا تھا۔قریش کے دولت مند لوگوں میں اس کا شمار ہوتا تھا۔حج کے زمانے میں تمام حاجیوں کو کھانا کھلاتا تھا، کسی کو چولہا نہیں جلانے دیتا تھا،لوگ اس کی بہت تعریف کرتے تھے، اس کے قصیدے پڑھتے تھے، اس کے بہت سے باغات تھے۔ایک باغ تو ایسا تھا جس میں تمام سال پھل لگتا تھا،لیکن اس نے آپﷺ کو اس قدر تکالیف پہنچائیں کہ آپﷺ نے اس کے لئے بددعا فرما دی۔ اس کے بعد اس کا تمام مال ختم ہو گیا،باغات تباہ ہو گئے، پھر حج کے دنوں میں کوئی اس کا نام لینے والا بھی نہ رہا۔
ایک روز جبرائیل علیہ السلام آپﷺ کے پاس تشریف لائے،اس وقت آپﷺ بیت اللہ کا طواف کر رہے تھے، جبرائیل علیہ السلام نے آ کر عرض کیا:
’’مجھے حکم دیا گیا ہے کہ میں آپﷺ کو مذاق اڑانے والوں سے نجات دلاؤں۔‘‘
ایسے میں ولید بن مغیرہ ادھر سے گزرا۔جبرائیل علیہ السلام نے آپﷺ سے پوچھا:
آپﷺ اسے کیسا سمجھتے ہیں؟‘‘
آپﷺ نے فرمایا
اللہ تعالیٰ کا برا بندہ ہے۔‘‘
یہ سن کر جبرائیل علیہ السلام نے ولید کی پنڈلی کی طرف اشارہ کیا اور بولے:
’’میں نے اسے انجام تک پہنچا دیا۔‘‘
پھر عاص بن وائل سامنے سے گزرا تو جبرائیل علیہ السلام نے پوچھا:
’’اسے آپﷺ کیسا آدمی پاتے ہیں؟‘‘
آپﷺ نے فرمایا:
’’یہ بھی ایک برا بندہ ہے۔‘‘
حضرت جبرائیل علیہ السلام نے اس کے پیر کی طرف اشارہ کیا اور پھر بولے:
’’میں نے اسے انجام تک پہنچا دیاہے۔‘‘
اس کے بعد اسود وہاں سے گزرا۔ اس کے بارے میں آپﷺ نے یہی فرمایا کہ برا آدمی ہے، حضرت جبرائیل علیہ السلام نے اس کی آنکھ کی طرف اشارہ کیا اور بولے:
’’میں نے اسے انجام تک پہنچا دیا ہے۔‘‘
پھر حارث بن عیطلہ گزرا۔ حضرت جبرائیل علیہ السلام نے اس کے پیٹ کی طرف اشارہ کر کے کہا:
’’میں نے اسے انجام تک پہنچا دیا ہے۔‘‘
اس واقعے کے بعد اسود بن یغوث اپنے گھر سے نکلا تو اس کو لو کے تھپیڑوں نے جھلسا دیا۔ اس کا چہرہ جل کر بالکل سیاہ ہو گیا۔ جب یہ واپس اپنے گھر میں داخل ہوا تو گھر کے لوگ اسے پہچان نہ سکے۔ انہوں نے اسے گھر سے نکال دیااور دروازہ بند کر دیا۔ اس کے ساتھ ہی یہ زبردست پیاس میں مبتلا ہو گیا، مسلسل پانی پیتا رہتا تھا،یہاں تک کہ اس کا پیٹ پھٹ گیا۔
حارث بن عیطلہ کے ساتھ یہ ہوا کہ اس نے ایک نمکین مچھلی کھا لی، اس کے بعد اسے شدید پیاس نے آلیا۔یہ پانی پیتا رہا، یہاں تک کہ اس کا بھی پیٹ پھٹ گیا۔
ولید بن مغیرہ ایک روز ایک شخص کے پاس سے گزرا۔ وہ شخص تیر بنا رہا تھا۔ اتفاق سے ایک تیر اس کے کپڑوں میں الجھ گیا۔ولید نے تکبر کی وجہ سے جھک کر اس کا تیر نکالنے کی کوشش نہ کی اور آگے بڑھنے لگا تو
وہ تیر اس کی پنڈلی میں چبھ گیا۔ اس کی وجہ سے زہر پھیل گیا اور وہ مر گیا۔
عاص بن وائل کے تلوے میں ایک کانٹا چبھا۔ اس کی وجہ سے اس کے پیر پر اتنا ورم آگیا کہ وہ چکی کے پاٹ کی طرح چپٹا ہو گیا۔ اسی حالت میں اس کی موت واقع ہو گئی۔
حضرت ابن عباسؓ کی روایت کے مطابق یہ لوگ ایک ہی رات میں ہلاک ہوئے تھے۔
نبی کریمﷺ نے محسوس فرمایا کہ قریش مکہ مسلمانوں کو بے تحاشا تکالیف پہنچا رہے ہیں اور مسلمانوں میں ابھی اتنی طاقت نہیں کہ وہ اس بارے میں کچھ کہہ سکیں، چنانچہ آپﷺ نے مسلمانوں سے فرمایا:
’’تم لوگ روئے زمین پر ادھر ادھر پھل جاؤ،اللہ تعالی پھر تمہیں ایک جگہ جمع فرما دے گا۔‘‘
’’ہم کہاں جائیں؟ ‘‘صحابہ کرامؓ نے پوچھا۔
آپﷺ نے ملک حبشہ کی طرف اشار ہ کر تے ہوئے فرمایا:
’’تم لوگ ملک حبشہ کی طرف چلے جاؤ، اس لئے کہ وہاں کا باشاہ نیک ہے۔ وہ کسی پر ظلم نہیں ہونے دیتا، وہ سچائی کی سر زمیں ہے، یہاں تک کہ اللہ تعالیٰ تمہاری ان مصیبتوں کا خاتمہ کر کے تمہارے لئے آسانیاں پیدا کر دے۔‘‘
حدیث میں آتا ہے کہ جو شخص اپنے دین کو بچانے کے لئے ادھر سے ادھر کہیں گیا، چاہے وہ ایک بالشت ہی چلا اس کے لئے جنت واجب کر دی جاتی ہے۔
چنانچہ اس حکم کے بعد بہت سے مسلمان اپنے دین کو بچانے کے لئے اپنے وطن سے ہجرت کر گئے۔ان میں کچھ ایسے بھی تھے جنہوں نے اپنے بیوی بچوں کے ساتھ ہجرت کی اور کچھ ایسے بھی تھے جنہوں نے تنہا ہجرت کی۔ جن لوگوں نے بیوی بچوں سمیت ہجرت کی،ان میں حضرت عثمان غنیؓ بھی تھے۔ ان کے ساتھ ان کی بیوی یعنی آپﷺ کی صاحب زادی حضرت رقیہؓ بھی ہجرت کر گئیں۔
حضرت عثمان غنیؓ سب سے پہلے ہجرت کرنے والے شخص ہیں۔

حضرت عمر رضی اللہ عنہ اسلام لاتے ہیں

اسی طرح حضرت ابو سلمہ رضی اللہ عنہ نے بھی اپنی بیوی حضرت ام سلمہ رضی اللہ عنہا کے ساتھ ہجرت کی۔ حضرت عامر ابن ابی ربیعہ رضی اللہ عنہ نے بھی اپنی بیوی کے ساتھ ہجرت کی۔جن صحابہ نے تنہا ہجرت کی، ان کے نام یہ ہیں۔حضرت عبد الرحمن ابن عوف، حضرت عثمان ابن مظعون، حضرت سہیل ابن بیضاء، حضرت زبیر ابن العوام اور حضرت عبداللہ ابن مسعود رضی اللہ عنہم۔
کفار کو جب ان کی ہجرت کا پتا چلا تو وہ تعاقب میں دوڑے، لیکن اس وقت تک یہ حضرات بحری جہاز پر سوار ہو چکے تھے۔ وہ جہاز تاجروں کے تھے، اس طرح یہ حضرات حبشہ پہنچنے میں کامیاب ہو گئے۔کچھ عرصے بعد ان لوگوں نے ایک غلط خبر سنی، وہ یہ تھی کہ تمام قریش مکہ مسلمان ہو گئے ہیں۔ اس اطلاع کے بعد حبشہ کے بہت سے مہاجرین مکہ روانہ ہوئے۔نزدیک پہنچ کر پتا چلا کہ اطلاع غلط تھی۔اب انہوں نے حبشہ جانا مناسب نہ سمجھااور کسی نہ کسی کی پناہ حاصل کر کے مکہ میں داخل ہو گئے۔
پناہ حاصل کرنے والے ان مہاجرین نے جب اپنے مسلمان بھائیوں پر اسی طرح بلکہ پہلے سے بھی زیادہ ظلم و ستم دیکھا تو انہیں یہ گوارا نہ ہوا کہ ہم پناہ کی وجہ سے اس ظلم سے محفوظ رہیں۔لہٰذا انہوں نے اپنی اپنی پناہ لوٹا دی اور کہا کہ ہم بھی اپنے بھائیوں کے ساتھ ظلم و ستم کا سامنا کریں گے۔
حضرت عمر رضی اللہ عنہ اس وقت تک اسلام دشمنی پر کمر باندھے ہوئے تھے۔ ایک روز وہ مکہ کی ایک گلی سے گزر رہے تھے کہ ان کی ملاقات ایک قریشی شخص سے ہوئی۔ ان کا نام حضرت نعیم ابن عبد اللہ رضی اللہ عنہ تھا۔ یہ اس وقت تک اپنی قوم کے خوف سے اپنے اسلام کو چھپائے ہوئے تھے۔ حضرت عمر رضی اللہ عنہ کے ہاتھ میں تلوار تھی۔ یہ پریشان ہو گئے، ان سے پوچھا کہ کیا ارادے ہیں، وہ بولے:
’’محمد کو قتل کرنے جا رہا ہوں۔‘‘
یہ سن کر حضرت نعیم رضی اللہ عنہ نے کہا:
’’پہلے اپنے گھر کی خبر لو، تمہاری بہن اور بہنوئی مسلمان ہو چکے ہیں۔‘‘
یہ سن کر حضرت عمر رضی اللہ عنہ جلال میں آ گئے۔بہن کے گھر کا رخ کیا۔ حضرت عمر رضی اللہ عنہ کی بہن کا نام فاطمہ تھا، ان کے شوہر حضرت سعید بن زید رضی اللہ عنہ تھے، یہ عشرہ مبشرہ میں شامل ہیں۔ حضرت عمر رضی اللہ عنہ کے چچا زاد بھائی بھی تھے۔ ادھر خود حضرت سعید کی بہن حضرت عاتکہ رضی اللہ عنہا حضرت عمر رضی اللہ عنہ کی بیوی تھیں۔
بہن کے دروازے پر پہنچ کر انہوں نے دستک دی۔اندر سے پوچھا گیا:’’کون ہے۔‘‘
انہوں نے اپنا نام بتایا تو اندر یک لخت خاموشی چھا گئی۔
اندر اس وقت حضرت خباب بن ارت رضی اللہ عنہ انہیں قرآن پڑھا رہے تھے۔انہوں نے فوراً قرآن کے اوراق چھپا دیے، حضرت فاطمہ رضی اللہ عنہا نے اٹھ کر دروازہ کھولا۔حضرت عمر رضی اللہ عنہ فوراً بولے:
’’اے اپنی جان کی دشمن میں نے سنا ہے تو بے دین ہو گئی ہے۔‘‘
ساتھ ہی انہوں نے انہیں مارا۔ان کے جسم سے خون بہنے لگا۔خون کو دیکھ کر بولیں:
’’عمر، تم کچھ بھی کر لو، میں مسلمان ہو چکی ہوں۔‘‘
اب حضرت عمر رضی اللہ عنہ نے پوچھا:
’’یہ کون سی کتاب تم پڑھ رہے تھے، مجھے دکھاؤ۔‘‘
حضرت فاطمہ رضی اللہ عنہا بولیں:
’’یہ کتاب تمہارے ہاتھ میں ہر گز نہیں دی جا سکتی، اس لیے کہ تم ناپاک ہو، پہلے غسل کر لو، پھر دکھائی جا سکتی ہے۔‘‘
آخر انہوں نے غسل کیا، پھر قرآن مجید کے اوراق دیکھے۔ جیسے ہی ان کی نظر بسم اللہ الرحمن الرحیم پر پڑی، ان پر ہیبت طاری ہو گئی۔آگے سورہ طہٰ تھی، اس کی ابتدائی آیات پڑھ کر تو ان کی حالت غیر ہو گئی،بولے:
’’مجھے رسول اللہ (صلی اللہ علیہ و سلم) کے پاس لے چلو۔‘‘
حضرت خباب بن ارت اور حضرت سعید بن زید رضی اللہ عنہما ادھر ادھر چھپے ہوئے تھے، ان کے الفاظ سن کر سامنے آ گئے، بعض روایات میں یہ آتا ہے کہ حضرت سعید بن زید رضی اللہ عنہ کو بھی حضرت عمر رضی اللہ عنہ نے مارا پیٹا تھا، اس کا مطلب ہے صرف حضرت خباب بن ارت رضی اللہ عنہ چھپے ہوئے تھے۔
بہرحال اس موقع پر وہ سامنے آ گئے اور بولے:
’’اے عمر، تمہیں بشارت ہو، اللہ کے رسول (صلی اللہ علیہ و سلم) نے دعا مانگی تھی کہ اے اللہ، دو آدمیوں میں سے ایک کے ذریعے اسلام کو عزت عطا فرما، یا تو عمرو ابن ہشام (ابو جہل) کے ذریعے یا پھر عمر بن خطاب کے ذریعے۔‘‘
ایک روایت کے مطابق آپ نے فرمایا تھا:
’’ان دونوں میں سے جو تجھے محبوب ہو، اس کے ذریعے اسلام کو عزت عطا فرما۔‘‘
آپ صلی اللہ علیہ و سلم نے یہ دعا بدھ کے روز مانگی تھی ۔ جمعرات کے روز یہ واقعہ پیش آیا۔ حضرت خباب بن ارت اور حضرت سعید بن زید رضی اللہ عنہما انہیں دار ارقم لے گئے۔
دروازے پر دستک دی گئی۔ اندر سے پوچھا گیا۔کون ہے؟انہوں نے کہا۔عمر ابن خطاب۔یہ بات حضور صلی اللہ علیہ و سلم کو بتائی گئی کہ دروازے پر عمر بن خطاب ہیں، آپ نے ارشاد فرمایا:
’’دروازہ کھول دو، اگر اللہ تعالیٰ نے اس کے ساتھ خیر کا ارادہ فرمایا ہے تو ہدایت پا لے گا۔‘‘
دروازہ کھولا گیا، حضرت حمزہ رضی اللہ عنہ نے انہیں اندر آنے کی اجازت دی، پھر دو صحابہ نے انہیں دائیں بائیں سے پکڑ کر آپ کی خدمت میں پہنچایا۔آپ نے فرمایا:
’’انہیں چھوڑ دو۔‘‘
انہوں نے حضرت عمر رضی اللہ عنہ کو چھوڑ دیا۔وہ نبی اکرم صلی اللہ علیہ و سلم کے سامنے بیٹھ گئے، آپ صلی اللہ علیہ و سلم نے ان کے کرتے کا دامن پکڑ کر انہیں اپنی طرف کھینچا اور فرمایا:
’’اے ابن خطاب!اللہ کے لیے ہدایت کا راستہ اختیار کرو۔‘‘
انہوں نے فوراً کہا:
’’میں گواہی دیتا ہوں کہ اللہ تعالیٰ کے سوا کوئی معبود نہیں اور یہ کہ آپ اللہ کے رسول ہیں۔‘‘
ان کے یہ الفاظ سنتے ہی نبی اکرم صلی اللہ علیہ و سلم اور مسلمانوں نے خوشی سے بے تاب ہو کر اس قدر زور سے تکبیر کہی، مکہ کے گوشے گوشے تک یہ آواز پہنچ گئی۔آپ نے تین بار ان کے سینے پر ہاتھ مار کر فرمایا :
’’اے اللہ، عمر کے دل میں جو میل ہے، اس کو نکال دے، اور اس کی جگہ ایمان بھر دے۔‘‘
اس کے بعد حضرت عمر رضی اللہ عنہ قریش کے پاس پہنچے، انہیں بتایا کہ وہ اسلام لے آئے ہیں۔قریش ان کے گرد جمع ہو گئے اور کہنے لگے:
’’لو عمر بھی بے دین ہو گیا ہے۔‘‘
عتبہ بن ربیعہ آپ پر جھپٹا، لیکن آپ نے اسے اٹھا کر زمین پر پٹخ دیا، پھر کسی کو ان کی طرف بڑھنے کی جرات نہ ہوئی۔ اس کے بعد آپ نے اعلان فرمایا:
’’اللہ کی قسم، آج کے بعد مسلمان اللہ تعالیٰ کی عبادت چھپ کر نہیں کریں گے۔‘‘
اس پر نبی اکرم صلی اللہ علیہ و سلم مسلمانوں کے ساتھ دار ارقم سے نکلے، حضرت عمر رضی اللہ عنہ تلوار ہاتھ میں لیے آگے آگے چل رہے تھے، وہ کہتے جا رہے تھے:
’’لا الہ الا اللہ محمد رسول اللہ‘‘
یہاں تک کہ سب حرم میں داخل ہو گئے، حضرت عمر رضی اللہ عنہ نے قریش سے فرمایا:
’’تم میں سے جس نے بھی اپنی جگہ سے حرکت کی، میری تلوار اس کا فیصلہ کرے گی۔‘‘

نجاشی کے دربار میں

اس کے بعد رسول اللہ صلی اللہ علیہ وسلم اورتمام مسلمانوں نے کعبہ کا طواف شروع کیا۔حضرت عمر رضی اللہ تعالیٰ عنہٗ آگے آگے رہے۔مسلمانوں نے کعبہ کے گرد نماز ادا کی۔سب نے بلند آواز سے قرآن کی تلاوت بھی کی۔جبکہ اس سے پہلے مسلمان ایسا نہیں کر سکتے تھے۔
اب تمام قریش نے مل کر نبی کریم صلی اللہ علیہ وسلم کو قتل کرنے کا فیصلہ کیا۔انہوں نے آنحضرت صلی اللہ علیہ سلم کے خاندان والوں سے کہا:
’’تم ہم سے دو گنا خون بہا لے لو اور اسکی اجازت دے دو کہ قریش کا کوئی شخص آنحضرت صلی اللہ علیہ وسلم کو قتل کر دے تاکہ ہمیں سکون مل جائے اور تمہیں فائدہ پہنچ جائے۔‘‘
آنحضرت صلی اللہ علیہ وسلم کے خاندان والوں نے اس تجویز کو ماننے سے انکار کردیا۔اس پر قریش نے غصے میں آکر یہ طے کیا کہ تمام بنو ہاشم اور بنو عبدالمطلب کا معاشرتی بائیکاٹ کیا جائے اور ساتھ ہی انہوں نے طے کیا کہ بنو ہاشم کو بازاروں میں نہ آنے دیا جائے تاکہ وہ کوئی چیز نہ خرید سکیں۔ان سے شادی بیاہ نہ کیا جائے اور نہ ان کے لیے کوئی صلح قبول کی جائے۔ان کے معاملے میں کوئی نرم دلی نہ اختیار کی جائیں،یعنی ان پر کچھ بھی گزرے، ان کے لیے دل میں رحم کا جذبہ پیدا نہ ہونے دیا جائے اور یہ بائیکاٹ اس وقت تک جاری رہنا چاہیے جب تک کہ بنی ہاشم کے لوگ آنحضرت صلی اللہ علیہ وسلم کو قتل کرنے کے لیے قریش کے حوالے نہ کردیں ۔
قریش نے اس معاہدے کی باقاعدہ تحریری لکھی، اس پر پوری طرح عمل کرانے اور اس کا احترام کرانے کے لیے اس کو کعبے میں لٹکادیا ۔
اس معاہدے کے بعد ابولہب کو چھوڑ کر تمام بنی ہاشم اور بنی عبدالمطلب شعب ابی طالب میں چلے گئے، یہ مکہ سے باہر ایک گھاٹی تھی۔ ابولہب چونکہ قریش کا پکا طرف دار تھا اور آپ صلی للہ علیہ وسلم کا بدترین دشمن بھی تھا، اس لیے اسے گھاٹی میں جانے پر مجبور نہ کیا گیا ۔ یوں بھی اس نے نبی کریم صلی اللہ علیہ وسلم کے قتل کے منصوبے میں قریش کا ساتھ دیا تھا، ان کی مخالفت نہیں کی تھی ۔ 
نبی اکرم صلی اللہ علیہ وسلم شعب ابی طالب میں محصور ہوگئے، اس وقت آپ کی عمر مبارک 46 سال تھی ۔ بخاری میں ہے کہ اس گھاٹی میں مسلمانوں نے بہت مشکل اور سخت وقت گزارا ۔ قریش کے بائیکاٹ کی وجہ سے انہیں کھانے پینے کی کوئی چیز نہیں ملتی تھی ۔ سب لوگ بھوک سے بے حال رہتے تھے ۔ یہاں تک کہ انہوں نے گھاس پھوس اور درختوں کے پتے کھاکر یہ دن گزارے ۔ 
جب بھی مکہ میں باہر سے کوئی قافلہ آتا تو یہ مجبور اور بیکس حضرات وہاں پہنچ جاتے تاکہ ان سے کھانے پینے کی چیزیں خرید لیں لیکن ساتھ ہی ابولہب وہاں پہنچ جاتا اور کہتا:
’’لوگو! محمد کے ساتھی اگر تم سے کچھ خریدنا چاہیں تو اس چیز کے دام اس قدر بڑھا دو کہ یہ تم سے کچھ خرید نہ سکیں، تم لوگ میری حیثیت اور ذمے داری کو اچھی طرح جانتے ہو ۔‘‘ 
چنانچہ وہ تاجر اپنے مال کی قیمت بہت زیادہ بڑھا چڑھا کر بتاتے اوریہ حضرات ناکام ہوکر گھاٹی میں لوٹ آتے ۔ وہاں اپنے بچوں کو بھوک اور پیاس سے بلکتا تڑپتا دیکھتے تو آنکھوں میں آنسو آجاتے۔ادھر بچے انہیں خالی ہاتھ دیکھ کر اور زیادہ رونے لگتے۔ابولہب ان تاجروں سے سارا مال خود خرید لیتا۔یہاں یہ بات ذہن نشین کرلیں کہ آنحضرت ﷺ اور ان کے خاندان کے لوگ قریش کے اس معاہدے کے بعد حالات کا رخ دیکھتے ہوئے خود اس گھاٹی میں چلے آئے تھے۔یہ بات نہیں کہ قریش مکہ نے انہیں گرفتار کرکے وہاں قید کردیاتھا۔
اس بائیکاٹ کے دوران بہت سے مسلمان ہجرت کرکے حبشہ چلے گئے۔یہ حبشہ کی طرف دوسری ہجرت تھی۔اس ہجرت میں اڑتیس مردوں اور بارہ عورتوں نے حصہ لیا۔ان لوگوں میں حضرت جعفر بن ابوطالب رضی اللہ عنہ اور ان کی بیوی اسماء بنت عمیس رضی اللہ عنہا بھی تھیں۔ ان میں مقداد بن اسود رضی اللہ عنہ، عبداللہ بن مسعود رضی اللہ عنہ، عبیداللہ بن جحش اور اس کی بیوی ام حبیبہ بنت ابو سفیان رضی اللہ عنہا بھی تھے۔یہ عبیداللہ بن جحش حبشہ جاکر اسلام سے پھرگیاتھا اور اس نے عیسائی مذہب اختیار کرلیاتھا۔اسی حالت میں اس کی موت واقع ہوئی۔اس کی بیوی ام حبیبہ رضی اللہ عنہا اسلام پر رہیں۔ان سے بعد میں آنحضرت ﷺ نے نکاح فرمایا۔
ان مسلمانوں کو حبشہ میں بہترین پناہ مل گئی، اس بات سے قریش کو اور زیادہ تکلیف ہوئی۔انہوں نے ان کے پیچھے حضرت عمروبن عاص رضی اللہ عنہ اور عمارہ بن ولید کو بھیجا تاکہ یہ وہاں جاکر حبشہ کے بادشاہ کو مسلمانوں کے خلاف بھڑکائیں (حضرت عمروبن عاص رضی اللہ عنہ بعد میں مسلمان ہوئے) یہ دونوں حبشہ کے بادشاہ نجاشی کے لئے بہت سے تحائف لے کر گئے۔بادشاہ کو تحائف پیش کیے۔تحائف میں قیمتی گھوڑے اور ریشمی جبے شامل تھے۔بادشاہ کے علاوہ انہوں نے پادریوں اور دوسرے بڑے لوگوں کو بھی تحفے دیے…تاکہ وہ سب ان کا ساتھ دیں۔بادشاہ کے سامنے دونوں نے اسے سجدہ کیا، بادشاہ نے انہیں اپنے دائیں بائیں بٹھالیا۔اب انہوں نے بادشاہ سے کہا: 
’’ہمارے خاندان کے کچھ لوگ آپ کی سرزمین پر آئے ہیں۔یہ لوگ ہم سے اور ہمارے معبودوں سے بیزار ہوگئے ہیں۔ انہوں نے آپکا دین بھی اختیار نہیں کیا۔یہ ایک ایسے دین میں داخل ہوگئے ہیں، جس کو نہ ہم جانتے ہیں نہ آپ ۔اب ہمیں قریش کے بڑے سرداروں نے آپ کے پاس بھیجا ہے تاکہ آپ ان لوگوں کو ہمارے حوالے کردیں۔‘‘
یہ سن کر نجاشی نے کہا: 
’’ وہ لوگ کہاں ہیں؟‘‘
انہوں نے کہا: 
’’ آپ ہی کے ہاں ہیں۔‘‘
نجاشی نے انہیں بلانے کے لیے فوراً آدمی بھیج دیے۔ایسے میں ان پادریوں اور دوسرے سرداروں نے کہا: 
’’ آپ ان لوگوں کو ان دونوں کے حوالے کردیں۔ اس لیے کہ ان کے بارے میں یہ زیادہ جانتے ہیں۔‘‘
نجاشی نے ایسا کرنے سے انکار کردیا۔ اس نے کہا: 
’’ پہلے میں ان سے بات کروں گا کہ وہ کس دین پر ہیں۔‘‘
اب مسلمان دربار میں حاضر ہوئے۔ حضرت جعفر رضی اللہ عنہ نے اپنے ساتھیوں سے کہا: 
’’ نجاشی سے میں بات کروں گا۔‘‘
ادھر نجاشی نے تمام عیسائی عالموں کو دربار میں طلب کرلیا تھا تاکہ مسلمانوں کی بات سن سکیں۔ وہ اپنی کتابیں بھی اٹھالائے تھے۔
مسلمانوں نے دربار میں داخل ہوتے وقت اسلامی طریقے کے مطابق سلام کیا، بادشاہ کو سجدہ نہ کیا، اس پر نجاشی بولا: 
’’ کیا بات ہے،تم نے مجھے سجدہ کیوں نہیں کیا؟ ‘‘
حضرت جعفر رضی اللہ عنہ فوراً بولے: 
’’ ہم اللہ کے سوا کسی کو سجدہ نہیں کرتے، اللہ تعالیٰ نے ہمارے درمیان ایک رسول بھیجے ہیں…اور ہمیں حکم دیا کہ اللہ کے سوا کسی کو سجدہ نہ کرو، اللہ کے رسول کی تعلیم کے مطابق ہم نے آپ کو وہی سلام کیا ہے جو جنت والوں کا سلام ہے۔‘‘
نجاشی اس بات کو جانتا تھا، اس لیے کہ یہ بات انجیل میں تھی۔

یہ تووہی کلام ہے

اس کے بعد حضرت جعفر رضی اللہ عنہ نے کہا:
’’اللہ کے رسول نے ہمیں نماز کا حکم دیا ہے اور زکوٰۃ ادا کرنے کا حکم دیا ہے۔‘‘
اس وقت حضرت عمرو بن عاص رضی اللہ عنہ نے نجاشی کو بھڑکانے کے لیے اس سے کہا:
’’یہ لوگ ابن مریم یعنی عیسیٰ علیہما السلام کے بارے میں آپ سے مختلف عقیدہ رکھتے ہیں۔ یہ انہیں اللہ کا بیٹا نہیں مانتے۔‘‘
اس پر نجاشی نے پوچھا:
’’تم لوگ عیسیٰ ابن مریم اور مریم علیہما السلام کے بارے میں کیا عقیدہ رکھتے ہو؟‘‘
حضرت جعفر رضی اللہ عنہ نے کہا:
’’ان کے بارے میں ہم وہی کہتے ہیں جو اللہ تعالیٰ فرماتا ہے، یعنی کہ وہ روح اللہ اور کلمۃ اللہ ہیں اور کنواری مریم کے بطن سے پیدا ہوئے ہیں۔‘‘
پھر حضرت جعفر بن ابی طالب رضی اللہ عنہ نے بادشاہ کے دربار میں یہ تقریر کی:
’’اے بادشاہ!ہم ایک گمراہ قوم تھے، پتھروں کو پوجتے تھے،مردار جانوروں کا گوشت کھاتے تھے، بے حیائی کے کام کرتے تھے۔ رشتے داروں کے حقوق غصب کرتے تھے۔پڑوسیوں کے ساتھ برا سلوک کرتے تھے۔ ہمارا ہر طاقت ور آدمی،کمزور کو دبا لیتا تھا۔ یہ تھی ہماری حالت، پھر اللہ تعالیٰ نے ہم میں اسی طرح ایک رسول بھیجا،جیسا کہ ہم سے پہلے لوگوں میں رسول بھیجے جاتے رہے ہیں، یہ رسول ہم ہی میں سے ہیں۔ ہم ان کا حسب نسب، ان کی سچائی اور پاک دامنی اچھی طرح جانتے ہیں۔ انہوں نے ہمیں اللہ تعالیٰ کی طرف بلایا کہ ہم اسے ایک جانیں، اس کی عبادت کریں اور یہ کہ اللہ کے سوا جن پتھروں اور بتوں کو ہمارے باپ دادا پوجتے چلے آئے ہیں،ہم انہیں چھوڑ دیں۔ انہوں نے ہمیں حکم دیا کہ ہم صرف اللہ تعالیٰ کی عبادت کریں۔ نماز پڑھیں، زکوٰۃ دیں، روزے رکھیں۔ انہوں نے ہمیں سچ بولنے،امانت پوری کرنے، رشتے داروں کی خبر گیری کرنے، پڑوسیوں سے اچھا سلوک کرنے، برائیوں اور خون بہانے سے بچنے اور بدکاری سے دور رہنے کا حکم دیا، اسی طرح گندی باتیں کرنے، یتیموں کا مال کھانے اور گھروں میں بیٹھنے والی عورتوں پر تہمت لگانے سے منع فرمایا۔ ہم نے ان کی تصدیق کی، ان پر ایمان لائے اور جو تعلیمات وہ لے کر آئے، ان کی پیروی کی۔ بس اس بات پر ہماری قوم ہماری دشمن بن گئی تاکہ ہمیں پھر پتھروں کی پوجا پر مجبور کر سکے۔ ان لوگوں نے ہم پر بڑے بڑے ظلم کیے۔ نئے سے نئے ظلم ڈھائے، ہمیں ہر طرح تنگ کیا۔ آخر کار جب ان کا ظلم حد سے بڑھ گیا اور یہ ہمارے دین کے راستے میں رکاوٹ بن گئے تو ہم آپ کی سرزمین کی طرف نکل پڑے، ہم نے دوسروں کے مقابلے میں آپ کو پسند کیا۔ ہم تو یہاں یہ امید لے کر آئے ہیں کہ آپ کے ملک میں ہم پر ظلم نہیں ہوگا۔‘‘
حضرت جعفر رضی اللہ عنہ کی تقریر سن کر نجاشی نے کہا:
’’کیا آپ کے پاس اپنے نبی پر آنے والی وحی کا کچھ حصہ موجود ہے؟‘‘
’’ہاں! موجود ہے۔‘‘ جواب میں حضرت جعفر بولے۔
’’وہ مجھے پڑھ کر سنائیں۔‘‘نجاشی بولا۔
اس پر انہوں نے قرآن کریم سے سورہ مریم کی چند ابتدائی آیات پڑھیں۔ آیات سن کر نجاشی اور اس کے درباریوں کی آنکھوں میں آنسو آ گئے۔ نجاشی بولا:
’’ہمیں کچھ اور آیات سناؤ۔‘‘
اس پر حضرت جعفر نے کچھ اور آیات سنائیں۔تب نجاشی نے کہا: 
’’اللہ کی قسم! یہ تووہی کلام ہے جو حضرت عیسیٰ علیہ السلام لیکر آئے تھے۔خداکی قسم میں ان لوگوں کو تمہارے حوالے نہیں کروں گا۔‘‘
اس طرح قریشی وفد ناکام لوٹا۔دوسری طرف مکہ کے مسلمان اسی طرح گھاٹی شعب ابی طالب میں مقیم تھے۔وہ اس میں تین سال تک رہے، یہ تین سال بہت مصیبتوں کے سال تھے، اسی گھاٹی میں حضرت عبداللہ ابن عباس رضی اللہ عنہ پیدا ہوئے، یہ حالات دیکھ کر کچھ نرم دل لوگ بھی غمگین ہوتے تھے، ایسے لوگ کچھ کھانا پینا ان حضرات تک کسی نہ کسی طرح پہنچا دیا کرتے تھے، ایسے میں اللہ تعالیٰ نے آپ صلی اللہﷺ کو اطلاع دی کہ قریش کے لکھے ہوئے معاہدے کو دیمک نے چاٹ لیا ہے۔معاہدے کے الفاظ میں سوائے اللہ کے نام کے اور کچھ باقی نہیں بچا، آنحضرت صلی اللہﷺ نے یہ بات ابو طالب کو بتائی، ابوطالب فوراً گئے اور قریش کے لوگوں سے کہا:
’’تمہارے عہد نامے کو دیمک نے چاٹ لیا ہے اور یہ خبر مجھے میرے بھتیجے نے دی ہے۔اس معاہدے پر صرف اللہ کا نام باقی رہ گیا ہے، اگر بات اسی طرح ہے جیسا کہ میرے بھتیجے نے بتایا ہے تو معاملہ ختم ہوجاتاہے، لیکن اگر تم اب بھی باز نہ آئے تو پھر سن لو،اللہ کی قسم! جب تک ہم میں آخری آدمی بھی باقی ہے، اس وقت تک ہم محمد صلی اللہعلیہ وسلم کوتمہارے حوالے نہیں کریں گے۔‘‘ 
یہ سن کر قریش نے کہا: 
’’ہمیں تمہاری بات منظور ہے…ہم معاہدے کو دیکھ لیتے ہیں۔‘‘
انہوں نے معاہدہ منگوایا، اس کو واقعی دیمک چاٹ چکی تھی۔صرف اللہ کا نام باقی تھا۔اس طرح مشرک اس معاہدے سے باز آگئے۔یہ معاہدہ جس شخص نے لکھا تھا، اس کا ہاتھ شل ہوگیا تھا۔
معاہدہ کا یہ حال دیکھنے کے بعد قریشی لوگ شعب ابی طالب پہنچے۔ انہوں نے نبی کریم صلی اللہ علیہ وسلم اور آپ کے ساتھیوں سے کہا: 
’’ آپ اپنے اپنے گھروں میں آجائیں۔ وہ معاہدہ اب ختم ہوگیا ہے۔‘‘
اس طرح تین سال بعد نبی اکرم صلی اللہ علیہ وسلم اور آپ کے ساتھی اپنے گھروں کو لوٹ آئے اور ظلم کا یہ باب بند ہوا۔
اس واقعے کے بعد نجران کا ایک وفد آپ صلی اللہ علیہ وسلم کی خدمت میں حاضر ہوا۔ یہ لوگ عیسائی تھے۔نجران ان کی بستی کا نام تھا۔ یہ بستی یمن اور مکہ کے درمیان واقع تھی اور مکے سے قریباً سات منزل دور تھی۔ اس وفد میں بیس آدمی تھے۔ نبی کریم صلی اللہ علیہ وسلم کے بارے میں انہیں ان مہاجرین سے معلوم ہوا تھا جو مکہ سے ہجرت کرکے حبشہ چلے گئے تھے۔ 
آنحضرت صلی اللہ علیہ وسلم اس وقت حرم میں تھے۔ یہ لوگ آپ کے سامنے بیٹھ گئے۔ 
ادھر قریش مکہ بھی آس پاس بیٹھے تھے۔ انہوں نے اپنے کان آپ صلی اللہ علیہ وسلم اور اس وفد کی بات چیت کی طرف لگادیے۔

غم کا سال

جب نجران کے یہ لوگ آپ صلی اللہ علیہ وسلم سے باتیں کرچکے تو آپ نے انہیں اسلام کی دعوت دی۔ قرآن کریم کی کچھ آیات پڑھ کر سنائیں۔ آیات سن کر ان کی آنکھوں میں آنسو آگئے۔ ان کے دلوں نے اس کلام کی سچائی کی گواہی دے دی۔چنانچہ فوراً ہی آپ صلی اللہ علیہ وسلم پر ایمان لے آئے۔ ان لوگوں نے اپنی مذہبی کتابوں میں آنحضرت صلی اللہ علیہ وسلم کی صفات اور خبریں پڑھ رکھی تھیں۔ اس لیے آپ کو دیکھ کر پہچان گئے کہ آپ ہی نبی آخرالزماں ہیں۔
اس کے بعد یہ لوگ اٹھ کر جانے لگے تو ابوجہل اور چند دوسرے قریشی سرداروں نے انہیں روکا اور کہا: 
’’ خدا تمہیں رسوا کرے، تمہیں بھیجا تو اس لیے گیا تھا کہ تم یہاں اس شخص کے بارے میں معلومات حاصل کرکے انہیں بتاؤ مگر تم اس کے پاس بیٹھ کر اپنا دین ہی چھوڑ بیٹھے…تم سے زیادہ احمق اور بے عقل قافلہ ہم نے آج تک نہیں دیکھا۔‘‘
اس پر نجران کے لوگوں نے کہا: 
’’ تم لوگوں کو ہمارا سلام ہے…ہم سے تمہیں کیا واسطہ، تم اپنے کام سے کام رکھو،ہمیں اپنی مرضی سے کام کرنے دو۔‘‘
اللہ تعالیٰ نے سورۃ المائدۃ میں ان کی تعریف بیان فرمائی۔ اسی طرح قبیلہ اَزد کے ایک شخص جن کا نام ضماد تھا مکہ آئے۔ یہ صاحب جھاڑ پھونک سے جنات کا اثر زائل کیا کرتے تھے۔ مکہ کے لوگوں کو انہوں نے یہ کہتے سنا کہ محمد پر جن کا اثر ہے۔ یہ سن کر انہوں نے کہا: 
’’ اگر میں اس شخص کو دیکھ لوں تو شاید اللہ تعالیٰ اسے میرے ہاتھ سے شفا عطا فرمادے۔‘‘
اس کے بعد وہ آپ صلی اللہ علیہ وسلم کی خدمت میں حاضر ہوئے۔ان کا بیان ہے،میں نے آپ سے کہا: 
’’ اے محمد! میں جھاڑ پھونک سے علاج کرتا ہوں، لوگ کہتے ہے کہ آپ پر جنات کا اثر ہے۔اگر بات یہی ہے تو میں آپ کا علاج کرسکتا ہوں۔‘‘
ان کی بات سن کر آپ صلی اللہ علیہ وسلم نے فرمایا: 
’’ تمام تعریف اللہ ہی کے لیے ہے، ہم اسی کی حمد و ثنا بیان کرتے ہیں اور اسی سے مدد مانگتے ہیں۔ جسے اللہ تعالیٰ ہدایت فرماتاہے، اسے کوئی گمراہ نہیں کرسکتا اور جسے اللہ تعالیٰ گمراہی نصیب کرتا ہے،اسے کوئی ہدایت نہیں دے سکتا۔ میں گواہی دیتا ہوں کہ اللہ تعالیٰ کے سوا کوئی معبود نہیں،اس کا کوئی شریک نہیں اور میں گواہی دیتا ہو کہ محمد اللہ کے رسول ہیں۔‘‘
انہوں نے آپ کی بات سن کر کہا: 
’’ یہ کلمات میرے سامنے دوبارہ پڑھیے۔‘‘
آپ نے کلمہ شہادت تین مرتبہ دہرایا۔تب انہوں نے کہا: 
’’ میں نے کاہنوں کے کلمات سنے ہیں۔جادوگروں اور شاعروں کے کلمات بھی سنے ہیں۔مگر آپ کے ان کلمات جیسے کلمات کبھی نہیں سنے۔ اپنا ہاتھ لایئے،میں اسلام قبول کرتا ہوں۔‘‘
چنانچہ ضماد رضی اللہ عنہ نے اسی وقت آپ کے ہاتھ پر بیعت کی۔آپ نے فرمایا: 
’’ اپنی قوم کے لیے بھی بیعت کرتے ہو۔‘‘
جواب میں انہوں نے کہا: 
’’ہاں! میں اپنی قوم کی طرف سے بھی بیعت کرتا ہوں۔‘‘
اس طرح یہ صاحب جو آپ پر سے جنات کا اثر اتارنے کی نیت سے آئے تھے، خود مسلمان ہوگئے۔ ایسے اور بھی بہت سے واقعات پیش آئے۔
نبی کریم صلی اللہ علیہ وسلم کی نبوت کو دس سال کا عرصہ گذر چکا تو آپ کی زوجہ محترمہ حضرت خدیجہ رضی اللہ عنہا انتقال کرگئیں۔اس سے چند دن پہلے ابوطالب فوت ہوگئے تھے۔ حضرت خدیجہ الکبریٰ رضی اللہ عنہا کو حجون کے قبرستان میں دفن کیا گیا۔ آپ صلی اللہ علیہ وسلم خود ان کی قبر میں اترے،انتقال کے وقت حضرت خدیجہ رضی اللہ عنہا کی عمر 65 سال تھی۔ اس وقت تک نماز جنازہ کا حکم نہیں ہوا تھا۔ اس سال کو سیرت نگاروں نے عام الحزن یعنی غم کا سال قرار دیا۔ کیونکہ ہر موقعے پر ساتھ دینے والی دو ہستیاں اس دنیا سے رخصت ہوگئی تھیں۔ آپ ہر وقت غمگین رہنے لگے،گھر سے بھی کم نکلتے، حضرت خدیجہ رضی اللہ عنہا شادی کے بعد پچیس سال تک آپ کے ساتھ رہیں۔اتنی طویل مدت تک آپ کا اور ان کا ساتھ رہا تھا۔
ابوطالب جب بیمار ہوئے تھے تو آپ صلی اللہ علیہ وسلم ان سے ملنے کے لیے آئے۔
اس وقت قریش کے سردار بھی وہاں موجود تھے۔آپ نے چچا سے فرمایا: 
’’ چچا! لا اللہ الا اللہ پڑھ لیجئے تاکہ میں قیامت کے دن آپ کی شفاعت کرسکوں۔‘‘
اس پر ابوطالب نے کہا: 
’’ خدا کی قسم بھتیجے! اگر مجھے یہ خوف نہ ہوتا کہ میرے بعد لوگ تمہیں اور تمہارے خاندان والوں کو شرم اور عار دلائیں گے اور قریش یہ کہیں گے کہ میں نے موت کے ڈر سے یہ کلمہ کہہ دیاتو میں یہ کلمہ پڑھ کر ضرور تمہارا دل ٹھنڈا کرتا۔ میں جانتا ہوں، تمہاری یہ کتنی خواہش ہے کہ میں یہ کلمہ پڑھ لوں…مگر میں اپنے بزرگوں کے دین پر مرتا ہوں۔‘‘
اس پر یہ آیت نازل ہوئی:
’’آپ جسے چاہیں ہدایت نہیں دے سکتے بلکہ جسے اللہ چاہے، ہدایت دیتا ہے اور ہدایت پانے والوں کاعلم بھی اسی کو ہے۔‘‘(سورۃ القصص: آیات 56)
اس طرح ابوطالب مرتے دم تک کافر ہی رہے، کفر پر ہی مرے۔ حضرت عباس رضی اللہ عنہ فرماتے ہیں، میں نے ایک مرتبہ رسول اللہ صلی اللہ علیہ وسلم سے پوچھا:
’’ اے اللہ کے رسول! ابوطالب ہمیشہ آپ کی مدد اور حمایت کرتے رہے، کیا اس سے انہیں آخرت میں فائدہ پہنچے گا۔‘‘
جواب میں آپ صلی اللہ علیہ وسلم نے ارشاد فرمایا: 
’’ہاں!مجھے ان کی قیامت کے دن کی حالت دکھائی گئی۔ میں نے انہیں جہنم کے اوپر والے حصے میں پایا، ورنہ وہ جہنم کے نچلے حصے میں ہوتے۔‘‘(بخاری مسلم)
ابوطالب کے مرنے پر آپ صلی اللہ علیہ وسلم نے فرمایا: 
’’ خدا کی قسم! میں اس وقت تک آپ کے لیے مغفرت کی دعا کرتا رہوں گا، جب تک کہ مجھے اللہ تعالیٰ ہی اس سے نہ روک دے۔‘‘
اس پر اللہ تعالیٰ نے یہ آیت نازل فرمائی: 
’’ پیغمبر کو اور دوسرے مسلمانوں کو جائز نہیں کہ مشرکوں کے لیے مغفرت کی دعا مانگیں۔اگرچہ وہ رشتے دار ہی کیوں نہ ہوں،اس امر کے ظاہر ہوجانے کے بعد یہ لوگ دوزخی ہیں۔‘‘(سورۃ التوبہ۔آیت ۱۱۳)
اس سے بھی ثابت ہوا کہ ابوطالب ایمان پر نہیں مرے۔
حضرت خدیجہ رضی اللہ عنہا کا انتقال رمضان کے مہینے میں ہوا تھا۔ ان کی وفات کے چند ماہ بعد آپ نے حضرت سودہ بنت زمعہ رضی اللہ عنہا سے شادی فرمائی۔آپ سے پہلے ان کی شادی ان کے چچا کے بیٹے سکران رضی اللہعنہ سے ہوئی تھی۔ حضرت سکران رضی اللہ عنہ دوسری ہجرت کے حکم کے وقت ان کے ساتھ حبشہ ہجرت کرگئے تھے۔ پھر مکہ واپس آگئے تھے۔اس کے کچھ عرصہ ہی بعد ان کا انتقال ہوگیا تھا۔ جب حضرت سودہ رضی اللہ عنہا کی عدت کا زمانہ پورا ہوگیا تو آپ صلی اللہ علیہ وسلم نے ان سے نکاح فرمایا۔ 
اس نکاح سے پہلے حضرت سودہ رضی اللہ عنہانے ایک عجیب خواب دیکھا تھا۔ انہوں نے اپنے شوہر سکران رضی اللہ عنہ سے یہ خواب بیان کیا۔ خواب سن کر سکران رضی اللہ عنہ نے کہا: 
’’ اگر تم نے واقعی یہ خواب دیکھا ہے تو میں جلد ہی مرجاؤں گا۔ اور رسول اللہ صلی اللہ علیہ وسلم تم سے نکاح فرمائیں گے۔‘‘
دوسری رات انہوں نے پھر خواب دیکھا کہ وہ لیٹی ہوئی ہے، اچانک چاند آسمان سے ٹوٹ کر ان کے پاس آگیا۔ انہوں نے یہ خواب بھی اپنے شوہر کو سنایا، وہ یہ خواب سن کر بولے: 
’’ اب شاید میں بہت جلد فوت ہوجاؤں گا۔‘‘
اور اسی دن حضرت سکران رضی اللہ عنہ انتقال کرگئے۔ شوال کے مہینے میں آنحضرت صلی اللہ علیہ وسلم نے حضرت عائشہ رضی اللہ عنہا سے نکاح فرمایا۔

طائف کا سفر

ابو طالب کے انتقال کے بعد قریش کھل کر سامنے آ گئے۔ ایک روز انہوں نے آپ کو پکڑ لیا، ہر شخص آپ کو اپنی طرف کھینچنے لگا…اور کہنے لگا:
’’یہ تو وہی ہے جس نے ہمارے اتنے سارے معبودوں کو ایک معبود بنا دیا۔‘‘
ایسے میں حضرت ابوبکر صدیق رضی اللہ عنہ تڑپ کر یک دم آگے آگئے۔ اس بھیڑ میں گھس گئے۔ کسی کو انہوں نے مار کر ہٹایا،کسی کو دھکا دیا، وہ ان لوگوں کو آپ سے ہٹاتے جاتے اور کہتے جاتے تھے:
’’کیا تم ایسے شخص کو قتل کرنا چاہتے ہو جو یہ کہتا ہے، میرا رب اللہ ہے۔‘‘
اس پر وہ لوگ حضرت ابوبکر رضی اللہ عنہ پر ٹوٹ پڑے اور انہیں اتنا مارا کہ وہ مرنے کے قریب ہوگئے۔ ہوش آیا تو حضور اکرم صلی اللہ علیہ وسلم کی خیریت معلوم کی، پتا چلا کہ خیریت سے ہیں تو اپنی تکلیف کو بھول گئے۔
شوال۰ ۱ نبوی میں حضور اکرم صلی اللہ علیہ وسلم طائف تشریف لے گئے۔ اس سفر میں صرف آپ کے غلام حضرت زید بن حارثہ رضی اللہ عنہ ساتھ تھے۔ طائف میں ثقیف کا قبیلہ آباد تھا۔ آپ یہ اندازہ کرنے کے لئے طائف تشریف لے گئے کہ قبیلہ ثقیف کے دلوں میں بھی اسلام کے لیے کچھ گنجائش ہے یا نہیں۔ آپ یہ امید بھی لے کر گئے تھے کہ ممکن ہے، یہ لوگ مسلمان ہو جائیں اور آپ کی حمایت میں اٹھ کھڑے ہوں۔
طائف پہنچ کر آپ نے سب سے پہلے اس قبیلے کے سرداروں کے پاس جانے کا ارادہ کیا۔ یہ تین بھائی تھے۔ ایک کا نام عبدیالیل تھا۔ دوسرے کا نام مسعود تھا۔ تیسرے کا نام حبیب تھا۔ ان تینوں کے بارے میں پوری طرح وضاحت نہیں ملتی کہ یہ بعد میں مسلمان ہوگئے تھے یا نہیں۔
بہر حال! آپ نے ان تینوں سے ملاقات کی۔ اپنے آنے کا مقصد بتایا،اسلام کے بارے میں بتایا، انہیں اسلام کی دعوت دینے کے ساتھ مخالفوں کے مقابلے میں ساتھ دینے کی دعوت دی۔ ان میں سے ایک نے کہا:
’’کیا وہ تم ہی ہو جسے خدا نے بھیجا ہے؟‘‘ ساتھ ہی دوسرے نے کہا:
’’ تمہارے علاوہ خدا کو رسول بنانے کے لئے کوئی اور نہیں ملا تھا؟‘‘اس کے ساتھ ہی تیسرا بول اٹھا:
’’خدا کی قسم! میں تم سے کوئی بات چیت نہیں کروں گا، کیونکہ اگر تم واقعی اللہ کے رسول ہو تو تمہارے ساتھ بات چیت کرنا بہت خطرناک ہے(یہ اس نے اس لیے کہا تھا کی وہ لوگ جانتے تھے، کسی نبی کے ساتھ بحث کرنا بہت خطرناک ہے) اور اگر تم نبی نہیں ہو تو تم جیسے آدمی سے بات کرنا زیب نہیں دیتا۔‘‘
آپ ان سے مایوس ہوکر اٹھ کھڑے ہوئے۔ان تینوں نے اپنے یہاں کے اوباش لوگوں کو اور اپنے غلاموں کو آپ کے پیچھے لگا دیا۔ وہ آپ کے گرد جمع ہوگئے۔ راستے میں بھی دونوں طرف لوگوں کا ہجوم ہوگیا۔ جب آپ ان کے درمیان سے گزرے تو وہ بد بخت ترین لوگ آپ صلی اللہ علیہ وسلم پر پتھر برسانے لگے۔ یہاں تک کہ آپ جو قدم اٹھاتے،وہ اس پر پتھر مارتے۔ آپ کے دونوں پاؤں لہولہان ہو گئے۔ آپ کے جوتے خون سے بھر گئے۔ جب چاروں طرف پتھر مارے گئے تو تکلیف کی شدت سے آپ بیٹھ گئے… ان بدبخت اوباشوں نے آپ کی بغلوں میں بازو ڈال کر آپ کو کھڑے ہونے پر مجبور کر دیا… جونہی آپ نے چلنے کے لئے قدم اٹھائے، وہ پھر پتھر برسانے لگے۔ساتھ میں وہ ہنس رہے تھے اور قہقہے لگا رہے تھے۔
زید بن حارثہ رضی اللہ عنہ کا یہ حال تھا کہ وہ آپ کو پتھروں سے بچانے کے لئے خود کو ان کے سامنے کر رہے تھے، اس طرح وہ بھی لہو لہان ہو گئے، لیکن اس حالت میں بھی انہیں آپ صلی اللہ علیہ وسلم کی فکر تھی، اپنی کوئی پروا نہیں تھی۔ ان کے اتنے زخم آئے کہ سر پھٹ گیا۔
آخر آپ صلی اللہ علیہ وسلم اس بستی سے نکل کر ایک باغ میں داخل ہو گئے۔ اس طرح ان بدبخت ترین لوگوں سے چھٹکارا ملا۔ آپ اور زید بن حارثہ رضی اللہ عنہ اس وقت تک زخموں سے بالکل چور ہو چکے تھے اور بدن لہو لہان تھے۔ آپ ایک درخت کے سائے میں بیٹھ گئے۔ آپ نے اللہ سے دعا کی:
’’اے اللہ! میں اپنی کمزوری، لا چاری اور بے بسی کی تجھ سے فریاد کرتا ہوں۔ یا ارحم الراحمین! تو کمزوروں کا ساتھی ہے اور تو ہی میرا رب ہے اور میں تجھ ہی پر بھروسہ کرتا ہوں…اگر مجھ پر تیرا غضب اور غصہ نہیں ہے تو مجھے کسی کی پروا نہیں۔‘‘
اُسی وقت اچانک آپ نے دیکھا کہ وہاں باغ کے مالک عتبہ اور شیبہ بھی موجود ہیں۔وہ بھی دیکھ چکے تھے کہ طائف کے بدمعاشوں نے آپ کے ساتھ کیا سلوک کیا ہے۔ انہیں دیکھتے ہی آپ اٹھ کھڑے ہوئے، کیونکہ آپ کو معلوم تھا کہ وہ دونوں اللہ کے دین کے دشمن ہیں۔ ادھر ان دونوں کو آپ کی حالت پر رحم آگیا۔ انہوں نے فوراً اپنی نصرانی غلام کو پکارا۔ اس کا نام عداس تھا۔ عداس حاضر ہوا تو انہوں نے اسے حکم دیا:
’’اس بیل سے انگور کا خوشہ توڑو اور ان کے سامنے رکھ دو۔‘‘
عداس نے حکم کی تعمیل کی۔ انگور آپ کو پیش کیے۔ آپ نے جب انگور کھانے کے لیے ہاتھ بڑھایا تو فرمایا:
’’بسم اللہ!‘‘
عداس نے آپ کے منہ سے بسم اللہ سنا تو اس نے اپنے آپ سے کہا: 
’’اس علاقے کے لوگ تو ایسا نہیں کہتے۔‘‘
آپ صلی اللہ علیہ وسلم نے اس سے پوچھا:
’’تم کس علاقے کے رہنے والے ہو،تمہارا دین کیا ہے؟‘‘
عداس نے بتایا کہ وہ نصرانی ہے اور نینویٰ کا رہنے والا ہے ۔اس کے منہ سے نینویٰ کا نام سن کر آپ نے فرمایا:
’’ تم تو یونس (علیہ السلام) کے ہم وطن ہو جو متی کے بیٹے تھے۔‘‘
عداس بہت حیران ہوا،بولا:
’’آپ کو یونس بن متی کے بارے میں کیسے معلوم ہوا، خدا کی قسم جب میں نینویٰ سے نکلا تھا تو وہاں دس آدمی بھی ایسے نہیں تھے جو یہ جانتے ہوں کہ یونس بن متی کون تھے۔ اس لیے آپ کو یونس بن متی کے بارے میں کیسے معلوم ہو گیا؟‘‘
اس پر نبی اکرم صلی اللہ علیہ وسلم نے فرمایا:
’’وہ میرے بھائی تھے،اللہ کے نبی تھے اور میں بھی اللہ کا رسول ہوں، اللہ تعالیٰ ہی نے مجھے ان کے بارے میں بتایا ہے اور یہ بھی بتایا ہے کہ ان کی قوم نے ان کے ساتھ کیا سلوک کیا تھا۔‘‘
آپ کی زبانِ مبارک سے یہ الفاظ سنتے ہی عداس فوراً آپ کے نزدیک آگیا اور آپ کے ہاتھوں اور پیروں کو بوسہ دینے لگا۔
باغ کے مالک عتبہ اور شیبہ دور کھڑے یہ سب دیکھ رہے تھے ۔انہوں نے عداس کو آپ کے قدم چومتے دیکھا تو ان میں سے ایک نے دوسرے سے کہا:
’’تمہارے اس غلام کو تو اس شخص نے گمراہ کردیا۔‘‘
پھر عداس ان کی طرف آیاتو ایک نے اس سے کہا:
’’تیرا ناس ہو،تجھے کیا ہوگیا تھا کہ تو اس کے ہاتھ اور پیر چھونے لگا تھا۔‘‘اس پر عداس بولا:
’’میرے آقا! اس شخص سے بہتر انسان پوری زمین پر نہیں ہوسکتا، اس نے مجھے ایسی بات بتائی ہے جو کوئی نبی ہی بتا سکتا ہے۔‘‘
یہ سن کر عتبہ نے فوراً کہا:
’’تیرا برا ہو،اپنے دین سے ہرگز مت پھرنا۔‘‘
ان عداس کے بارے میں آتا ہے کہ یہ مسلمان ہوگئے تھے۔ عتبہ اور شیبہ کے باغ سے نکل کر آپ قرن ثعالب کے مقام پر پہنچے۔ یہاں پہنچ کر آپ نے سر اٹھایا تو ایک بدلی آپ پر سایہ کئے نظرآئی۔ اس بدلی میں آپ کو جبرئیل علیہ السلام نظر آئے،انہوں نے آپ سے کہا:
’’آپ نے اپنی قوم یعنی بنی ثقیف کو جو کہا اور انہوں نے جو جواب دیا، اس کو اللہ تعالیٰ نے سُن لیا ہے اور مجھے پہاڑوں کے نگران کے ساتھ بھیجا ہے، اس لئے بنی ثقیف کے بارے میں جو چاہیں،اس فرشتے کو حکم دیں۔‘‘
اس کے بعد پہاڑوں کے فرشتے نے آنحضرت صلی اللہ علیہ وسلم کو پکارا اور عرض کیا:
’’اے اللہ کے رسول! اگر آپ چاہیں تو میں ان پہاڑوں کے درمیان اس قوم کو کچل دوں یا انہیں زمین میں دھنسا کر ان کے اوپر پہاڑ گرا دوں۔‘‘

جنات سے ملاقات

پہاڑوں کے فرشتے کی بات کے جواب میں آپﷺ نے فرمایا:
’’نہیں! مجھے توقع ہے کہ اللہ تعالی ان کی اولاد میں ضرور ایسے لوگ پیدا فرمائے گا جو اللہ تعالیٰ کی عبادت کریں گے اور اس کے ساتھ کسی کو شریک نہیں ٹھہرائیں گے۔‘‘
اس پر پہاڑوں کے فرشتے نے جواب دیا:
’’اللہ تعالی نے جیسا آپﷺ کو نام دیا ہے آپﷺ حقیقت میں رؤف و رحیم ہیں یعنی بہت معاف کرنے والے اور بہت رحم کرنے والے ہیں۔‘‘
طائف کے اسی سفر سے واپسی پر نو(۹) جنوں کا آپﷺ کے پاس سے گزر ہوا۔وہ نصیبین کے رہنے والے تھے۔ یہ شام کے ایک شہر کا نام ہے۔آپﷺ اس وقت نماز پڑھ رہے تھے۔ جنات نے آپﷺ کی قرات کی آواز سنی تو اسی وقت مسلمان ہو گئے۔ پہلے وہ یہودی تھے۔
طائف سے واپسی پر آپﷺ مکہ میں داخل ہوئے تو حرم میں آئے اور بیت اللہ کا طواف فرمایا۔ اس کے بعد گھر تشریف لے گئے۔
ادھر ۹ جن جب اپنی قوم میں گئے تو انہوں نے باقی جنوں کو آپﷺ کے بارے میں بتایا،چنانچہ وہ سب کے سب مکہ پہنچے۔ انہوں نے حجون کے مقام پر قیام کیا اور ایک جن کو آپﷺ کی خدمت میں بھیجا۔اس نے آپﷺ سے عرض کیا:
’’میری قوم حجون کے مقام پر ٹھہری ہوئی ہے آپﷺ وہاں تشریف لے چلئے۔‘‘
آپﷺ نے اس سے وعدہ فرمایا کہ آپﷺ رات میں کسی وقت حجون آئیں گے۔ حجون مکہ کے ایک قبرستان کا نام تھا۔ رات کے وقت آپﷺ وہاں پہنچے۔ حضرت عبداللہ ابن مسعودؓ آپﷺ کے ساتھ تھے۔ حجون پہنچ کر آپﷺ نے حضرت عبداللہ بن مسعودؓ کے گرد ایک خط کھینچ دیا اور فرمایا:
’’اس سے باہر مت نکلنا،اگر تم نے دائرے سے باہر قدم رکھ دیا تو قیامت کے دن تک تم مجھے نہیں دیکھ پاؤ گے اور نہ میں تمہیں دیکھ سکوں گا۔‘‘
ایک روایت کے مطابق آپﷺ نے ان سے یہ فرمایا:
’’میرے آنے تک تم اسی جگہ رہو۔تمہیں کسی چیز سے ڈر نہیں لگے گا، نہ کسی چیز کو دیکھ کر ہول محسوس ہو گا۔‘‘
اس کے بعد آپﷺ کچھ فاصلے پر جا کر بیٹھ گئے۔ اچانک آپﷺ کے پاس بالکل سیاہ فام لوگ آئے۔ یہ کافی تعداد میں تھے اور آپﷺ پر ہجوم کر کے ٹوٹے پڑ رہے تھے، یعنی قرآن پاک سننے کی خواہش میں ایک دوسرے پر گر رہے تھے۔
اس موقع پر حضرت عبد اللہ ابن مسعودؓ نے چاہا کے آگے بڑھ کر ان لوگوں کو آپﷺ کے پاس سے ہٹا دیں، لیکن پھر انہیں آپﷺ کا ارشاد یاد آگیا اور وہ اپنی جگہ سے نہ ہلے۔ ادھر جنات نے آپﷺ سے کہا:
’’اے اللہ کے رسول ﷺ! ہم جس جگہ کے رہنے والے ہیں یعنی جہاں ہمیں جانا ہے وہ جگہ دور ہے، اس لئے ہمارے اور ہماری سواریوں کے لئے سامان سفر کا انتظام فرما دیجیے۔‘‘
جواب میں آپﷺ نے ارشاد فرمایا:
’’ہر وہ ہڈی جس پر اللہ کا نام لیا گیا ہو،جب تمہارے ہاتھوں میں پہنچے گی تو پہلے سے زیادہ پر گوشت ہو جائے گی اور یہ لید اور گوبر تمہارے جانوروں کا چارہ ہے۔‘‘
اس طرح جنات آپﷺ پر ایمان لائے۔ 

حضرت طفیل بن عمرو دوسیؓ کا قبول اسلام

طفیل بن عمرو دوسیؓ ایک اونچے درجے کے شاعر تھے۔ یہ ایک مرتبہ مکہ آئے۔ ان کی آمد کی خبر سن کر قریش ان کے گرد جمع ہو گئے۔ انہوں نے طفیل بن عمرو دوسیؓ سے کہا:
’’آپ ہمارے درمیان ایسے وقت میں آئے ہیں جب کہ ہمارے درمیان اس شخص نے اپنا معاملہ بہت پیچیدہ بنا دیا ہے۔ اس نے ہمارا شیرازہ بکھیر کر رکھ دیا ہے۔ہم میں پھوٹ ڈال دی ہے۔اس کی باتوں میں جادو جیسا اثر ہے،اس نے دو سگے بھائیوں میں پھوٹ ڈال دی ہے۔ اب ہمیں آپ کی اور آپ کی قوم کی طرف سے بھی پریشانی لاحق ہو گئی ہے،اس لئے اب آپ نہ تو اس سے کوئی بات کریں اور نہ اس کی کوئی بات سنیں۔‘‘
انہوں نے ان پر اتنا دباؤڈالا کہ وہ یہ کہنے پر مجبور ہو گئے:
’’نہ میں محمد کی کوئی بات سنوں گا اور نہ ان سے کوئی بات کروں گا۔‘‘
دوسرے دن طفیل بن عمرو دوسیؓ کعبہ کا طواف کرنے کے لئے گئے تو انہوں نے اپنے کانوں میں کپڑا ٹھونس لیاکہ کہیں ان کی کوئی بات ان کے کانوں میں نہ پہنچ جائے۔ آپﷺ اس وقت کعبہ میں نماز پڑھ رہے تھے۔یہ آپﷺ کے قریب ہی کھڑے ہو گئے۔ اللہ کو یہ منظور تھا کہ آپﷺ کا کچھ کلام ان کے کانوں میں پڑ جائے۔چنانچہ انہوں نے ایک نہایت پاکیزہ اور خوب صورت کلام سنا۔ وہ اپنے دل میں کہنے لگے: ’’میں اچھے اور برے میں تمیز کر سکتا ہوں۔اس لئے ان صاحب کی بات سن لینے میں حرج ہی کیا ہے۔ اگر یہ اچھی بات کہتے ہیں تو میں قبول کر لو ں گا اور بری بات ہوئی تو چھوڑ دوں گا۔‘‘
کچھ دیر بعد آپﷺ نماز سے فارغ ہو کر اپنے گھر کی طرف چلے تو انہوں نے کہا:
’’اے محمد! آپ کی قوم نے مجھ سے ایسا ایسا کہا ہے، اسی لئے میں نے آپ کی باتوں سے بچنے کے لئے کانوں میں کپڑا ٹھونس لیا تھا، مگر آپ اپنی بات میرے سامنے پیش کریں۔‘‘
یہ سن کر آپﷺ نے ان پر اسلام پیش کیا اور ان کے سامنے قرآن کریم کی تلاوت فرمائی،قرآن سن کر طفیل بن عمرو دوسیؓ بول اٹھے:
’’اللہ کی قسم میں نے اس سے اچھا کلام کبھی نہیں سنا۔‘‘
اس کے بعد انہوں نے کلمہ پڑھا اور مسلمان ہو گئے۔ پھر انہوں نے عرض کیا:
’’اے اللہ کے نبی ﷺ! میں اپنی قوم میں اونچی حیثیت کا مالک ہوں،وہ سب میری بات سنتے ہیں…مانتے ہیں، میں واپس جا کر اپنی قوم کو اسلام کی دعوت دوں گا۔اس لئے آپﷺ میرے لئے دعا فرمائیں۔‘‘
اس پر آپﷺ نے ان کے لئے دعا فرمائی۔
پھر وہ واپس روانہ ہو گئے۔ اپنی بستی کے قریب پہنچے تو وہاں انہیں پانی کے پاس قافلے کھڑے نظر آئے۔ عین اس وقت ان کی دونوں آنکھوں کے درمیاں چراغ کی مانند ایک نور پیدا ہو گیا اور ایسا آپﷺ کی دعا کی وجہ سے ہوا تھا۔ رات بھی اندھیری تھی۔ اس وقت انہوں نے دعا کی:
’’اے اللہ! اس نور کو میرے چہرے کے علاوہ کسی اور چیز میں پیدا فرما دے۔ مجھے ڈر ہے، میری قوم کے لوگ یہ نہ کہنے لگیں کہ دین بدلنے کی وجہ سے اس کی شکل بگڑ گئی۔‘‘
چنانچہ اسی وقت وہ نور ان کے چہرے سے ان کے کوڑے میں آگیا ۔اب ان کا کوڑا کسی قندیل کی طرح روشن ہوگیا۔
اسی بنیاد پر حضرت طفیل بن عمرو دوسی رضی اللہ عنہ کو ذی النور کہا جانے لگا…یعنی نور والے وہ گھر پہنچے تو ان کے والد ان کے پاس آئے۔انہوں نے ان سے کہا: 
’’آپ میرے پاس نہ آئیں،اب میرا آپ سے کوئی کوئی تعلق نہیں اور نہ آپ کا مجھ سے کوئی تعلق رہ گیا ہے۔‘‘
یہ سن کر ان کے والد نے پوچھا: 
’’کیوں بیٹے! یہ کیا بات ہوئی؟‘‘ 
انہوں نے جواب دیا: 
’’میں مسلمان ہوگیاہوں،میں نے محمدﷺ کا دین قبول کرلیاہے۔‘‘یہ سنتے ہی ان کے والد بول اٹھے: 
’’بیٹے جو تمہارا دین ہے،وہی میرا دین ہے۔‘‘
تب طفیل بن عمرو دوسی رضی اللہ عنہ نے انہیں غسل کرنے اور پاک کپڑے پہننے کے لیے کہا۔جب وہ ایسا کرچکے تو ان پر اسلام پیش کیا ۔وہ اسی وقت کلمہ پڑھ کر مسلمان ہوگئے ۔ پھر ان کی بیوی ان کے پاس آئیں۔انہوں نے بھی اسلام قبول کرلیا ۔
اب انہوں نے اپنی قوم کے لوگوں پر اسلام پیش کیا…وہ لوگ بگڑ گئے۔

مسجد الحرام سے مسجد اقصیٰ تک

ان کا یہ حال دیکھ کر حضرت طفیل بن عمرو رضی اللہ عنہ پھر حضور نبی کریم ﷺ کے پاس گئے اور آپ سے عرض کیا: 
’’اے اللہ کے رسول!قومِ دوس مجھ پر غالب آگئی،اس لئے آپ ان کیلئے دعا فرمائیے ۔‘‘
آپﷺ نے دعا فرمائی: 
’’اے اللہ! قوم دوس کو ہدایت عطا فرما،انہیں دین کی طرف لے آ۔
حضرت طفیل بن عمرو دوسی رضی اللہ عنہ پھر اپنے لوگوں میں گئے۔انہوں نے پھر دین اسلام کی تبلیغ شروع کی…وہ مسلسل انہیں تبلیغ کرتے رہے، یہاں تک کہ حضور نبی کریم ﷺ مکہ سے ہجرت کرکے مدینہ تشریف لے گئے۔آخر وہ لوگ ایمان لے آئے۔ حضرت طفیل بن عمرو دوسی رضی اللہ عنہ انہیں ساتھ لے کر مدینہ آئے،اس وقت تک غزوہ بدر، غزوہ احد، اور غزوہ خندق ہوچکے تھے اور نبی کریم ﷺ خیبر کے مقام پر موجود تھے ۔حضرت طفیل بن عمرو دوسی کے ساتھ ستر، اسی گھرانوں کے لوگ تھے،ان میں حضرت ابو ہریرہ رضی اللہ عنہ بھی تھے۔چونکہ یہ لوگ وہاں غزوہ خیبر کے وقت پہنچے تھے، اس لئے نبی کریم ﷺ نے تمام مسلمانوں کے ساتھ ان کا بھی حصہ نکالا۔اگرچہ وہ جنگ میں شریک نہیں ہوئے تھے۔
طائف کے سفر کے بعد معراج کا واقعہ پیش آیا جو حضور نبی کریم ﷺ پر اللہ تعالیٰ کا خاص انعام اور نبوت کا بہت بڑا معجزہ ہے۔یہ واقعہ اس طرح ہواکہ حضورﷺ مکہ معظمہ میں حضرت ام ہانی رضی اللہ عنہا کے گھر رات کو آرام فرمارہے تھے کہ اللہ تعالیٰ نے حضرت جبرئیل علیہ السلام اور حضرت میکائیل علیہ السلام کو آپ کے پاس بھیجا۔ وہ آپ کو مسجد الحرام لے گئے۔ پھر وہاں سے براق پر سوار کرکے مسجد اقصیٰ لے گئے جہاں تمام انبیاء علیہم السلام نے آپ کی اقتداء میں نماز اداکی۔اس کے بعد آپ کو ساتوں آسمانوں کی سیر کرائی گئی اور آپ اللہ تعالیٰ سے ہم کلام ہوئے۔اس سفر کی کچھ اہم تفصیلات یہ ہیں:
حضور نبی کریم ﷺ بیت المقدس پہنچنے سے پہلے حضرت جبرئیل کے ساتھ چلے جارہے تھے کہ راستے میں ایک سرسبز علاقے سے گزر ہو۱۔حضرت جبرئیل علیہ السلام نے آپ سے کہا: 
’’یہاں اترکر دو رکعت نماز پڑھ لیجیے۔‘‘
آپ نے براق سے اترکر دو رکعتیں ادا کیں۔جبرئیل علیہ السلام نے پوچھا،آپ کو معلوم ہے یہ کونسا مقام ہے۔آپ نے فرمایا نہیں۔تب جبرئیل علیہ السلام نے کہا: 
’’یہ آپ نے طیبہ یعنی مدینہ منورہ میں نماز پڑھی ہے اور یہی آپ کی ہجرت گاہ ہے۔‘‘(یعنی مکہ سے ہجرت کرکے آپ نے یہیں آنا ہے) 
اس کے بعد براق پھر روانہ ہوا۔اس کا ہر قدم جہاں تک نظر جاتی تھی وہاں پڑتا تھا۔ایک اور مقام پر حضرت جبرئیل علیہ السلام نے کہا:
’’ آپ یہاں اترکر نماز پڑھیے۔‘‘آپ نے وہاں بھی دو رکعت اداکی۔انہوں نے بتایا: 
’’آپ نے مدین میں نماز پڑھی ہے۔‘‘
اس بستی کا نام مدین حضرت ابراہیم علیہ السلام کے بیٹے مدین کے نام پر رکھاگیا تھا۔
انہوں نے اسی مقام پر قیام کیا تھا۔اس کے بعد وہاں آبادی ہوگئی تھی۔حضرت شعیب علیہ السلام اسی بستی میں مبعوث ہوئے تھے۔
اس کے بعد پھر آپ اسی براق پر سوار ہوئے۔ایک مقام پر حضرت جبرئیل علیہ السلام نے آپ سے کہا:
’’اب یہاں اتر کر نماز پڑھیے۔‘‘آپ نے وہاں بھی دو رکعت نماز ادا کی۔جبرئیل علیہ السلام نے بتایا:
’’ یہ بیت اللحم ہے۔‘‘
بیت اللحم بیت المقدس کے پاس ایک بستی ہے جہاں حضرت عیسٰی علیہ السلام کی پیدائش ہوئی تھی۔
اسی سفر میں آپ نے اللہ کے راستے میں جہاد کرنے والوں کا حال دیکھا۔یعنی آپ کو آخرت کی مثالی شکل کے ذریعے مجاہدین کے حالات دکھائے گئے۔حضرت جبرئیل علیہ السلام نے بتایا:
’’یہ اللہ کی راہ میں جہاد کرنے والے لوگ ہیں۔ اللہ نے ان کی ہر نیکی کا ثواب سات سو گنا کردیا ہے۔
اسی طرح آنحضرت صلی اللہ علیہ و سلم کے سامنے دنیا لائی گئی،دنیا ایک حسین و جمیل عورت کی صورت میں دکھائی گئی۔اس عورت نے آپ سے کہا:
’’اے محمد! میری طرف دیکھیے میں آپ سے کچھ کہنا چاہتی ہوں۔‘‘ 
آپ نے اس کی طرف کوئی توجہ نہیں دی اور جبرئیل علیہ السلام سے پوچھا:
’’یہ کون ہے؟ ‘‘
انہوں نے بتایا:
’’یہ دنیا ہے اگر آپ اس طرف توجہ دیتے تو آپ کی امت آخرت کے مقابلہ میں دنیا کو اختیار کرلیتی۔‘‘
اس کے بعد آپ نے راستے میں ایک بڑھیا کو دیکھا آپ نے پوچھا:
’’یہ کون ہے؟‘‘
جبرئیل علیہ السلام نے بتایا:
’’یہ دنیا ہی ہے،دنیا کی عمر کا اتنا حصہ ہی باقی رہ گیا ہے جتنا کہ اس بڑھیا کا ہوسکتا ہے۔‘‘
اس کے بعد امانت میں خیانت کرنے والے فرض نماز کو چھوڑنے والے،زکوٰۃ ادا نہ کرنے والے، بدکاری کرنے والے، رہزنی کرنے والے،(ڈاکہ ڈالنے والے)دکھائے گئے۔ان کے بھیانک انجام آپ کو دکھائے گئے۔
امانت میں خیانت کرنے والے اپنے بوجھ میں اضافہ کیے جارہے تھے اور بوجھ کو اٹھانے کے قابل نہیں تھے۔فرض نمازوں کو چھوڑنے والوں کے سر کو کچلا جارہا تھا۔ان کے سر ریزہ ریزہ ہو رہے تھے اور پھر اصل حالت میں آجاتے تھے ۔کچلنے کا عمل پھر شروع ہوجاتا تھا، غرض انہیں ذرہ بھر مہلت نہیں دی جارہی تھی۔
اپنے مال میں زکوٰۃ ادا نہ کرنے والوں کا انجام آپ نے دیکھا کہ ان کے ستر پر آگے اور پیچھے پھٹے ہوئے چیتھڑے لٹکے ہوئے تھے وہ اونٹوں اور بکریوں کی طرح چررہے تھے…اور زقوم درخت کے کڑوے پتے اور کانٹے کھا رہے تھے، زقوم درخت کے بارے میں آتا ہے کہ اس قدر کڑوا اور زہریلا ہے کہ اس کی کڑواہٹ کا مقابلہ دنیا کا کوئی درخت نہیں کرسکتا ۔ اس کا ایک ذرہ دنیا کے میٹھے دریاؤں میں ڈال دیا جائے تو تمام دریا کڑوے ہو جائیں۔نبی اکرم صلی اللہ علیہ و سلم کا دنیا میں مذاق اڑانے والوں کو بھی یہ درخت کھلایا جائے گا۔اس درخت کے پتوں اور کانٹوں کے علاوہ وہ لوگ جہنم کے پتھر چباتے نظر آئے۔
بدکاروں کا انجام آپ نے دیکھا کہ ان کے سامنے دسترخوان لگے ہوئے تھے ۔ان دسترخوانوں میں سے کچھ پرنہایت بہترین بھنا ہوا گوشت تھا، کچھ میں بالکل سڑا ہوا گوشت تھا۔وہ اس بہترین گوشت کو چھوڑ کر سڑا ہوا بدبودار گوشت کھا رہے تھے اور بہترین گوشت نہیں کھا رہے تھے۔ان کے بارے میں جبرئیل علیہ السلام نے آپ کو بتلایا:
’’یہ آپ کی امت کے وہ لوگ ہیں جن کے پاس پاک اور حلال عورتیں تھیں لیکن وہ ان کو چھوڑ کر بدکار عورتوں کے پاس جاتے تھے، یا یہ وہ عورتیں تھیں جن کے خاوند تھے،لیکن وہ ان کو چھوڑ کر بدکار مردوں کے پاس جاتی تھیں۔‘‘
سود کھانے والوں کا انجام آپ کو یہ دکھایا گیا کہ وہ خون کے دریا میں تیر رہے تھے اور پتھر نگل رہے تھے۔
آپ کو ایسے عالموں کا انجام دکھایا گیا جو لوگوں کو وعظ کیا کرتے تھے اور خود بے عمل تھے،ان کی زبانیں اور ہونٹ لوہے کی قینچیوں سے کاٹے جارہے تھے،اور جیسے ہی کٹ جاتے تھے،فوراً پیدا ہو جاتے تھے اور پھر اسی طرح کاٹے جانے کا عمل شروع ہو جاتا تھا۔یعنی انہیں ایک لمحے کی بھی مہلت نہیں مل رہی تھی۔
چغل خوروں کے ناخن تانبے کے تھے اور وہ ان سے اپنے چہرے اور سینے نوچ رہے تھے۔
مسجد اقصیٰ میں انبیاء علیہم السلام کی نماز میں امامت فرمانے کے بعد حضور اکرم صلی اللہ علیہ وسلم کو ساتوں آسمانوں کی سیر کرائی گئی، جلیل القدر انبیاء علیہم السلام سے ملاقات کرائی گئی۔ پھر آپ صلی اللہ علیہ وسلم کو جنت کا حال دکھایا گیا۔ آپ کا گزر جنت کی ایک وادی سے ہوا۔ اس سے نہایت بھینی بھینی خوشبو آرہی تھی اور مشک سے زیادہ خوشبودار ٹھنڈی ہوا آرہی تھی اور ایک بہترین آواز سنائی دے رہی تھی۔ وہ آواز کہہ رہی تھی:
’’میرے عشرت کدے میں ریشم،موتی،سونا،چاندی،مونگے،شہد، دودھ اور شراب کے جام و کٹورے بہت زیادہ ہوگئے ہیں۔‘‘
اس پر اللہ تعالیٰ فرمارہے ہیں:
’’ہر وہ مؤمن مرد اور عورت تجھ میں داخل ہوگا جو مجھ پر اور میرے رسولوں پر ایمان رکھتا ہوگا،میرے ساتھ کسی کو شریک نہ ٹھہراتا ہوگا… نہ مجھ سے بڑھ کر یا میرے برابر کسی کو مانتا ہوگا۔ سن لے! جس کے دل میں میرا ڈر ہے، اس کا دل میرے خوف کی وجہ سے محفوظ رہتا ہے، جو مجھ سے مانگتا ہے میں اسے محروم نہیں رکھوں گا، جو مجھے قرض دیتا ہے یعنی نیک عمل کرتاہے اور میری راہ میں خرچ کرتا ہے میں اسے بدلہ دوں گا، جو مجھ پر توکل اور بھروسہ کرتا ہے اس کی جمع پونجی کو اس کی ضرورت کے لئے پورا کرتا رہوں گا، میں ہی سچا معبود ہوں، میرے علاوہ کوئی عبادت کے لائق نہیں، میرا وعدہ سچا ہے، غلط نہیں ہوتا، مؤمن کی نجات یقینی ہے اور اللہ تعالیٰ ہی برکت دینے والا ہے اور سب سے بہترین خالق یعنی پیدا کرنے والا ہے۔‘‘
یہ سن کر میں نے کہا:
’’بس اے میرے پروردگار میں خوش اور مطمئن ہوں۔‘‘

اللہ سے ہم کلامی

دوزخ کا حال یہ دکھایا گیاکہ آپ وادی میں پہنچے۔وہاں آپ نے ایک بہت بدنما آواز سنی۔ آپ نے بدبو بھی محسوس کی۔ آپ نے پوچھا: 
’’ جبرئیل! یہ کیا ہے؟‘‘
انہوں نے بتایا: 
’’یہ جہنم کی آواز ہے، یہ کہہ رہی ہے ۔ اے میرے پروردگار!مجھے وہ غذا دے جس کا تونے مجھ سے وعدہ کیا ہے۔ میری زنجیریں اور بیڑیاں، میری آگ، میرے شعلے، گرمی، گرم ہوا، پیپ اور عذاب کے دوسرے ہیبت ناک سامان بہت بڑھ گئے ہیں، میری گہرائی اور اس گہرائی میں آگ کی تپش یعنی میرا پیٹ اور اس کی بھوک بہت زیادہ ہے، اس لیے مجھے میری وہ خوراک دے جس کا تونے مجھ سے وعدہ کیا ہے۔‘‘
جہنم کی اس پکار کے جواب میں اللہ تعالیٰ نے فرمایا: 
’’ہر کافر اور مشرک، بدطینت، بدمعاش اور خبیث مرد اور عورت تیری خوراک ہیں۔‘‘
یہ سن کر جہنم نے جواب دیا: 
’’بس! میں خوش ہوگئی۔‘‘
اسی سفر میں آپ کو دجال کی صورت دکھائی گئی۔ اس کی شکل عبدالعزیٰ ابن قطن جیسی تھی۔یہ عبدالعزیٰ جاہلیت کے زمانے میں، نبی اکرم صلی اللہ علیہ وسلم کے ظہور سے پہلے ہی مرگیا تھا۔
آپ کو وہاں کچھ لوگ دکھائے گئے۔ان کے ہونٹ اونٹوں کے ہونٹوں جیسے تھے اور ان کے ہاتھوں میں پتھروں کی طرح کے بڑے بڑے انگارے تھے۔ یعنی اتنے بڑے بڑے تھے کہ ایک ایک انگارے میں ان کا ہاتھ بھرگیا تھا۔ وہ لوگ انگاروں کو اپنے منہ میں ڈالتے تھے۔ آپ نے یہ منظر دیکھ کر جبرئیل علیہ السلام نے پوچھا: 
’’ جبرئیل! یہ کون لوگ ہیں؟ ‘‘ جواب میں انہوں نے بتایا: 
’’یہ وہ لوگ ہیں جو زبردستی اور ظلم سے یتیموں کا مال کھاتے تھے۔‘‘
اس کے بعد آپ نے کچھ لوگ دیکھے ، ان کے پیٹ اتنے بڑے بڑے تھے کہ جیسے گھر میں کوٹھڑیاں ہوں،ان کے پیٹوں میں سانپ بھرے ہوئے تھے،وہ باہر سے نظر آرہے تھے۔آپ نے جبرئیل علیہ السلام سے پوچھا:’’یہ کون لوگ ہیں؟‘‘
انہوں نے بتایا کہ :’’یہ سود خور ہیں۔‘‘
پھر آپ نے ایسے لوگ دیکھے، جن کے سامنے ایک طرف بہترین قسم کا گوشت رکھا تھا۔ دوسری طرف سڑا ہوا بدبودار گوشت تھا۔ وہ اچھا گوشت چھوڑ کر بدبودار گوشت کھا رہے تھے۔ آپ نے جبرئیل علیہ السلام سے پوچھا: 
’’ یہ کون لوگ ہے۔‘‘
انہوں نے بتایا: 
’’ یہ وہ لوگ ہیں جن کو اللہ تعالیٰ نے پاک دامن عورتیں یعنی بیویاں دی تھیں مگر یہ انہیں چھوڑ کر دوسری عورتوں کے پاس جاتے تھے۔یا وہ ایسی عورتیں ہیں جو اپنے خاوند کو چھوڑ کر دوسرے مردوں کے پاس جاتی تھیں۔ ‘‘
آپ نے وہاں ایسے لوگ دیکھے جو اپنے ہی جسم سے پہلوؤں کا گوشت نوچ نوچ کر کھا رہے تھے۔ان سے کہا جارہا تھا:
’’ یہ بھی اسی طرح کھاؤ جس طرح تم اپنے بھائی کا گوشت کھایا کرتے تھے۔‘‘
آپ نے دریافت فرمایا: 
’’ یہ کون لوگ ہے؟‘‘
جبرئیل علیہ السلام نے کہا: 
’’ یہ وہ لوگ ہے جو ایک دوسرے پر آوازے کسا کرتے تھے۔‘‘
جہنم دکھانے کے بعد آپ کو جنت دکھائی گئی۔آپ نے وہاں موتیوں کے بنے ہوئے گنبد دیکھے۔وہاں کی مٹی مشک کی تھی۔آپ نے جنت میں انار دیکھے، وہ بڑے بڑے ڈولوں جتنے تھے۔اور جنت کے پرندے اونٹوں جتنے بڑے تھے۔ساتوں آسمانوں کی سیر کی۔ سیر کے بعد آپ کو سدرۃ المنتہیٰ تک لے جایا گیا، یہ بیری کا ایک درخت ہے۔حضور اکرم صلی اللہ علیہ وسلم نے سدرۃ المنتہیٰ کی جڑ میں ایک چشمہ دیکھا۔اس سے دو نہریں پھوٹ رہی تھیں۔ایک کا نام کوثر اور دوسری کا نام رحمت۔آپ فرماتے ہیں، میں نے اس چشمے میں غسل کیا۔
ایک روایت کے مطابق سدرۃ المنتہیٰ کی جڑ سے جنت کی چار نہریں نکل رہی ہیں۔ان میں سے ایک نہر پانی کی،دوسری دودھ کی، تیسری شہد کی اور چوتھی نہر شراب کی ہے۔
اسی وقت سدرۃ المنتہیٰ کے پاس آپ نے جبرئیل کو ان کی اصل شکل میں دیکھا یعنی جس شکل میں اللہ تعالیٰ نے بنایا تھا۔ان کے چھ سو پر ہیں اور ہر پر اتنا بڑا ہے کہ اس سے آسمان کا کنارہ چھپ جائے۔ان پروں سے رنگا رنگ موتی اور یاقوت اتنی تعداد میں گر رہے تھے کہ ان کا شمار اللہ ہی کو معلوم ہے۔
پھر ایک بدلی نے آپ کو آکر گھیر لیا۔آپ کو اس بدلی کے ذریعے اوپر اٹھا لیا گیا۔(بدلی کی جگہ بعض روایات میں ایک سیڑھی کے ذریعے اٹھانے کا ذکر بھی آیا ہے۔)۔یہاں آپ نے صریر اقلیم(یعنی لوح محفوظ پر لکھنے والے قلموں کی سرسراہٹ)کی آوازیں سنیں۔یہ تقدیر کے قلم تھے اور فرشتے ان سے مخلوق کی تقدیریں لکھ رہے تھے۔
اس تفصیل سے معلوم ہواکہ جبرئیل علیہ السلام سدرۃ المنتہیٰ سے آگے نہیں گئے اور یہ بھی معلوم ہوا کہ سدرۃ المنتہیٰ ساتویں آسمان سے اوپر ہے۔ بعض علماء نے لکھا ہے کہ یہ عرش اعظم کے دائیں طرف ہے۔
ایک روایت میں ہے کہ جبرائیل علیہ السلام آپ صلی اللہ علیہ وسلم کو لے کر ساتویں آسمان کے اوپر گئے۔ وہاں ایک نہر پر پہنچے۔اس میں یاقوتوں، موتیوں اور زبرجد کے خیمے لگے تھے۔ اس نہر میں ایک سبز رنگ کا پرندہ تھا۔ وہ اس قدر حسین تھا کہ اس جیسا پرندہ کبھی نہیں دیکھا تھا۔ جبرائیل علیہ السلام نے بتایا: 
’’یہ نہر کوثر ہے جو اللہ تعالیٰ نے آپ کو عطا فرمائی ہے۔‘‘
آپ فرماتے ہیں، میں نے دیکھا، اس میں یاقوت اور زمرد کے تھالوں میں رکھے ہوئے سونے اور چاندی کے جام تیر رہے تھے۔ اس نہر کا پانی دودھ سے زیادہ سفید تھا، میں نے ایک جام اٹھایا۔اس نہر سے بھر کر پیا تو وہ شہد سے زیادہ میٹھا اور مشک سے زیادہ خوشبودار تھا۔
آپ فرماتے ہیں، جبرائیل علیہ السلام مجھے لیے ہوئے سدرۃ المنتہیٰ تک پہنچے۔اس کے پاس حجاب اکبر ہے۔ حجاب اکبر کے پاس پہنچ کر انہوں نے کہا: 
’’ میری پہنچ کا مقام یہاں ختم ہوگیا۔ اب آپ آگے تشریف لے جائیں۔‘‘
آپ فرماتے ہیں، میں آگے بڑھا۔ یہاں تک کہ میں سونے کے ایک تخت تک پہنچ گیا۔ اس پر جنت کا ریشمی قالین بچھا تھا۔اسی وقت میں نے جبرائیل علیہ السلام کی آواز سنی…وہ کہہ رہے تھے: 
’’ اے محمد! اللہ تعالیٰ آپ کی تعریف فرما رہا ہے۔آپ سنیے اور اطاعت کیجئے۔آپ کلام الٰہی سے دہشت زدہ نہ ہوں۔‘‘
چنانچہ اس وقت میں نے حق تعالیٰ کی تعریف بیان کی۔ اس کے بعد مجھے اللہ کا دیدار ہوا۔ میں فوراً سجدے میں گرگیا۔پھر اللہ نے مجھ پر وحی اتاری، وہ یہ تھی: 
’’ اے محمد! جب تک آپ جنت میں داخل نہیں ہوجائیں گے،اس وقت تک تمام نبیوں کے لیے جنت حرام رہے گی۔اسی طرح جب تک آپ کی امت جنت میں داخل نہیں ہوگی، تمام امتوں کے لیے جنت حرام رہے گی۔‘‘
اس کے علاوہ اللہ تعالیٰ نے فرمایا: 
’’ اے محمد!ہم نے کوثر آپ کو عطا فرما دی ہے۔اس طرح آپ کو یہ خصوصیت حاصل ہوگئی ہے کہ تمام جنتی آپ کے مہمان ہوں گے۔‘‘
اس کے بعد پچاس نمازیں فرض ہوئیں۔پچاس نمازیں حضرت موسیٰ علیہ السلام کے مشورہ سے کم کرائی گئیں۔یہاں تک کہ ان کی تعداد پانچ کردی گئی تاہم اللہ تعالیٰ نے فرمایا: 
’’ اے محمد! ہر روز یہ پانچ نمازیں ہیں۔ان میں سے ہر ایک کا ثواب دس کے برابر ہوگا اور اس طرح ان پانچ نمازوں کا ثواب پچاس نمازوں کے برابر ملے گا۔آپ کی امت میں سے جو شخص بھی نیکی کا ارادہ کرے اور پھر نہ کرسکے، تو میں اس کے حق میں صرف ارادہ کرنے پر ایک نیکی لکھوں گا اور اگر اس نے وہ نیک عمل کر بھی لیا تو اسے دس نیکیوں کے برابر لکھوں گا اور جو شخص کسی بدی کا ارادہ کرے اور پھر اس کو نہ کرے تو بھی اس کے لیے ایک نیکی لکھ دوں گا اور اگر اس نے وہ بدی کرلی تو اس کے نتیجے میں ایک بدی لکھوں گا۔‘‘
آپ فرماتے ہیں،میں نے جنت کے دروازے پر لکھا دیکھا: 
’’ صدقے کا صلہ دس گنا ہے اور قرض کا صلہ اٹھارہ گنا ہے۔‘‘
میں نے جبرائیل سے پوچھا: 
’’ یہ کیا بات ہے کہ قرض دینا صدقے سے افضل ہے؟‘‘
جواب میں انہوں نے کہا: 
’’ اس کی وجہ یہ ہے کہ سائل جسے صدقہ دیاجاتا ہے، وہ مانگتا ہے تو اس وقت اس کے پاس کچھ نہ کچھ ہوتا ہے۔جب کہ قرض مانگنے والا اسی وقت قرض مانگتا ہے جب اس کے پاس کچھ نہ ہو۔