skip to Main Content

گلفام نامہ

عبدالقادر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گزشتہ   زمانے   کی   ہے     داستاں                      تھا   اک  ملک  کا بادشاہ   گل زماں
بڑا  ملک   تھا   اور  بہت   شان تھی   زمیں پر تھی شہرت، بہت آن  تھی
رعایا   تھی   خوش حال   اور شادماں   نہیں تھا کہیں   رنج و غم کا   نشاں
خدا   نے دیے اس کو شہزادے تین   بہت نیک سیرت  ،   نہایت   ذہین
بہت   ناز   سے   اُن  کو   پالا   گیا   علوم    و   فنوں   سے   نوازا   گیا
خزانے   میں   دولت  کا    انبار   تھا   بہت قیمتی اس میں   اک   ہار   تھا
ہر   اک   شہزادہ   اس ہار پر تھا فدا   وہی   ہار   تینوں   کو    مطلوب تھا
پریشان    اس   بات   پر   تھا   پدر   عزیز   اس کو    تھے اپنے تینوں پسر
بہت   عقل والا   تھا   شاہ کا   وزیر   بڑا   نیک دل   اور   روشن   ضمیر
اُسی    کو   بلا   کر     کیا     تذکرہ   ’’مجھے   تم   سے  درکار ہے مشورہ
خزانے میں ہے   ایک   سونے کا ہار   مرے   تینوں   بیٹے ہیں اُس پر نثار
نہیں   مجھ   کو   منظور   دل   توڑنا   کسے   ہار   دُوں   تم   بتاؤ   ذرا‘‘
وہ   کہنے   لگا   ’’ہم نکالیں گے حل   کیا   جائے  گا   پھر   اُسی پر  عمل‘‘
ہوا   طے کہ   تینوں چلائیں گے تیر   ہوا کو وہ تیروں سے ڈالیں گے چیر
بہت   آگے   جس کا   پہنچ جائے گا   وہ   شہزادہ   حقدار   ہو  جائے   گا
ہوئی   صبح صادق   تو   شاہ اور وزیر   وہ   شہزادے  لے کر کمان اور تیر
ہوئے   پانچوں جنگل کی جانب رواں   جہاں   تین   بیٹوں   کا تھا   امتحاں
اُجالا   ہوا   ہر   طرف   دشت  میں   چلائے   گئے   تیر   اک وقت میں
کمانوں    سے   وہ   تیر   آگے  گئے   اُسی   سمت   میں سب روانہ ہوئے
وہ پانچوں تھے گھوڑوں کے اوپر سوار   نتیجے   کا   اُن   سب کو   تھا انتظار
بڑے   بھائی   کا     تیر   آیا   نظر   جو   پہنچا   تھا   انگور   کی   بیل پر
گئے   اور    آگے   وہ   کہسار   میں   ملا   تیر   منجھلے   کا   اک غار میں
کئی   گھنٹے     جاری   رہا   پھر   سفر   نہیں   تیر   چھوٹے   کا   آیا  نظر
کہا   بادشاہ   نے   ’’قدم   روک لو   بہت   دُور   آئے   ہیں، واپس چلو
ہمیں   تیر   آخر   میں  جس کا   ملا   اُسے   ہار   جا کر   دیا   جائے   گا
تھا   گلفام   چھوٹا،   وہ   رونے   لگا   بہاتے   ہوئے   اشک،   کہنے   لگا
’’ پلٹ کر  یہاں سے نہیں جائیں گے   ہے اک تیر آگے، اُسے لائیں گے‘‘
نہیں   بات   چھوٹے   کی   مانی  گئی   خوشامد   بھی   بے کار   ثابت ہوئی
کہا اُس نے   ’’واپس نہیں جاؤں گا   اکیلا   ہی   جا کر   اسے  لاؤں گا‘‘
وہ   گلفام کو   چھوڑ کر   چل دیئے   بیاباں   میں   تنہا   اسے    کر گئے
سفر     آگے     گلفام   کرتا     رہا   لیے   چشم   پُر نم،   وہ   بڑھتا رہا
وہ   وعدہ   خلافی   پہ   دل گیر   تھا   غم و یاس   کی   زندہ   تصویر   تھا
ملا     راستے   میں   بڑا    سا   شجر   نظر   آیا   وہ   تیر   اک  شاخ   پر
شجر   سے   چڑھا،   تیر  کو   چھو لیا   ذرا   کھینچ   کر   اُس کو  حاصل   کیا
بڑا       کارنامہ       دکھایا       مگر   نہیں   مل   سکا   اُس کو   اچھا ثمر
تھا   گلفام   پر   غم   کا   گہرا   اثر   شروع   پھر   ہوا   واپسی   کا   سفر
اچانک   یہ   محسوس   اس   کو    ہوا   کوئی   اس کے   پیچھے  ہے بیٹھا   ہوا
پلٹ کر   جو   دیکھا   تو   گھن  آگئی   بڑی  سی   بندریا   تھی   بیٹھی  ہوئی
اسے   زور   سے   ایک   دھکا   دیا   زمیں   پر   بندریا   کو     پہنچا   دیا
اچھل   کر   بندریا   ہوئی   پھر سوار   نہیں   مانی   انسان   سے   اپنی  ہار
دوبارہ     بندریا     کو   دھکا     دیا   زمیں   بوس   اُس   جانور   کو   کیا
یہی   کھیل   دونوں   کا   ہوتا   رہا   وہ      آتی   رہی  ،  وہ   گراتا     رہا
لگا   سوچنے   اس میں   کیا راز ہے   بندریا   کا   یہ   کیسا     انداز   ہے
مجھے   اس نے   بندر تو سمجھا نہیں؟   مرا   منہ   تو   لنگور   جیسا   نہیں؟
مجھے     سمجھے     لنگور   یا     آدمی   نہیں   پیار کی اس کے دل میں کمی
اسے   پیار ہے   ایک   انسان   سے   محبت   ملی   مجھ   کو   حیوان   سے
بندریا  کو    اب میں کروں گا نہ دُور   اسے   ساتھ   اپنے  رکھوں گا ضرور
اسے محل   میں   ساتھ   لے کر گیا   وہ  خوش تھا   کہ اک پیارا ساتھی ملا
ہوئی   رات   تو   اک    تماشا   ہوا   بندریا     کا   جب   راز   افشا   ہوا
بدن   سے   اتاری   بندریا نے کھال   تو   ظاہر   ہوئی  اک پری بے مثال
پری تھی نہاں کھال   میں اس طرح   صدف  میں ہو پنہاں گہر جس طرح
کہا   اس پری  نے   ’’سدا خوش رہو   خدا   سے   مراد   اپنی   مانگا   کرو
جو   گزری   ہے تم پر، مجھے ہے خبر   پری   ہوں  ،   پرستان   ہے مستقر
ہے میرے گلے میں جو ہیروں کا ہار   اسے کر رہی ہوں میں تم پر   نثار‘‘
اسے  ہار دے کر  وہ   رخصت   ہوئی                       مگر   جاتے   جاتے   نصیحت   یہ کی
’’نہ کرنا کبھی فانی دنیا سے پیار
فقط  آخرت  ہے    بہت پائیدار‘‘
Facebook Comments
error: Content is protected !!
Back To Top