skip to Main Content

موسم گزر گیا

شاہین اقبال اثر

 

وہ پوچھتے  ہیں  کس  لئے  چہرہ  اتر   گیا 

سنئے !  خدا نخواستہ  کیا  کوئی   مر  گیا 

کیا  کھو  گیا  ہے  آپ  کا  بٹوہ  جنابِ    من 

یا   جیب  کترا ، جیب  کہیں  صاف  کر   گیا 

کیا چوری ہو  گئی ہے کہیں بھینس آپ کی 

یا  بیل   راہِ   راست  سے  ہٹ  کر  ٹکر گیا 

کیا  دشمنوں  کی  آج   طبیعت   خراب  ہے 

یا دل کسی چڑیل کے  سائے  سے  ڈر گیا 

دل  ہی  تو  ہے یہ، سنگ یا آہن تو ہے نہیں 

اصرارِ    تعزیت     پہ     با لآخر    بپھر    گیا 

رو  کر کہا  کہ  آپ  کو  اس  کی خبر نہیں؟ 

مہمان  آیا ،  آتے  ہی  واپس  وہ   گھر   گیا 

اب تو سمجھ گئے، کہ ہوں مغموم کس لئے 

محبوب  دوست  ’’آم‘‘  کا  موسم   گزر   گیا 

Facebook Comments
error: Content is protected !!
Back To Top