آؤ آؤ سیر کو جائیں
صوفی غلام مصطفیٰ تبسّم
آؤ آؤ سیر کو جائیں
باغ میں جا کر شور مچائیں
اچھلیں کودیں ناچیں گائیں
آؤ آؤ سیر کو جائیں
کالے کالے بادل آئے
جھوم جھوم کر سر پر چھائے
مینہ برسے گا خوب نہائیں
آؤ آؤ سیر کو جائیں
باغ میں تازہ پھول کھلے ہیں
رنگ برنگے پھول کھلے ہیں
ہم بھی اپنا رنگ جمائیں
آؤ آؤ سیر کو جائیں
کشتیاں لے کر کچھ پانی کی
کوئی بڑی اور کوئی چھوٹی
پانی میں رکھ دیں ، بہائیں
آؤ آؤ سیر کو جائیں
پتّی لے کر اِک پیپل کی
بنسی ایک بنائیں ہلکی
ناچیں گائیں ناچیں گائیں
آؤ آؤ سیر کو جائیں
Facebook Comments